ROMA 14 - Nouveau Testament Doyayo

ROMA 14

¹ Zen za̧a̧nyɔ ɗɔbsugɔ taan tɛŋko, wɛɛ bɔnɛ gbaatin a mɔkilɔ bɔ geha.

² Doo za gɔ mɔk a gi ɗɛɛ hinyɔ gi sɛw leki, wɛɛ zaabɔ tɛŋkɔ tuur gɛ, hinyɔ gi leko gɛ: biskpasɛ.

³ Za̧a̧nyɔ gi lek hin sɛw bɔ gi see za̧a̧nyɔ gi lek hinsɛ̧ɛ̧kum an doo tɔs; za̧a̧nyɔ gi lek hinsɛ̧ɛ̧kum be, bɔ gi gbaas naaza bɔ gi lekhin sɛw dɔglɛ, yɔ anbɔ Bɛt zegzebɔ.

⁴ Mɔɔ bɔ an mɔ gbaas doo za woosɔya dɔgl nɔ? Ɗɛntɔ gii gi yɛ̧ɛ̧ dɔglɔ gi raa a woosɔ eerɔ, zaabe woosɔ maatɔ; mɔnɛ dɔgl mɔ taa du. Yɔ anbɔ Waar Kristu gii gin tɛŋk an gi ɗaasige gi er bɛttɔnɔ.

⁵ Doo za gi mɔkig a ɔ̧t wɔrɔ hi gi ɔ̧t gbɔlɛ hi daar zaadɛ daarɔ, zaabɔ gi mɔkig be, a ɔ̧t sɛw hi riitinu. An doo yɔ gi sɛw gi mɛɛ hinyɔ gɔ gi fɔb rɔbtɔnɔ a gi zuldu.

⁶ Za̧a̧nyɔ her ɔ̧tza gi wɛɛnig ɔ̧t gbɔɔlɛ, yɔ anbɔ gɔs Waar Yeesu gii an gi ɗɔbsige. Za̧a̧nyɔ gi lek hinyɔ gi sɛw gi lesig Waar Yeesu ga, wɛɛ gi baanik Bɛt dɔŋgɔ ge, za̧a̧nyɔ gi lek hinsɛ̧ɛ̧kum be gi lesig Waar Yeesu gii an gi ɗɔbsige, gi baanik Bɛt hɛw.

⁷ Doo za taas zulɔ za̧a̧ko, taas zulɔ wɔrko.

⁸ Ya̧a̧nɛ, wɛ gi za̧a̧ko wɛ gi za̧a̧sig Waar Yeesu giya, wɛ wɔrko wɛ wɔsig Waar Yeesu giya, an wɛ za̧a̧za̧, wɛɛ an wɛ wɔɔrɔ wɛ gi Waar wɛ Yeesu Kristu dood ɔ̧ɔ̧nɛ.

⁹ Ya̧a̧nɛ, Kristu wɔrɔ wɛɛ za̧a̧ an gi wɛɛ Waar a wɔrkɛ wɔ hi dood za̧a̧til wɔ hi zulha.

¹⁰ Nɛ yɛrɛ mɔya, yɔ mɔ lek hinsɛ̧ɛ̧kumi nɔmɔ gbaasig namɔza dɔglɛ? Zaabe, mɔɔ be, yɔ mɔ lek hin sɛw nɔ mɔ seek namɔza an hin hintɔsi? Wɛ́ erk Bɛt muutdu wɛ sɛw an gi gbaasɛ dɔglɛ.

¹¹ Ya̧a̧nɛ Bɛt ɗɛɛrwolɔ gi raa a Waar Bɛt raa: a rɔbo, anyɔ be gi za̧a̧tili, dood sɛw hí zagl be muutdu. Dood ya̧a̧boon sɛw hi ta̧a̧ dɔgl be a bee Bɛto.

¹² A ɔ̧tɔge an bɔ sɛw gi ta̧a̧s zulɔ hin a Bɛt muutdu.

¹³ Yɔ anbɔ, yɛwɛ ɔɔ dɔgl gbaatingoɔ. Wɛɛn nɛ mɔk gbun kpɔd an bɔnɛ gbaas nanɛza bet an gi simdɔɔ muulɔge, zaabe an gi mat a hinha̧a̧l du.

¹⁴ Anyɔ mi ɔksɔ hi Waar Yeesu , mi mɛɛ bɛttɔnɔ mi kpoos du a hinza ɓi̧i̧limya hi zulɔ taaro. Wɛɛ hinɓi̧i̧limya yɔ giro gɛ gis za̧a̧nyɔ gig seek a hin yɛrɛ gi ɓi̧i̧limyayɔ, taa hinrɔbo.

¹⁵ Lees bɔ mɔ lek gi gis namɔza hinɓi̧i̧lumya, mɔ́ fɔ̄b hinyɔ hat raa gii gɛ. Hinbɔ lab bɛr gɛ. Bɔmɔ ha̧tir doo yɔ Kristu wɔr a gi dɔŋg hi lees mɔ bɔ.

¹⁶ Hinyɔ gisin hinrɔbo, bɔgi wɛɛs doo za hinyɔ gɔ gi boo ya̧a̧ha̧a̧l muulɔ ge.

¹⁷ Bɛt wáátɔ taa hinlek dɔglɛ hi yɔ̧k dɔglɛ, gi rɔbwooki, boolumi, hi hat yɔ Mɔkilɔ gi gaako.

¹⁸ Za̧a̧nyɔ gi woosig Kristu woos anbɔ gi bɛs Bɛto, gi riis dood be.

¹⁹ Yɔ anbɔ yɛwɛ tɛb boolum dɔgl an wɛɛ Yeesu fɔkyaadɛ wɛ wɔm ɔksig wɛ a ɗɔbsig du lɛlgbun an luko.

²⁰ Bɔnɛ ha̧tir Bɛt woosɔ a lees dɔgl dɔŋgo. Hi rɔbo, lees sɛw gaaga an hi lege, lees ha̧a̧lɔ gɛ doo gi leg hi bɔ̧ɔ̧sɛ gi matin naaza zaa a hinha̧a̧l du.

²¹ Bɛr an bɔmɔ tɔb nambo, bɔmɔ yɔ̧ bumɛ, mɔ lil hinyɔ gɔ gi kam namɔza a hinha̧a̧l du sɛw.

²² Ɗɔbsig yɔ mɔ ginɔ, gbaasum zul mɔɔnɛ a Bɛt muutdu. Hat gi a za̧a̧nyɔ māt zulɔ a dɔgl-gbaak du a hinyɔ gi wook gedu gɛ.

²³ Yɛrɛ za̧a̧nyɔ kpoosɔ tā̧ā̧ hinyɔ gi lek gɛ, Bɛt gi gbaasig dɔgl anyɔ le hi ɗɔbsig gɛ. Hinyɔ doo gi wook sɛw, kpoosɔ gi taa hi ɗɔbsig gɛ, woo hinha̧a̧l a Bɛt muutdu.