MATA 24 - Nouveau Testament Doyayo

MATA 24

¹ Yɔ Yeesu tuu Bɛtluk du gi reko, walɛsɛrɛ ɔ̧ɔ̧ wɔ hi sɔɔ hi dɔgsig Bɛtluk bɔ wɔŋkɔ hi wɔmɔ.

² Yɔ anbɔ Yeesu dɔgsihi a nɛ gbɛn hin yɛrɛ sɛw ya? Be dɔgsin rɔbo: bet za taa kɔŋk goksili; dood gabsya hi zaa hi ɛ̧btir sɛw.

³ Yɔ Yeesu re gi ɗɔɔt a Kɔ̧ɔ̧b Ga̧a̧t bɔ hage, walɛsɛrɛ ɔ̧ɔ̧ wɔ hi sɔɔ gi dɔŋdi hi ɛrige a raasiwi ɔ̧tyɔ hin bɔrɔ gɔ gi tuur gedu hi gɛrs yɔ gɔ gi zunsiw zaak mɔnɛ a waal du hi waal da̧a̧ki.

⁴ Yeesu goohi a oon zul nɛ an bɔ doo za gi maatinɛ.

⁵ Ya̧a̧nɛ dood kittɔnɔ hí zaa a be nuŋg du, hí raa a bee gi Masihu bɔ, hi wɛɛ hi maa dood kittɔnɔ be.

⁶ Nɔk gi gi a lɛl zaadɛ sɔmsɔm, nɛ wɛɛ nɛ lag a hi bootig nɔk dɔgl zaadɛ be, bɔ hoob gi ha̧a̧nɛ a ɔ̧tɔge. Gi an hin bɔ lab gi tuurɔ, wɛɛ hinɔ taa raak waalda̧a̧k kete.

⁷ Yɔ anbɔ, hɛbt hi gɔ nɔk hi hɛbt zaadɛ, waar ɛ hi ɗund nɔk a waar ɛ zaadɛ zul ha; wɛɛ tɔs gi giro, hɛbt gi nam a lɛlza sɔmsɔm.

⁸ Hin wɔrɔ sɛw gi gi an waagulik kosgumn biitiryɔ.

⁹ Gɔ gi anbɔ dood hi wa̧a̧nɛ hi gaan a dood gbɔlɛ naan du hi ha̧a̧nin ya̧a̧rɛ hi wɛɛ hi gbɔ̧nɛ. Dood waal du sɛw hi hɛ̧ɛ̧ninlɔl a be nuŋg dɔŋgo.

¹⁰ Gɔ gi ɔ̧tɔge anbɔ dood kittɔnɔ hi ɔɔbe ɗɔbsigi, hi wɛɛ hi raaltinu, hi wɛɛ hi hɛ̧ɛ̧tinlɔlɛ.

¹¹ Bɛtya̧a̧kɛŋkya ya̧a̧gɔ̧ɔ̧nyaadɛ kittɔnɔ hi midilo hi zaa hi maa dood kittɔnɔ hi ɔɔb ɗɔbsugɔ.

¹² Ha̧a̧lgɔk gi yɔ̧ɔ̧s lɛlɛ. Yɔ anbɔ, dood kit wɔ hi gin Bɛt hatɔ kpoos du hatya̧ gi niimɔ.

¹³ Yɛrɛ za̧a̧nyɔ gɔ gi mɔmɔ gi tuur a waalda̧a̧ki gi za̧a̧.

¹⁴ Hɔnɛ gi an hi dɔg Bɛt wáát Dɔgl Rɔb yɛrɛ gi yɔ̧ɔ̧s waal sɛw an dɔ̧ɔ̧t wɔ hi gi sɛw hi kɛm Bɛt wáát dɔgl kete, gɔ gi kuudu waal gi da̧a̧ ma gɔ.

¹⁵ Nɛ́ gbɛn hinyɔ hi elk a hinɓi̧i̧limya ha̧a̧lɛ yɔ Bɛtya̧a̧-kɛŋkya bɔ Daanyɛl boo dɔglɔ gigi ɗɔɔtig a lɛlyɔ Bɛt gi waak gedu ge. (Za̧a̧nyɔ gi zaŋgik hin yɛrɛ gi kɛm bɛttɔnɔ! )

¹⁶ Gɔ gi anbɔ, dood wɔ gɔ hi gi a Yahuduya, nɔ̀ɔ̀hi hi dɔ̀ɔ̀ ga̧a̧ti;

¹⁷ za̧a̧nyɔ gi luk zulha, bɔgi siz a luk du an gi loo wɔdɔ.

¹⁸ Za̧a̧nyɔ gi a bako, bɔgi wɛɛz raa du an gi loo gbandilɔ.

¹⁹ Ya̧a̧rhant gi gis budaa wɔ a ɔ̧tɔ ge hi waatnɔɔdɛ wɔ hi gaak waat wa̧a̧lɛ!

²⁰ Zɔ̧n Bɛt an bɔnɛ nɔɔ a zɛrk du, zaabe a holum-ɔ̧ti.

²¹ Yɔ anbɔ a ɔ̧tɔge ya̧a̧rhant gi tɔɔ gi daar ya̧a̧rhant zaadɛ wɔ sɛw, yɛɛl a waalyɛɛliki, tuur ɓɔryɔ, wɛɛ riitinsɔ za taa gik anbɔ.

²² An Bɛt da lɔ̄bs ɔ̧t wɔrɔ gɛ, doo za ɗɛɛ an gi za̧a̧ gɛ. Yɛrɛ lɔbs ɔ̧t wɔrɔ a dood wɔ sɛ̧ɛ̧hi hi dɔŋgo.

²³ A ɔ̧tɔge doo za gi zaa gi raanɛ a sɔ̧ɔ̧nɛ, Masihu bɔ gi hɛdi, zaabe a gi yɛhɛ, bɔnɛ ɗɔbsɔ.

²⁴ Yɔ anbɔ masihu ya̧a̧gɔ̧ɔ̧nya wɔ hi Bɛtya̧a̧kɛŋkya ya̧a̧gɔ̧ɔ̧nya wɔ hi midɔ hi gɔ gɛrs hinzuunikyaadɛ hi gɛrs gbɔlɛ zaadɛ kittɔnɔ an hi maatin dood wɔ Bɛt sɛ̧ɛ̧hi hɛw à hi ɗɛɛ nɛ hinɔ wooko.

²⁵ Ɓaanɛ! Be dɔgsin hin wɔrɔ sɛw doorɔ.

²⁶ Yɔ anbɔ, gid hi dɔgsinɛ, a gi gɛrɛ a hɛtdɔŋ du, bɔnɛ rekɔ! Zaabe hi raanɛ a gi yaatig gɛrɛ hɛdi, bɔnɛ ɗɔbsɔ!

²⁷ Anyɔ bɛlya̧bs gi gaak a bɛtha a ɔ̧tkazigi lɛlgaalɔ gi tuurik a ɔ̧tleki, Za̧a̧n Waa bɔ gi zaa anbɔ be.

²⁸ Lɛlyɔ hinwɔl gi ge dukumnɔɔ hi mɔks lɛlɔge be.

²⁹ Nɔɔktɔnɔ a ya̧a̧rhant wɔrɔ hi kuudu, ɔ̧t gi nimɔ, sɛɛ taa gaak buulɛ, sɛwaat hi mɛlz a bɛtha, tɛŋk wɔ hi gi a bɛtha hi bee.

³⁰ Gɔ gi anbɔ hi gbɛn hinyɔ gɔ gi zunsihi Za̧a̧n Waa bɔ zaakɔ a bɛtha, dood dɔ̧ɔ̧t wɔ hɛbtdi sɛw hi kaalɔ. Hi gbɛn Za̧a̧n Waa bɔ zaakɔ a kuus ha a bɛtha hi tɛŋk gbɔɔltɔnɔ hi Bɛt gbɔlumsɔ.

³¹ Gi yaa walɛsɛrɛ ɔ̧ɔ̧ wɔ hi ulk pɔ̧r wɔ hi rek a ɔ̧tkazigi, hi a ɔ̧tleki, a ɔ̧tkazig naanrɔbo hi a ɔ̧tkazig naanyɛ̧li hi mɔks dood wɔ Bɛt sɛ̧ɛ̧hi sɛw hi bààr a hɛbt lɛlyɔ yɛɛl ge gi tuur a lɛlyɔ door ge.

³² Gogin hin a yɔmntnɔ muulɛ: gɔ nɛ gbɛn tɛ̧ɛ̧ya̧a̧n wɔ hi ruutugo hi wɛɛ hi baak kpas yɛ̧sɛ, nɛ mɛɛ a gaak sɛ̧ɛ̧bɔ.

³³ Wɛɛ gɔ nɛ gbɛn hin wɔrɔ sɛw hi tuuruko, mɛɛn a Za̧a̧n Waa bɔ sɛ̧ɛ̧b ma a lukgbɔnɔya̧ hɛw.

³⁴ Be dɔgsin rɔbo: dɔ̧ɔ̧t yɛrɛ taa wako, hin wɛrɛ sɛw hi tuur kete.

³⁵ Bɛtha hi hɛbtdi hi talɔ, yɛrɛ dɔgl be taa talk nɛ zaŋ.

³⁶ Yɛrɛ doo za mɛɛ ɔ̧t bɔ gɛ. Kin lɛlli, Bɛt walɛsɛrɛ wɔ bɛtha hi Bɛt waa bɔ hɛw hi mɛɛ ɔ̧tɔ gɛ. Baa bɔ gii mɛɛ kpɔd.

³⁷ Hinyɔ tal a Nɔwe waabilɔ bɔ gedu, gɛ Za̧a̧n Waa bɔ gɔ gi zaa, hinɔ gbunɔ giigi tuurɔ.

³⁸ A ɔ̧tɔge anyɔ mɛm gɔ gi hi̧i̧s hɛbto, dood hi hinleko, hi yɔ̧ko, hi lootingo hi gaak waatya̧ a lottins du, tuur a ɔ̧tyɔ Nɔwe kar a lɛmb gbɔɔl bɔ gedu.

³⁹ Hí mɛks hinza gɛ, tuur a ɔ̧tyɔ mɛm hi̧i̧s hɛbt gi ka̧hi du sɛw. Za̧a̧n Waa bɔ zaakɔ gi gi anbɔ be.

⁴⁰ Gɔ gi anbɔ walɛ eerɛ hí gi a bak du, hi loo gbunu hi ɔɔ gbunu;

⁴¹ nɛɛd eerɛ hi hinnaŋk naal ha, hi loo gbunu hi ɔɔ gbunu.

⁴² Oonɛ anyɔ nɛ mɛɛ ɔ̧tyɔ Waar nɛ gɔ gi zaa du gɛ.

⁴³ Mɛɛn hinyɛrɛ: à za̧a̧nraatya bɔ mɛɛnɛ ɔ̧tyɔ doo luur gɔ gi zaa du rɛ, yɔ oonɛ lɛlɛ an gi ya̧nts luur bɔ gbɔnɔtalk gi raa du.

⁴⁴ Yɔ anbɔ, nɛɛ hɛw, oondi bed, ya̧a̧nɛ, Za̧a̧n Waa bɔ gi zaak a ɔ̧tyɔ nɛ mɔk a gi zaa gedu gɛ.

⁴⁵ Yɛrɛ bɔ gi gbaar woosya hinmɛɛkya dubt yɔ rii an hi gbaa mɔkil a ge nɔ? Gbaar bɔ lab ɗɛntɔ gàà gii woos naandu an gi oo naaza zaadɛ wɔ gi gaahi lees a ɔ̧tyɔ gɔ gi ha̧a̧hi duge hi le?

⁴⁶ Ɗɛntɔ bɔ gi wɛɛzɔ gi zɛŋge gi wookwoos bɔ, hat gi a gbaarɔ ge.

⁴⁷ Be raasin rɔbo: ɗɛntɔ bɔ gi gaag rɔɔsɔ wɔ naan du sɛw.

⁴⁸ Yɛrɛ gbaar bɔ gi ha̧a̧lɔ gi raa a gi kpoos du a ɗɛnt be gi aŋk-am zaakɔ,

⁴⁹ gi wɛɛ gi yɛɛl naaza gbaarɛ wɔ lɛbtigi, gi yɛɛl hinleki hi yɔ̧ki hi bumwɔniki,

⁵⁰ hɔnɛ gɔ gi anbɔ, ɗɛnt bɔ gi zaa a ɔ̧tyɔ taag ook gedu gɛ, wɛɛ kinsa zaakɔ lɛlli be, mɛɛ gɔ gɛ;

⁵¹ gɔ gi zaa gi ha̧a̧n gbaarɔ ha̧a̧l bɔ ya̧a̧r ha̧a̧ltɔnɔ, gi wɛɛ gi wa̧a̧ gi wɔge gi yaag a lɛl ha̧a̧l du hi dood mɛl ha̧a̧lya wɔ. Dood hi kaa hi gboo nuŋgya̧ a lɛlɔ gedu.