MARKUS 8 - Nouveau Testament Doyayo

MARKUS 8

¹ A ɔ̧tɔge saal kit hi mɔks sekto. Yɔ dood wɔ hi taan lees an hi le gɛ, Yeesu el walɛsɛrɛ ɔ̧ɔ̧ wɔ raahi:

² a dood wɛrɛ hi ha̧a̧sib ya̧a̧rɛ, anyɔ hi gitin hi bee ɔ̧t taarɛ, wɛɛ hi taan lees be.

³ Àn be yaahi a hi lɛl a̧a̧kili, yɔ hi maatilo a gbɔnɔ di; wɛɛ dood zaadɛ wɔ hi gi hi teesdu hi fu̧u̧z lɛlya̧ hɛmltɔnɔ be.

⁴ Walɛsɛrɛ ɔ̧ɔ̧ wɔ hi gòòge: a yɔ hi zɛm ma kokɔ ay an hi lenihi hɛdi a hɛt dɔŋg du nɔ?

⁵ Yeesu ɛrihi: a nɛ gin kok kiml baari? Hi ta̧a̧: a nɔɔn-erɛ.

⁶ Wɛɛ raa saal wɔ hi ɗɔɔt hɛbt di. Loo kok kiml wɔ nɔɔn-erɛ baan Bɛto, wɛɛ ɓɛɛlɔ, gaa walɛsɛrɛ ɔ̧ɔ̧ wɔ kok wɔ an hi gɛ̧ɛ̧s dood wɔ. Fɔkya wɔ hi gɛ̧ɛ̧s dood saal wɔ kok wɔ.

⁷ Hi gin nɛ dut dɛɛt kaasi. Yeesu loo dut wɔ baan Bɛto, wɛɛ raahi hi gɛ̧ɛ̧sihi hɛw.

⁸ Dood wɔ hi le kok bɔ hi hi̧i̧. Hi wɛɛn kok ɓɛɛkil wɔ zɛ̧ɛ̧r dɛl hi̧i̧sil nɔɔn-erɛ.

⁹ Dood wɔ hi gi nɛ kitigya̧ sɛ̧ɛ̧b hin duk nasɔ. Kuudu Yeesu wɛɛ yaahi hi lɛlɛ.

¹⁰ Gii wɛɛ kar ɓɔrbɔ a lɛmb du hi walɛsɛrɛ ɔ̧ɔ̧ wɔ hi rek a Dalmanuta hɛbt du.

¹¹ Farisaya wɔ hi zaa hi yɛɛl hinfaltingo hi Yeesu an hi tolig hi dɔglɛ. Ya̧a̧nɛ hi ɛrig an gi woo hinmɛksingoya gi zuun a tɛŋkɔ fu̧u̧z a Bɛt ge.

¹² Yeesu hol dubtɔnɔ, wɛɛ raa: a nɔ dood wɛrɛ hi waak ɔ̧ti gi zulɛ hi gib gɛrs hinmɛksingoya wark nɔ? Be raasin rɔbo: gɛrs za gbun taa an gi zu̧u̧niy a dood wɛrɛ hii.

¹³ Wɛɛ ɔɔhi hɔdi, kar lɛmb du rek a mɛmbal kasiŋ za.

¹⁴ Walɛsɛrɛ wɔ hi zɛn kokya̧ look zɛnɔ. Hi gin kok kiml gbun a lɛmb du.

¹⁵ Yeesu raahi anyɔ lɛ: a oonɛ, wa̧a̧n zul nɛ hi Farisaya wɔ hɛ̧ɛ̧tya̧ hi Waar Hirudus hɛ̧ɛ̧tɔ bɔ.

¹⁶ Walɛ-sɛrɛ wɔ hi watin hi tees du: a yɔ wɛ taan kok gɛ giya.

¹⁷ Yeesu yɔ mɛksɔ, wɛɛ ɛrihi: a nɔ nɛ watingo a yɔ nɛ taan kok gɛ gii nɔ? Nɛ́ wā̧ā̧ hinɔ kpoos du kɛn gɛ, nɛ́ mɛ̄ks hinɔ kɛn gɛ ya? Nɛ gin kpoos ɓaatili ya?

¹⁸ Nɛ gin lɔlɛ, nɛ́ gbɛ̄n gɛ ya? Nɛ gin tɔnɛ, nɛ́ kɛ̄ŋ gɛ ya?

¹⁹ Nɛ́ mɛ̄ks ɔ̧tyɔ be ɓɛls dood duk nɔɔn wɔ kok kiml nɔɔn wɔ gedu gɛ ya? Nɛ wɛɛn kok kiml ɓɛɛkil wɔ dɛl hi̧i̧sil baari nɔ? Hi ta̧a̧ge: a koobl daa eerɛ.

²⁰ Wɛɛ raahi: a yɔ be ɓɛls dood duk nas wɔ kok kiml nɔɔn-er wɔ, nɛ wɛɛn kok ɓɛɛkil wɔ dɛl hi̧i̧sil baari nɔ? Hi ta̧a̧: a nɔɔn-erɛ.

²¹ Hɔnɛ Yeesu wɛɛ warihi: a nɛ́ kɛ̄ms hinɔ gɛ tɛ̧ ya?

²² Hi zaa a Baytizaada. Dood hi kams Yeesu yɔ̧ɔ̧r za, hi zɔ̧ge an gi ki̧i̧ge.

²³ Yeesu wa̧a̧ yɔ̧ɔ̧r bɔ naan muulɛ, kaŋg a raa lako, tutsig set lɔl du, gbaa naan gi muulɛ, ɛrige: a mɔ gbɛnik hinza ya?

²⁴ Wal bɔ pɛɛ lɔlɔ raa: a be gbɛnik dood tii, be gihi gbɛnik an tɛ̧ɛ̧, hi wɛɛ hi ɛmbiko.

²⁵ Yeesu wɛɛ yaa naan gi lɔl du. Yɔ wal bɔ sɔ̧ɔ̧ lɔlɔ gbigi, lɔlɔ kpɛ̧ɛ̧rɔ, gi gbɛnik hin sɛw gaattɔnɔ.

²⁶ Yeesu yaag gi lɛlɛ, raage: a bɔmɔ wɛɛ a raa bɔ gedu.

²⁷ Yeesu hi walɛsɛrɛ ɔ̧ɔ̧ wɔ hi rek a raat zaadɛ du, a hɛbt za yɔ nuŋgɔ a Kaysariya-Filipi gedu. Yɔ hi gi gbɔnɔ di, Yeesu war walɛsɛrɛ ɔ̧ɔ̧ wɔ: a dood hi raak a bee bɔ?

²⁸ Hi googe: a zaadɛ hi raak a mɔɔ Yohana Bɛtmɛm Hotingoya bɔ, zaadɛ be, hi raak a mɔɔ Eliya; wɛɛ zaadɛ ɓɛ hi raak a mɔɔ gi Bɛtya̧a̧kɛŋkya amntɛ wɔ zaaɔ.

²⁹ Wɛɛ warihi: a nɛɛ be, nɛ raak a bee bɔ? Piyɛr gòòge: a mɔɔ Masihu bɔ.

³⁰ Gɔ ma Yeesu wɛɛ magihi gɔ an bɔhi raas doo za a bee gi Masihu bɔ.

³¹ Hɔnɛyɔ Yeesu yɛls walɛsɛrɛ ɔ̧ɔ̧ wɔ hingoko, raahi: a gi an Za̧a̧n Waa bɔ gi ha̧a̧ya̧a̧r gbɔɔltɔnɔ; ɗɛntɛ Bɛtlukya wɔ hi Bɛtmaakwookya gbɔlɛ wɔ, hi zaa hi Bɛtmaakdɔkya wɔ hi bisige. Hi gbɔŋge, wɛɛ kuudu ɔ̧t taarɛ gi rɛml a wɔrk du.

³² Gisihi raak hin bɔrɔ lab gaattɔnɔ. Piyɛr tɔrige yɛɛlig dɔ̧ɔ̧lik a hinyɔ dɔg anbɔ dɔŋgɔ.

³³ Hɔnɛ Yeesu wɛɛ zɛmr sɔ̧ɔ̧ walɛsɛrɛ ɔ̧ɔ̧ zaadɛ wɔ, wɛɛ dɔ̧ɔ̧l Piyɛr : a Saydanu, da mɔ rek hɔ, hɛmlum hi beya! Mɔ́ mɔ̄k hin an Bɛt gɛ, mɔ mɔkig an dood her.

³⁴ Kuudu elz dood saal wɔ hi walɛsɛrɛ ɔ̧ɔ̧ wɔ, wɛɛ raahi a za̧a̧n za gi ha̧a̧ge an gi fɔbzibe, gi in zulɔ, gi pɛɛ dɔ̧ɔ̧rɔ gi wɛɛ gi fɔbzibe.

³⁵ Ya̧a̧nɛ za̧a̧ni ha̧a̧g an gi za̧a̧s kolɔ, gi wagsige; za̧a̧nyɔ gɔ gi wags kolɔ a be dɔŋgo hi Dɔgl Rɔb bɔ gi dɔŋgo, gi za̧a̧sige.

³⁶ À za̧a̧n za dag waal sɛw, gi wɛɛ gi wags kolɔ, bɛn nɔ?

³⁷ Za̧a̧n za gi an gi gaa nɔ an kolɔ gi za̧a̧ nɔ?

³⁸ Dood wɔ hi waak ɔ̧ti gi zul hi ɔɔ Bɛt an nis yɔ gi naak mansi gi ɔɔ waltɔ, hi wɛɛ hi gɔk hinha̧a̧lɛ. Za̧a̧n za seem gi ha̧a̧g beya hi dɔgl be a dood wɛrɛ hi teesdu, Za̧a̧n Waa bɔ, gɔ gi zaa a Baatɔ gbɔlums du, hi Bɛt walɛsɛrɛ gaatɛ wɔ, gi ha̧a̧nig seem hɛw be.