MARKUS 16 - Nouveau Testament Doyayo

MARKUS 16

¹ Yɔ holum-ɔ̧t bɔ da̧a̧, Mariyama a Magdala hi Mari-yama Yakuba nɔɔtɔ, hi Salomɛ hi zeb kurum ki̧i̧l-hɛmntya an hi re hi gubs Yeesu muulɛ.

² Yɔ yoosig bi̧i̧ltɔnɔ, a dimaas ɔ̧t biitir bɔ gedu, yɔ ɔ̧t gi kazugo, hi rek a Yeesu loorlɛlɛ,

³ hi ɛtin gɔ hi tees du: a bɔ gi kiblsɛ bet bɔ a loorya̧a̧gbar nɔ?

⁴ Yɔ hi sɔ̧ɔ̧ anyɔ, hi gbɛn loorbet gbɔɔl fɛɛt bɔ kibl bɛrko.

⁵ Nɛɛd wɔ hi gul gɔ loor bɔ gedu, hi gbɛn walsɛr za gi ɗɔɔtig a naanrɔbo hi gban buu fɛr a gi muulɛ. Kol tuuhitu.

⁶ Hɔnɛ walsɛr bɔ raahi: a bɔ kol gi tuunɛ. Nɛ tɛk Yeesu Nazarɛdya bɔ dooy a dɔ̧ɔ̧r ha gii ya? Rɛml a wɔrk du ɗuundɔ, taa dihɛ. Sɔ̧ɔ̧nɛ, lɛl yɔ hi gbaag nɛ gɛrɛ.

⁷ Yɛrɛ rekin nɛ raas walɛsɛrɛ ɔ̧ɔ̧ wɔ hi Piyɛr hɛw a Yeesu rɛml ɗund gisin dork a Galile. Nɛ rek nɛ gbɛnig hɔ ro anyɔ da raasinɛ.

⁸ Nɛɛd wɔ hi tuu hi nɔɔ hi beeto; lɛl wilihi be. Yɔ hoobha̧a̧hi be, hí rāās doo hinza gɛ. [

⁹ Yɔ Yeesu rɛml gi ɗuk a dimaas ɔ̧t doos bɔ gedu bi̧i̧ltɔnɔ, yɛɛl mits Mariyama a Magdala, a dɔŋgɔ ro gi nin nɛ loorɛha̧a̧l nɔɔn-erɛ.

¹⁰ Mariyama a Magdala re fɔks wɔ hi gitin nɛ hi Yeesu , hi kaak be, hi hekig hi ya̧a̧rhant be.

¹¹ Hɔnɛyɔ dood wɔ hi lag hinyɔ nis bɔ fɔkɔ: a Yeesu ɗuk gi za̧a̧tilyɔ, be gbɛnige, hí ɗɔ̄bs nis bɔ dɔglɔ gɛ.

¹² Kuudu yɔ walɛsɛrɛ wɔ eer hi wa̧a̧k gbɔnɔ an hi rek a hɛt du Yeesu zunsihi muulɔ za dɔɔmi.

¹³ Walɛsɛrɛ eerɛ wɔ hi wɛɛ hi wɛɛz hi fɔks zaadɛ wɔ hinɔ. Wɔrɔ be hí ɗɔ̄bs dɔglya̧ bɔ hɛw gɛ.

¹⁴ Yɔ̧ɔ̧sumɔ, Yeesu mits walɛsɛrɛ ɔ̧ɔ̧ koobl daa gbun wɔ yɔ hi lek nɛ hinɛ. Biglihi anyɔ hi ta̧a̧ ɗɔbsig gɛ hi gin kpoos ɓaatil be. Dood wɔ hi gbɛnig nɛ rɛml a wɔrk du gi za̧a̧tili hi gisihi dɔglɔ booko, wɛɛ hii be, hi tā̧ā̧ nɛ gɛ.

¹⁵ Wɛɛ raahi: a rekin a waal du sɛw, nɛ dɔg Dɔgl Rɔb bɔ dɔglɔ a dood teesdu sɛw.

¹⁶ Za̧a̧nyɔ gɔ gi ɗɔbsɔ gi dag Bɛtmɛmɛ gi za̧a̧; za̧a̧nyɔ gɔ gí ɗɔbs gɛ, dɔgl gi matige.

¹⁷ Yɛrɛ gɛrs yɔ ɗɔbsigya wɔ gɔ hi zuun gɛrɛ: hi nin loorɛha̧a̧l a be nuŋg du; hi boo ya̧a̧boon segdɛ;

¹⁸ hi wa̧a̧ beks hi naanɛ; gid hi yɔ̧ ɗɔŋko, hinza taahi gɔk nɛ zaŋ; hi gbaa naanya̧ a gumtil wɔ hi muulɛ, gumtil wɔ hi za̧a̧.

¹⁹ Yɔ Waar Yeesu dɔgsihi hin bɔrɔ anbɔ, ha̧sa dɔɔ bɛtha, wɛɛ da ɗɔɔt a Bɛt naanrɔbo.

²⁰ Walɛsɛrɛ wɔ hi rek Dɔgl Rɔb bɔ dɔglɔ dɔk gɔ lɛl sɛw be. Waar Yeesu gi wook hi hiya, wɛɛ gis dood wɔ zuunik a walɛsɛrɛ wɔ hi dɔk dɔgl rɔbo hi gɛrs wɔ gisihi ɗaanuko. ]