MARKUS 15 - Nouveau Testament Doyayo

MARKUS 15

¹ Bɛtmaakwookya gbɔlɛ hi mɔks bi̧i̧ltɔnɔ hi Yahu-duya ɗɛntɛ wɔ, hi Bɛtmaakdɔkya wɔ, hi dɔglyɛ̧ɛ̧kya wɔ sɛw hi wɔ̀ kɔlki. Hi wɔb Yeesu hi kaŋg hi gaag waar Pilatu naan du.

² Pilatu ɛrig hinɛ: a mɔɔ gi Yahuduya wɔ waar ya̧ ya? Yeesu gòòge: a anyɔ mɔ raa.

³ Bɛtmaakwookya gbɔlɛ wɔ hi gɛ̧ɛ̧nig hin kittɔnɔ.

⁴ Yɔ anbɔ, Pilatu wɛɛ ɛrige: a mɔ taa hinza gook ya? Mɔ kɛŋk hin gɛ̧ɛ̧nik mɔ zulha kittɔnɔ be!

⁵ Yeesu wɛɛ gōō hinza ma zaŋ gɛ. Yɔ anbɔ hin wɛɛ wɛɛs Pilatu gɛrsɛ.

⁶ Yɔ Paska naab gɔ gi nɛko, waar Pilatu gɔ bis luknɔya zaa gbun yɔ dood gɔ hi ɛr an hi bisige.

⁷ Za̧a̧n za giro nuŋggɔ a Barabas gi luknɔ du hi dood zulɓaasigya zaadɛ wɔ hi gbɔm nɛ za̧a̧n za a gabs du be.

⁸ Dood saal hi dɔɔ a Pilatu ge hi ɛrig hinyɔ rɔ̧ɔ̧s wook hi hiya.

⁹ Pilatu goohi: a ha̧a̧n an be bitsin Waar Yahuduya bɔ ya?

¹⁰ Gii be mɛɛmɛ a Bɛtmaak-wookya gbɔlɛ wɔ hi gaabge naan du hi ka̧a̧syɔ.

¹¹ Wɛɛ, Bɛtmaakwookya gbɔlɛ wɔ hi sɔmb dood an hi ɛr Pilatu gi bitsihi Barabas a Yeesu kalɛ.

¹² Pilatu wɛɛ ɛr dood saal wɔ ɓɛ: a ha̧a̧n an be gɔs nɔ za̧a̧n bɔ nɛ gig elik a Waar Yahuduya nɔ?

¹³ Wɔrɔ hi ta̧a̧ge hi ya̧a̧ɓooki: a doomɔg a dɔ̧ɔ̧r ha!

¹⁴ Pilatu ɛrihi: a woo nɔ hin ha̧a̧lɔ nɔ? Hi wɛɛ hi ɓooya̧a̧ ha̧a̧ltɔnɔ ɓɛ: a doomɔg a dɔ̧ɔ̧r ha!

¹⁵ Yɔ Pilatu ha̧a̧g an gi gɔs saal wɔ kpoosya̧ gi harihi be tutsihi Barabas gɔ luknɔ du. Kuudu wɛɛ raa dooɗɔ hi lɛb Yeesu , wɛɛ gaahige hi kaŋg hi dooge.

¹⁶ Laaya wɔ hi loo Yeesu hi kaŋg gɔ a dɔgl-gbaak luk du a Pilatu raa du. Hi mɔks laaya zaadɛ wɔ hi zɛ̧ɛ̧r nɛ sɛw.

¹⁷ Hi heks Yeesu dimnaan hob muulɛ, hi haŋ kal kobsya hi heksig zulha an waar ums kalɛ.

¹⁸ Kuudu hi yɛɛlig booki ma: a be boomɔ, seko ya, Waar Yahuduya!

¹⁹ Hi wɛɛ hi gig lɛk zulha hi bɔ̧ɔ̧kkoki, hi tulsig set muulɛ, hi wɛɛ hi zagl hi hu̧u̧r di bɛttɔnɔ a gi muutdu.

²⁰ Yɔ hi kpɛ̧ɛ̧l Yeesu gi da̧a̧, hi hod dimnaan hob bɔ hi wɛɛ hi hegsig gbannɔ wɔ. Kuudu hi tuunig lakdi hi rek hi doog dɔ̧ɔ̧r ha.

²¹ Doo za Kirɛnɛya fu̧u̧z hɛt du nuŋgɔ a Simɔŋ, Iskan-darus hi Rufus baaya̧ giya gi daak ma dihɔ. Laaya wɔ hi gbɛnige hi wa̧a̧g hi fɛ̧ɛ̧g an gi pɛɛ Yeesu dɔ̧ɔ̧rɔ bɔ.

²² Hi kam Yeesu a lɛlyɔ gɔ hi el a Golgota ge, raakɔ a zullɛŋk lɛlɛ.

²³ Ha̧a̧hi an hi yɔ̧n Yeesu bumhob za yɔ hi ɔksin tɛ̧ɛ̧ mɔt zobtil nuŋgɔ a ɗaasɛrɛyɔ. Gii be ta̧a̧ yɔ̧k gɛ.

²⁴ Kuudu hi wa̧a̧ hi doog gɔ a dɔ̧ɔ̧r ha, hi wɛɛ hi gɛ̧ɛ̧tin gbandilɔ wɔ; gbandilɔ wɔ hi len subud an hi sɔ̧ɔ̧ za̧a̧nyɔ gɔ gi le gi dagɔ.

²⁵ Yɔ hi doog a dɔ̧ɔ̧r ha, ɔ̧t bɔ gi kusaal ɓaati.

²⁶ Hi bi̧i̧ hinyɔ hi wa̧a̧g dɔŋgɔ ge dɔglɔ anyɔ lɛ: a WAAR YAHUDU-YAYƆ.

²⁷ Hi doo luurɛ ha̧a̧l eerɛ a dɔ̧ɔ̧r zaadɛ ha a gi dɔŋdi, gbunu a gi naan rɔbo, zaa gbunu a gi naanyɛ̧li. [

²⁸ Hinyɔ Bɛt ɗɛɛrwol bɔ raa dɔglɔ wooyyɔ: a hi ɓɛrig a dood ha̧a̧lɛ tees du. ]

²⁹ Dood wɔ hi daak hɔdi gɔ hi nams zulya̧ hi niige, hi raage: a ɛ-u̧u̧! Mɔɔ Bɛtluk ɛ̧brikya bɔ, wɔŋkya bɔ ɔ̧t taarɛ,

³⁰ za̧a̧sum zul mɔ ma, sizum dɔ̧ɔ̧r bɔ hage!

³¹ Bɛtmaakwookya gbɔlɛ wɔ, hi Bɛtmaakdɔkya wɔ hi kpɛ̧ɛ̧l a hi tees du, hi raa an ya̧a̧ gbun bɔ: a za̧a̧s dood zaadɛ, yɛrɛ ɗɛ̄ɛ̄ an gi za̧a̧s zulɔ ma gɛ!

³² An Masihu bɔ, Israhilaya waar bɔ gi siz ɓɔri ma a dɔ̧ɔ̧r bɔ hage. Wɛ́ gbɛn ma anbɔ wɛ ɗɔbs gɔ ɓɔrɔ. Wɔ hi doohi a dɔ̧ɔ̧r za wɔ ha be hi gi Yeesu niik lab be.

³³ A lurk teesdu, lɛl wil a waal bɔ gedu sɛw, am tuur a naaba̧a̧n du.

³⁴ Yɔ ɔ̧t gi a naaba̧a̧n du, Yeesu ɓooya̧a̧ ha̧a̧ltɔnɔ raa: a Eloyi, Eloyi, laama sabaktani? Hinɔ raakɔ: a Bɛt be, Bɛt be, mɔ ɔɔb nɔ?

³⁵ Dood zaadɛ wɔ hi ginɛ di hí kɛm anbɔ, hi raa: a kɛn ma, gi elik Eliya ga!

³⁶ Zaaya̧ gbunu nɔɔ da looz bɔɔmɛ tɔ̧ɔ̧z mɛm haatil du zaa sa̧a̧ a bɔ̧ɔ̧kkok ha, gaag an gi yɔ̧.

³⁷ Hɔnɛ Yeesu wɛɛ ɓooya̧a̧ ha̧a̧ltɔnɔ, wɔr gɔ.

³⁸ Gbanɗil fɛɛt bɔ hi mal a Bɛtluk du taar teesdu der, yɛɛl taarik wɛɛha had wɛɛdisɛ.

³⁹ Laaya gbɔɔl Romaya bɔ gi nɛ erk a Yeesu muutdu, yɔ gbɛn Yeesu gi wɔr anbɔ, raa: a hinɔ rɔbo, wal yɛrɛ gi Bɛt waayɔ!

⁴⁰ Nɛɛd zaadɛ hi giro, hi seezig lɔl hɛmltɔnɔ be. A hi tees du Mariyama yɔ fu̧u̧z a Magdala, hi Mariyama wala bɔ Yakuba nɔɔtɔ hi Yozɛs hi Salomɛ hi giro.

⁴¹ Hii fɔbz nɛ Yeesu yɔ da gi nɛ a Galile, hii gaag nɛ leesɛ. Nɛɛd zaadɛ kit wɔ hi dɔɔtin nɛ hi Yeesu a Urusalima hi gi nɛ di hɛw.

⁴² Yɔ ɔ̧t legɔ, yɔ gi nɛ a naabwɔd gɛbsig ɔ̧ti, raakɔ a yɔ Yahuduya wɔ holum-ɔ̧tya̧ gi sɛ̧ɛ̧biko,

⁴³ Yusufu a Arimate, doo ɗɛnt rɔb a dɔgl-gbɛɛrikyaadɛ tees du, zaa. Gii ginɛ ook Bɛt wáátɔ be. Ɓaas kpoosɔ rek a Waar Pilatu ge, ɛrig Yeesu muulɔ bɔ an gi re gi i̧i̧ loor du.

⁴⁴ Hɔnɛyɔ Pilatu lag a Yeesu wɔɔr be, hin wɛɛsig gɛrsɛ, elz laaya wɔ gbɔɔlya̧ bɔ, ɛrige: a wɔr aam ya?

⁴⁵ Yɔ lag hinyɔ laaya gbɔɔl bɔ raasige, gaa Yusufu Yeesu muulɔ bɔ.

⁴⁶ Yusufu zebz gban buu rɔbo, re sis Yeesu wɔrkɔ bɔ a dɔ̧ɔ̧r bɔ hage, wɔbtig a gban buu bɔ gedu, kam da i̧i̧g a loor yɔ hi su̧u̧ a hɛɛl du gedu. Wɛɛ kibl bet gbɔɔl fɛɛti mibtin loor bɔ ya̧a̧gbarɔ.

⁴⁷ Mariyama a Magdala hi Mariyama Yozɛs nɔɔtɔ hi sɔ̧ɔ̧ lɛl yɔ hi i̧i̧k Yeesu wɔrkɔ bɔ.