MARKUS 12 - Nouveau Testament Doyayo

MARKUS 12

¹ Yeesu wɛɛ yɛlsihi ya̧a̧book hi ya̧a̧daaniki. A wal za rɛɛ tɛ̧ɛ̧ humlɛ kittɔnɔ wɛɛ gɔ̧ɔ̧n rɔkili. Wɛɛ su̧u̧ suknààli an gɔ gi ɓɔ̧ɔ̧ tɛ̧ɛ̧ huml wɔ mɛkɔ du. Wɛɛ rɛɛ ooko waar in balkya wɔ tɛ̧ɛ̧ humlɛ wɔ naan du da rek rɔbsi.

² Yɔ huml wɔ hi ɔ̧ɔ̧ ha̧kɔ gi rii, yaaz woosya za a bak-ookya wɔ hi an hi ha̧bsig huml wɔ ɔnɛ hi yaasige.

³ Hɔnɛ balkya wɔ hi wa̧a̧ gbaar bɔ hi lɛge, hi yaag naan ɗɛndilɛ.

⁴ Wal bɔ wɛɛ yaasihi gbaar za dɔɔmi; hi lɛge hi gaag nɔk a zulha, hi wɛɛ hi niige hi ɔɔg rekɔ.

⁵ Wɛɛ yaaz zaa ɓɛ, bɔrɔ ɔnɛ hi wa̧a̧ hi gbɔŋge. Hi gɔs gbaarɛ zaadɛ kit wɔ hin gbuna bɔ: hi lɛb zaadɛ be, hi gbɔm zaadɛ be.

⁶ Zɛ̧rs wal bɔ doo gbun kpɔd: waaɔ gbunsum bɔ ha̧a̧g gi muul giya. Yɔ̧ɔ̧sumɔ, wɛɛ yaa waa wal bɔ a hii, raa: a yɛrɛ hi ɗɔbs waa be yɛrɛ ɔnɛ.

⁷ Hɔnɛ balkya wɔ hi gbɛnig zaako hi raatinu: a yɛrɛ gii rɔɔsyɛrkya, zaan wɛ wa̧a̧ge wɛ gbɔŋge, rɔɔs bɔ gi wɛɛ wɛɛnɛ.

⁸ Hi wa̧a̧ge hi gbɔŋge, hi wɛɛ hi bisig a bak bɔ lakɔ ge.

⁹ Za̧a̧n tɛ̧ɛ̧bakya bɔ yɔ gɔ nɔ? Yɔ zaa yɔ gbɔm balkya wɔ, yɔ wɛɛ yɔ gaa dood zaadɛ tɛ̧ɛ̧ humlɛ wɔ.

¹⁰ Nɛ́ zaŋg dɔgl yɛrɛ hi bi̧i̧ a Bɛt ɗɛɛrwol du: a bet yɔ lukwɔŋkya wɔ hi bisige gii wɛɛ bet gbɔɔl tɛŋkya gɛ ya?

¹¹ Waar Bɛt gii woo hinɔ anbɔ; yɔ wɛ gbɛn lɔl du gisɛ wɛnɛ gɛrsɛ.

¹² Hi tɛ gbɔnɔ an hi wa̧a̧ Yeesu , wɛɛ hoobha̧a̧hi saal wɔ be, anyɔ hi mɛɛ a raan hii ya̧a̧daanik bɔrɔ anbɔ. Hi ɔɔge hi wɛɛ hi rekɔ.

¹³ Hi yaaz Farisaya wɔ hi waar Hirudus doodɔ zaadɛ an hi ton Yeesu hi hin-ɛrki a dɔgl yɔ gi book hage.

¹⁴ Hi zaa hi warige: a Hingokya , wi mɛɛ a mɔ raak hin hi rɔbo, hoob-hā̧ā̧mɔ doo za gɛ, yɔ anbɔ mɔ́ sɔ̧̄ɔ̧̄ dood a muut du kpɔd gɛ, mɔ wɛɛ mɔ gok Bɛt gbɔnɔ ɔnɛ hi rɔbo. Gbɔnɔ gi an hi toos waar gbɔɔl Romaya Kaysara toos ya? Taa lab ya? Gi an wi too ya, taa an wi too ya?

¹⁵ Yeesu yɔ mɛɛ ya̧a̧gɔ̧ɔ̧nya̧, raahi: a nɔ nɛ gib tolik hi dɔglɛ? Kamsib tus gaat gbunu be see.

¹⁶ Hi kamsig tus gaat gbun bɔ. Yeesu wɛɛ warihi: a bɔ muut yɛrɛ hi nuŋg yɛrɛ du nɔ? Hi ta̧a̧ge: a Kaysara ɔ̧ɔ̧nɛ.

¹⁷ Yeesu wɛɛ raahi: a wɛɛnsin Kaysara hinyɔ gin a ge, wɛɛ nɛ wɛɛns Bɛt hinyɔ gin be. Yɔ anbɔ hinɔ yɔ goo kɔmsihi gɛrsɛ.

¹⁸ Sadukiya wɔ gɔ hi raak a wɔrkɛ hi taa zaa rɛmluko. Zaadɛya̧ hi zaa Yeesu ge,

¹⁹ hi ɛrige: a Hingokya , Muusa gaawɛ dɔgl za bi̧i̧ki: a doo za gi gin hindaɔ, hindaɔ bɔ gi wɔrɔ gi ɔɔ nisɛ, waa gi taaro, gi an yɛ̧ɛ̧tɔ bɔ gi wɛɛ gi loo nis bɔ an gi dag waat elo a hindaɔ wɔrk bɔ ɔnɛ kalɛ.

²⁰ Yɛ̧ɛ̧dɛ walɛ hi gi nɔɔn-erɛ, gbɔɔl bɔ yɛɛl loo nis bɔ, wɔrɔ ɔ̄ɔ̄ waat gɛ.

²¹ Eesum bɔ yɛr kuur bɔ, wɛɛ wɔrɔ ɔ̄ɔ̄ waat gɛ. Hin gbun bɔ gii tuur a taasum bɔ ge,

²² wɛɛ tuur a zaadɛ wɔ hi sɛw, hi nɔɔn-er sɛw hi wɔrɔ, hí ɔ̄ɔ̄ waat gɛ. A hi kuudu sɛw nis bɔ wɔr gɔ be.

²³ Gɔ gi rɛmtig ɔ̧ti, wɔrkɛ wɔ gɔ hí wɛɛz a za̧a̧tig du rɛ, nis bɔ gi gi bɔ ɔnɛ gbun nɔ, anyɔ walɛ nɔɔn-er wɔ hi lootin hi nis gbuna bɔ sɛw?

²⁴ Yeesu ta̧a̧ raahi: a anyɔ nɛ mɛɛ hinyɔ Bɛt ɗɛɛrwolɔ raa hi Bɛt tɛŋkɔ gɛ, nɛ́ nɛ hɛɛ gbɔnɔ ma mi!

²⁵ Wɔrkɛ wɔ gɔ hi ɗunz a wɔrk du hi taa lootingo. Hí gi an Bɛt walɛsɛrɛ wɔ bɛtha.

²⁶ Nɛ́ zaŋg wɔrkɛ dɔgl hi rɛmtig dɔgl a ɗɛɛrwol yɔ Muusa bi̧i̧ a dɔgl lɛlyɔ gi book tɛ̧ɛ̧ kuusa kobsya dɔglɔ gedu gɛ ya? Bɛt raa Muusa: a be gi Abraham hi Isaaku hi Yakuba Bɛt ya̧a̧nɛ.

²⁷ Yɔ anbɔ wɔrkɛ wɔrɔ ya̧nɛ hi taa wɔrkɛ a Bɛt muut du: hi gi za̧a̧tilyɔ. Yɔ anbɔ nɛ matig zul nɛɛn ha̧a̧ltɔnɔ zaŋ.

²⁸ Bɛtmaakdɔkya wɔ zaaya̧ gbun yɔ kɛ́m nɛ Yeesu hi watingo hinza hi Sadukiya wɔ, yɔ gbɛ̄n Yeesu gōos Sadukiya wɔ hin bɛttɔnɔ, sɔɔ gi dɔŋdi ɛrige: a Waar i, a Bɛt maakdɔgl zaadɛ du sɛw, dɔgl gbɔɔl yɔ daarlɛl gɛ́ nɔni?

²⁹ Yeesu googe: a maakdɔgl gbɔɔl yɔ daarlɛl gɛrɛ: a kɛnɛ, dood Israhilaya wɛ, Waar wɛ Bɛt gii gi Waar wɛ gbun kpɔd.

³⁰ Gi an gi ha̧a̧mɔ Waar mɔ Bɛto hi kpoos mɔ sɛw, hi kol mɔ sɛw, hi mɔkil mɔ sɛw, wɛɛ hi tɛŋk mɔ sɛw.

³¹ Maakdɔgl eesim bɔ gɛrɛ: a yɛ gi ha̧a̧mɔ namɔza an zul mɔ. Bɛt maakdɔgl gbɔlɛ zaadɛ taaro, gɛ eerɛ wɔrɔ bɔ.

³² Bɛtmaakdɔkya bɔ raage: a bɛrdi! Hingokya , hinwɔ mɔ dɔg bɔ rɔbo: Waar gɛ Bɛt gi gbunu, wɛɛ Bɛt za dɔɔm taaro, gɛ giya.

³³ Doo gi ha̧a̧g Bɛt hi kpoosɔ sɛw, hi mɔkilɔ sɛw, hi tɛŋkɔ sɛw, gi wɛɛ gi ha̧a̧g naaza an zulɔ. Hin wɛrɛ gɔkɔ tɔɔ daar namnɔɔmik yɔ sɛŋk ha an gɔ hi gaa Bɛt gaas hi gaas zaadɛ dɔɔmɛ wɔ gɔ hi gaak sɛw daarɔ.

³⁴ Yɔ Yeesu gbɛn wal bɔ ta̧a̧ hi gbɔnɔ, wɛɛ raage: a mɔ́ hɛml hi Bɛt wáátɔ gɛ. Yɔ kuudu anbɔ doo za mɔ̄k an gi ɛrig hinza ma gɛ, hoobha̧a̧hiha̧.

³⁵ Yɔ Yeesu gi gokhin a Bɛtluk du, ɛr hinɛ: a Bɛtmaak-dɔkya wɔ hi ɗɛɛ raakɔ ri a Masihu bɔ gi Waar Dawda waawal gii nɔ?

³⁶ Dawda hi zulɔ dɔg anyɔ Bɛt Mɔkilɔ raage: a Waar Bɛt raa Waar be: a ɗɔɔtum be naanrɔbo, gi tuur an be gbàà yɔ̧lhɛ̧ɛ̧nikya mɔ wɔ hi wɛɛ dɔɔ mɔ ɗa̧a̧klɛlɛ.

³⁷ Dawda hi zulɔ gig elik a Waar be, Masihu bɔ gi Dawda waawal ri ma nɔ?

³⁸ Saal kittɔnɔ hi kɛmsig Yeesu hi hato. Raahi a hingokɔ bɔ gedu: a oon zul nɛ hi Bɛtmaakdɔkya wɔ hā̧ā̧hi gbandil gbɔlɛ zi̧i̧dɛ ɛmbingo, wɔ hā̧ā̧hi an hi boohi a luum lɛlyɔ gi ge.

³⁹ Ha̧a̧hi ɗɔɔtillɛl yɔ hɔɔ gi daarlɛl a mɔksilluk du, hi lɛl hɔɔt a naab lɛl du.

⁴⁰ Hi lek kuurɛ nɛɛd wɔ wɔdya̧, hi wɔɔlik raatya̧, hi wɛɛ hi zɔ̧k Bɛt zi̧i̧tɔnɔ an dood zaadɛ hi sɔ̧ɔ̧hi an dood rɔbɛ. Ya̧nɛ hí gbaasihi dɔgl gi daarlɛl gbɔɔltɔnɔ.

⁴¹ Yeesu ɗɔɔt a tusyaaklɛl bɔ dɔŋgɔdi a Bɛtluk du, wɛɛ gi sɔ̧ɔ̧k dood wɔ hi yaak ma tusɛ. Dood rɔɔsya kittɔnɔ hi yaak tus gbɔɔltɔnɔ a tusyaaklɛl bɔ gedu.

⁴² Kuur za ya̧a̧rya-waa zaa yaa tus dɛɛt eerɛ, fɛŋwaanɔ.

⁴³ Yɔ anbɔ Yeesu elz walɛsɛrɛ ɔ̧ɔ̧ wɔ raahi: a be raasin hi rɔbo, kuur ya̧a̧ryawaa yɛrɛ yàà tus bɔ daar dood zaadɛ wɔ daarɔ.

⁴⁴ Dood zaadɛ wɔ sɛw hi ɓeg tus kaasi kaasi a hi rɔɔs du hi yaako. Yɛrɛ gii be, hinyɔ gin nɛ an gi len zulɔ, yàà gii a gi ya̧a̧rums kalɛ.