EFESU 4 - Nouveau Testament Doyayo

EFESU 4

¹ Yɛrɛ miya, mi luknɔyayɔ anyɔ mi fɔk Waar wɛ Yeesu. Mi raasin a ri ya? Ɛmbin rɔbtɔnɔ anyɔ bɛr a ɛmbil yɔ Bɛt elin nɛ an nɛ ɛmb gedu.

² Hɔnsin zul nɛ hi kpoos nɛ saŋkti, hi hinmɔŋki, mɔmtinnɛ hin a hat du.

³ I̧i̧n tɛŋk nɛ an nɛ gbaa Bɛt Mɔkilɔ ɔksig bɔ a boolum yɔ ɔksin gedu.

⁴ Yeesu Kristu fɔkya ɔksilya̧ gi an muulɔ, muulɔ gi gbun kpɔd. Bɛt Mɔkilɔ gi Mɔkil gbun kpɔd. Hinyɔ Bɛt elinwɛ an wɛ gbaa kpoos hage gi hin gbun kpɔd.

⁵ Waar wɛ gbɔɔl gi gbun kpɔd gɛ Yeesu. Ɗɔbsig wɛ gbun kpɔd. Wɛ dag Bɛtmɛm gbun kpɔd.

⁶ Bɛt wɛ gbunu, gi Baa wɛ gbunu, gi wɛ zulha sɛw, gi wɛ tees du sɛw hi a wɛ kpoos du sɛw.

⁷ Yɛrɛ an bɔ nɛ a wɛ teesdu sɛw, dag Bɛt gɛmsil anyɔ Kristu gaasɔ goo.

⁸ Anyɔ Bɛt ɗɛɛrwol raa a yɔ kar a wɛɛha, kam zɛnɛ wɔ kablihi gabs du, gaa dood gaas kittɔnɔ.

⁹ (Yɛrɛ nɔ raakɔ a kàar bɛtha? Nɛ raakɔ a yɛɛl siil ma a hɛbtlɛl wɔ wɛɛdis gedu kete, ɓɔr gi ɔɔ kark bɛtha ma mi?

¹⁰ Za̧a̧n bɔ silɔ, za̧a̧n gbuna bɔ gii wɛɛ gi kar a bɛt wɛɛha sɛw an gi yɔ̧ɔ̧s hinyɔ gi lɛl sɛw. )

¹¹ Wɛɛ gaa dood zaadɛ woosya̧ an tɔmsyaadɛ, zaadɛ be woosya̧ an Bɛtya̧a̧kɛŋkyaadɛ, zaadɛ an Bɛtdɔgl ɛmbinko-yaadɛ, zaadɛ an Bɛt doodɔ ookyaadɛ hi gok hinɛ.

¹² Woo anbɔ an gi gɛms dood wɔ hi gi Bɛt ɔ̧nɛ hi woosigwoosɔ, hi tɔɔs Kristu muulɔ a ɗɔbsig du,

¹³ gi tuur an wɛ sɛw wɛ ɔks gbunu a ɗɔbsig gbun du hi a mɛɛk yɔ wɛ mɛɛ Bɛt waaɔ gedu. Wɛ wɛɛ doo ɓati, wɛɛ, Kristu kpoosɔ hi gbɔlumsɔ sɛw gi tɔɔ wɛ kpoos du gi da̧a̧.

¹⁴ Gɔ gi anbɔ, wɛ́ ɔɔ ya̧a̧m dɔglɔ ɔɔ ma an bɔ dood hingok gaŋsɛgaŋsɛ hi namsɛ zaa an mɛmɗukil wɔ hi zɛk wɔ gɔ hi namsig lɛmbo gi rek hɛ hi hɛ. Wɛɛ, an bɔwɛ fɔb hingokya ya̧a̧gɔ̧ɔ̧nya wɔ gɔ hi maatig dood hi kɛ̧ɛ̧tigya̧ hi maatilya̧ ha̧a̧l wɔ hi midil an hi waksihi gbɔnɔ.

¹⁵ Hɔnɛyɔ anbɔ, wɛ́ gi dɔk rɔbo anyɔ hat gisɛ goko, wɛ́ tɔɔk gɔ a hinyɔ gi gedu sɛw a ɔksil wɛ bɔ gedu hi zulya wɛ Kristu.

¹⁶ Muul bɔ sɛw dag tɛŋk a zul bɔ ge, wɛɛ dɔ̧ksillɛlɔ wɔ sɛw hi ɗaasig muul bɔ hi gig ɔksugo. Muul dɛɛt wɔ sɛw hi wook woosya̧ anyɔ bɛrɔ. Yɔ anbɔ, muul bɔ sɛw gi tɔɔko, wɛɛ gi tɛŋk gaatingo a hat du.

¹⁷ Hinyɔ mi raako hi hinyɔ mi dɔk a Kristu nuŋg du gɛrɛ: bɔnɛ ɛmb an dood wɔ hi mɛɛ Bɛt gɛ hi ɛmbik anyɔ mɔkilya̧ tɔs wɔ kpoos du gihi wagsugo.

¹⁸ Hinmɛɛkya̧ zul du wilɔ. Anyɔ zulya̧ ɓaa hi mɛ̄ɛ̄ Bɛt gɛ, hi gɛ̧ɛ̧ytin hi za̧a̧tig yɔ Bɛt gi gaako.

¹⁹ Anyɔ hi taan mɔkil a kpoos du gɛ, hi gaa zulya̧ a zɛlk du an hi woo ɓi̧i̧lim yɔ gi sɛw hi ɗɔkumi.

²⁰ Nɛnɛ hí gōksin Kristu dɔglɔ anbɔ gɛ.

²¹ Nɛ kɛm dɔglɔ bɔ hi dɔgsin hi rɔ́b kɛm ma, hi wɛɛ hi goksin rɔb bɔ dɔglɔ gi a ɔksil bɔ gedu hi Yeesu.

²² Nɛ mɛɛ a hinyɔ gi seek waabil yɔ nɛ waak amntɔnɔ, nɛ hod doo amnt bɔ hodɔ. Ɗɔkum ha̧a̧l wɔ hi gi ha̧tirgo dooɔ, wɛɛ gig gbɔŋko.

²³ Bɛt wɛɛ wɛɛn kpoos nɛ hi mɔkil nɛ sego,

²⁴ heks muul nɛ bɔ doo seg bɔ kimɔ gi riitin hi giya an nɛ woo hinyɔ rii, a gaatig du hi a rɔb du.

²⁵ Yɔ anbɔ, anyɔ nɛ ha̧s zul nɛ a ya̧a̧gɔ̧ɔ̧n bɔ gedu, ɔɔn ya̧a̧gɔ̧ɔ̧nɛ, bootinnɛ rɔbo, ya̧a̧nɛ wɛ sɛw wɛ ɔks muul gbunu a Kristu muulɛ.

²⁶ Gid hinnɔɔnɛ, bɔnɛ gɔ hinha̧a̧lɛ, bɔ ɔ̧t gi legin a nɛ nɔɔtig ha,

²⁷ an bɔnɛ gaa loorɛha̧a̧l gbɔnɔ gi maatinɛ.

²⁸ Bɔ doo gi looluur zaa ma, bɛr an gi woowoos rɔb hi naanɔ gi dagɔ gi gaa ya̧a̧rya.

²⁹ Bɔ ya̧a̧ha̧a̧l gi tuu nɛ ya̧a̧ du nɛ zaŋ, dɔgin hinrɔb yɔ gɔ gi ɗaas dood zaadɛ wɔ a hi ɗɔbsig du anyɔ bɛrɔ, hi an gi gàà dood wɔ hi lak dɔglɔ gɛmsili.

³⁰ Bɔnɛ gɔk an Bɛt Mɔkil kpoosɔ gi ɗɔbɔ, Mɔkilɔ bɔ bi̧i̧ nuŋgɔ nɛ muutdu an Bɛt gi mɛɛnin a za̧a̧tig ɔ̧ti.

³¹ Àn mɔkil zobtil sɛw, nɔɔtig sɛw, gabs sɛw, ya̧a̧ɓolti, ya̧a̧ha̧a̧lɛ hi ha̧a̧l yɔ gi sɛw, hinya̧ wagihi a nɛ tees du.

³² Bɛtinnɛ, kpoos nɛ yɛgi hɔ̧nɔ, bɔbe gi bits naaza hinyɔ gɔsig gi bɛsig gɛ dɔglɔ anyɔ Bɛt bitsin hinha̧a̧l nɛ gi da̧a̧ a Kristu dɔŋgo.