TƆMSYAADƐ WOOSƐ 28 - Nouveau Testament Doyayo

TƆMSYAADƐ WOOSƐ 28

¹ Yɔ wi tuur hɛbt lɛl bɔ mɛm rɔg rɔbtɔnɔ ge hinza gi gɔw gɛ, wi kɛm a hɛbt bɔ nuŋgɔ a Malita.

² Dood Malitiya wɔ hi dagiw rɔbtɔnɔ wi sɛw. Bɛl gi naŋk be, saŋks gi saŋk ha̧a̧ltɔnɔ be, yɔ anbɔ hi tɔnsuw laa wi tɛɛ.

³ Pol za̧bz ma rɛnthas gi yaak laa du. Kpolum gi du be. Yaala laa sa̧a̧ kpolum bɔ tuuz rɛnthas bɔ gedu karig naanmuulɛ torige.

⁴ Yɔ dood Malitiya wɔ hi gbɛn kpolum bɔ gi wiiy a Pol naanmuulɛ, hi watinu: a wal yɛrɛ zulgbɔŋkyayɔ, an za̧a̧z nɛ mɛm du si̧, zɔr dɔgl-gbaak a bɛtha an gi za̧a̧ gɛ.

⁵ Hɔnɛ Pol waat beks bɔ mɛɛ laa du kɛm kosgumn gɛ.

⁶ Hi ook ma an naanɔ gi holɔ, zaabe an gi mat gi wɔr ɓɔrbɔ. Hɔnɛ yɔ hi oo lɛl gi am hi gbɛn hinza gɔg gɛ be, hi wɛɛ hi zɛmr mɔkilya̧ hi dɔg a gi bɛt hɛbtumyɔ.

⁷ A lɛlza bɔ dɔŋgɔ di hɛbt bɔ mɛm rɔge zulɔya bɔ nuŋgɔ a Publiyus gin bakɔ zaadɛ hi sɛ̧ɛ̧b a lɛlyɔ wi gi nɛ dige. Publiyus sisuw rɔbtɔnɔ wi naa ɔ̧t wi taarɛ.

⁸ Baatɔ zullaan gig gɔk be, hin gig guŋk buudu ha̧a̧ltɔnɔ be gi kusig gi leeso ha. Yɔ Pol lag anbɔ rek sɔ̧ɔ̧ge zɔ̧bsig Bɛto, wɛɛ gbaasig naan muulɛ za̧a̧sige.

⁹ Yɔ anbɔ gumtil zaadɛ wɔ hi waak a hɛbt lɛl bɔ mɛm rɔg ge hi lagɔ hi zaa a ge hɛw hi za̧a̧ be.

¹⁰ Hi gaaw gaas kittɔnɔ hi wɛɛ hi baaniw gbɔɔltɔnɔ, hi gbɔnɔ sɔmsɔm, yɔ wi kazig a lɛmb du, hi gaaw hinyɔ ha̧a̧w sɛw hi gbaasiw a lɛmb du.

¹¹ Wi waaz nɛ sɛɛ taarɛ a Malita wi ɔɔ kazig a lɛmb du. Lɛmb bɔ wi kar gedu nuŋgɔ a Bɛt-Hɛbtum-Kumbilyɔ, fu̧u̧z a Iskandariya, zɛrk dubt daag a hɛbtlɛl bɔ mɛm rɔg ge.

¹² Yɔ wi tuur a Sirakus wi sil wi gɔ ɔ̧t taarɛ a hɔ.

¹³ Yɔ wi ɗun dihɔ wi rek doos wi tuur a Regiyus. Yoosugɔ zɛk yɛɛl fɛk a ɔ̧tkazig-naanyɛ̧li. Wi wɛɛ wi gɔ ɔ̧t eerɛ wi tuur gɔ a Potiyoli.

¹⁴ Wi zɛm Yeesu fɔkya wɔ hɔ hi zɔ̧wi an wi gɔ ɔ̧t nɔɔn-er hi hiya, kuudu wi wa̧a̧ gbɔnɔ gɔ ma an wi rek a Roma.

¹⁵ Yɔ yɛ̧ɛ̧dɛ Bɛtfɔkya wɔ a Roma hi lag rams wi, hi ɔɔ Roma hi zaa hi tuur a Apiyus Luumha hi a Rɔbɛ Luk Lɛl Taarɛ wɔ hi an hi dagiwi. Yɔ Pol gbɛnihi anbɔ baan Bɛto wɛɛ dag hato muulɔ ɓaa gɔ ma ɓɔrɔ.

¹⁶ Yɔ wi gul a Roma hi gaa Pol gbɔnɔ an gi ɗɔɔt gi gbunu laya gbun gi ooge an bɔgi wirɔ.

¹⁷ Kuudu yɔ ɔ̧t taar talɔ, Pol elz Yahuduya wɔ gbɔlɛya̧ wɔ hi mɔksɔ. Yɔ hi mɔksɔ raahi: a yɛ̧ɛ̧dɛ be wɛ, an be gɔ̄ hin-a̧a̧b a yɛ̧ɛ̧dɛ wɛ hi zulha gɛ, hi a baa wɛ hi maakya̧ ha gɛ si̧, hi yaab luknɔ du a Urusalima, hi ka̧be hi gaab a Romaya wɔ hi naan du.

¹⁸ Yɔ hi watib hin gi da̧a̧ hi zɛm hin-a̧a̧b a beege an hi gbɔ̧b gɛ, ha̧a̧hi an hi bisibe.

¹⁹ Nɛ anyɔ Yahuduya wɔ hi ta̧a̧ gɛ, be woo nɔ? Gɛ be war an waar gbɔɔl Romaya bɔ Kaysara gii gi gbɛɛrsib dɔgl be. Wɛɛ be taan nɛ dɔgl yɔ an gɔ be gɛ̧ɛ̧n dood be hii be.

²⁰ Ya̧a̧nɛ be elzinɛ nɛ zaa an be gbɛntin hi nɛɛ wɛ watin hinɛ. Ba̧a̧ntus yɛrɛ gi be muulɛ a Za̧a̧nyɔ Isra-hilaya wɔ hi mɔk dɔglɔ gi dɔŋgo.

²¹ Wɔrɔ hi ta̧a̧ hi raage: a wi dāg ɗɛɛrwol za yɔ fu̧u̧z a Yahuduya an wi lag hinyɔ gi daak mɔ zulha gɛ. Wɛɛ yɛ̧ɛ̧ wi za zāā an gi dɔgsuw dɔgl mɔ gɛ, zaabe an gi dɔg ya̧a̧ha̧a̧l a mɔ zulha gɛ.

²² Yɛrɛ ha̧a̧wi an wi kɛmsim mɔkil mɔ wɔ. Wi mɛɛ a gbɔnɔ gɛ̧ksil bɔrɔ, dood waal du sɛw hi dɔk a gbɔnɔ a̧a̧byɔ.

²³ Yɔ anbɔ hi dɛ̧ɛ̧tin ɔ̧t gɔ hi Pol an hi dagtinu. Yɔ ɔ̧tɔ rii, dood kittɔnɔ hi zaa hi mɔks gɔ a lɛlyɔ Pol gi waak ge. Yɛɛl bi̧i̧l du tuur lɛɛsig du, Pol gisihi dɔglɔ goko gisihi Bɛt wáát dɔglɔ dɔko. Wɛɛ gi tɛk gbɔnɔ an hi ta̧a̧ Yeesu dɔglɔ be. Zaŋgin lɛl zaadɛ sɔmsɔm a Muusa ɗɛɛrwolyɔ bi̧i̧ gi ɔɔ duge, wɛɛ zaŋgin lɛl zaadɛ a Bɛtya̧a̧kɛŋkya ɗɛɛrwol wɔ hi bi̧i̧ gedu sɛw an gi zunsinihi Yeesu dɔglɔ.

²⁴ Dood zaadɛ hi ta̧a̧ hinyɔ gi raak be, zaadɛ be hi ɗɔbs gɛ be.

²⁵ Yɔ dood wɔ hi wɛɛko hi hin faltingo nɔɔha a hinyɔ Pol gi dɔk geha, Pol raa a Bɛt Mɔkilɔ gin rɔbo yɔ booya̧a̧ hi Bɛtya̧a̧kɛŋkya bɔ Esaya ya̧a̧ du a baa nɛ hi dɔŋgo:

²⁶ a rekum mɔ dɔgs dood wɛrɛ a nɛ lako wɛɛ nɛ kɛŋ gɛ, nɛ seeko wɛɛ nɛ gbɛn gɛ.

²⁷ Ya̧a̧nɛ dood wɛrɛ kpoosya̧ ɓaaɓa. Hi zug tɔnya̧ be, hi ims yɔ̧lya̧ be, an bɔ yɔ̧lya̧ gi gbɛn hinɛ, an bɔ tɔnya̧ gi lag hinɛ an bɔ mɔkilya̧ gi mɛɛ hinɛ, an bɔhi zɛmr kpoosya̧ hi zaa beege an be za̧a̧sihi.

²⁸ Pol wɛɛ dɔgsihi a yɛrɛ mɛɛn ma a Bɛt za̧a̧tigɔ yɔ yaazɔ tuur ma a dood dɔɔmɛ wɔ hi teesdu, ya̧nɛ hí kɛmɔ. [

²⁹ Yɔ dɔg anbɔ Yahuduya wɔ hi ɗund hi reko hi hin faltingo hi teesdu hi tɛŋko. ]

³⁰ Pol waa a luk bɔ loo gi took gedu wɛl eerɛ. Za̧a̧nyɔ gɔ zaa ge an gi booge gig dak hi hato.

³¹ Gis dood Bɛt wáátɔ dɔgl dɔko wɛɛ gisihi Waar Yeesu Kristu dɔglɔ gok be, hoobha̧a̧g hinza gɛ, gi book hinyɔ ha̧a̧g sɛw, doo za a̧a̧nig gɛ. Anbɔ.