TƆMSYAADƐ WOOSƐ 25 - Nouveau Testament Doyayo

TƆMSYAADƐ WOOSƐ 25

¹ Yɔ Waar seg bɔ Fɛstus tuur a hɛbt bɔ gedu, kuudu ɔ̧t taarɛ wɛɛ ɗuk a Kaysariya rek a Urusalima.

² Yɔ gi hɔ Bɛtmaakwookya gbɔlɛ wɔ hi Yahuduya ɗɛntɛ gbɔlɛ wɔ hi gɛ̧ɛ̧n Pol hinɛ.

³ Hi zɔ̧b Fɛstus an gi gɔ an kpoosya̧ gi harihi gi raa doodɔ hi kam Pol a Urusalima, hii be, hi rek hi kɛtig gbɔnɔ di hi gbɔŋge.

⁴ Fɛstus goo: a laaya hi ook Pol a Kaysariya, gɔ gi kaasi bee be wɛɛk hɔ hɛw.

⁵ An dood nɛ gbɔlɛ wɔ hi retin hi bee a hɔ, gid wal bɔ gɔ hinza a̧a̧bi hi re hi gɛ̧ɛ̧nig hinɔ hɔ ma.

⁶ Fɛstus ɗɔɔt am hɔ an ɔ̧t gɛ̧ɛ̧sɛ zaabe kooblɛ wɛɛ wɛɛ gɔ a Kaysariya. Yoosugɔ re gul ɗɔɔt a dɔglyɛ̧ɛ̧k luk du raa hí looz Pol hi kamzige.

⁷ Yɔ hi kamzige, Yahuduya wɔ hi tiiz a Urusalima hi rɔge, hi gɛ̧ɛ̧nig hin-a̧a̧bɛ gbɔlɛ kittɔnɔ, wɛɛ hi ɗɛ̄ɛ̄ an hi zuun hinyɔ hi gig gɛ̧ɛ̧nik hi rɔb gɛ.

⁸ Pol wɛɛ dɔks zulɔ hinɛ raa a bé gɔ hinza a̧a̧bi a Yahuduya maak ha gɛ, zaabe a Bɛtluk muul gɛ, zaabe a Waar gbɔɔl Romaya bɔ Kaysara gi zulha gɛ.

⁹ Yɔ Waar Fɛstus ha̧a̧g an gi gɔ Yahuduya wɔ kpoosya̧ gi harihi be, war Pol a ha̧a̧m an mɔ dɔɔ a Urusalima be da be gbɛrsum dɔgl mɔ hɔ a hinyɔ hi gɛ̧ɛ̧num geha ya?

¹⁰ Pol goo a yɛrɛ be erk a Waar gbɔɔl Romaya bɔ Kaysara dɔglyɛ̧ɛ̧k luk du, rii an nɛ gbɛrsib dɔgl be bɛttɔnɔ. Bé wōō hin-a̧a̧bi a Yahuduya wɔ hi zulha gɛ. Mɔɔ hi zul mɔ mɔ mɛɛ hinɔ bɛttɔnɔ hɛw.

¹¹ An be ɗa̧a̧ maakdɔglɛ, zaabe be gɔ hin-a̧a̧b yɔ rı̄ı̄ wɔrko, bé ı̄n wɔrk gɛ. Yɛrɛ hinyɔ hi gɛ̧ɛ̧nib gi taa rɔb gɛ, doo za ɗɛɛ an gi gaabe hi naan du gɛ. Yɛrɛ be ɛrk an Waar gbɔɔl bɔ Kaysara a Roma gi gbɛɛr dɔgl be.

¹² Waar Fɛstus be watin hi dɔglyɛ̧ɛ̧kya wɔ, wɛɛ raa a nɛ yɔ mɔ war an Kaysara gi gbɛrsum dɔgl mɔ, mɔ rek ma hɔ ro an gi gbɛrsumɔ.

¹³ Kuudu yɔ ɔ̧t zaadɛ hi talɔ, waar Agaripa hi nistɔ Bɛrnike hi zaa a Kaysariya an hi boo Fɛstus.

¹⁴ Yɔ hi ɗɔɔt hɔ ɔ̧t kaasi, Fɛstus fɔks waar bɔ Agaripa Pol dɔglɔ raa a Felikus ɔɔ doo za a luknɔ du dihɛ.

¹⁵ Yɔ be rek a Urusalima Bɛtmaakwookya gbɔlɛ wɔ hi Yahuduya wɔ ɗɛntɛya̧ wɔ hi zaa hi gɛ̧ɛ̧nig dɔglɔ a beege hi zɔ̧be an be matinge dɔglɛ.

¹⁶ Bee be goo be raa a a Romayaadɛ dɔgl-gbaak du ɔ̧nɛ hi rɔ̧ɔ̧s anbɔ gɛ, za̧a̧nyɔ hi gɛ̧ɛ̧nig dɔgl gi bootin dɔgl hi gɛ̧ɛ̧nikɔya wɔ an gi ta̧a̧s zulɔ hin a hinyɔ hi gɛ̧ɛ̧nig geha. Gi taa anbɔ gɛ, hi gāā za̧a̧nyɔ hi gɛ̧ɛ̧nig hin a gɛ̧ɛ̧nikɔya wɔ hi naan du gɛ.

¹⁷ Yɔ wɔrɔ hi zaatin dihɛ ma hi bee sɛwi, be ɔɔ lɛl daa gɛ be, yoosugɔ be re be gul be ɗɔɔt gɔ a dɔglyɛ̧ɛ̧k luk bɔ gedu be raa a hi kamz za̧a̧nɔ ma.

¹⁸ Dood wɔ hi gɛ̧ɛ̧nig hinɛ hi zaa hi er hi dɔg hinɔ gɔ, hɔnɛ hi kāmz dɔgl ha̧a̧l anyɔ be mɔkig nɛ gɛ be.

¹⁹ Hi faltin dɔgl zaadɛ a maakya̧ bɔ gi dɔŋgo, hi wɔrk za bɔ nuŋgɔ a Yeesu yɔ Pol gi raak a gi za̧a̧tilyɔ. Hinɔ gii ma bɔ kpɔd.

²⁰ Be mɛ̄ɛ̄ dɔgl bɔrɔ gaasugɔ rɔbtɔnɔ gɛ, hinɔ gii be ɛr Pol a kinsa ha̧a̧g rek a Urusalima an hi gbɛrsig dɔglɔ hɔ be.

²¹ Hɔnɛyɔ Pol wɛɛ gi raa a hi gbaab an luknɔya be rek a waar gbɔɔl bɔ Kaysara ge an hi gbɛrsib dɔglɔ, hinɔ gii be raa a hi ooge, lɛl gɔ gi fɛɛbe be yaag a waar gbɔɔl bɔ ge gi gbɛrsige.

²² Waar Agaripa wɛɛ raa Fɛstus a bee hi zul be ha̧a̧b an be kɛms wal bɔrɔ dɔglɔ. A nɛ yoosig mɔ kɛmɔ.

²³ Yoosugɔ Agaripa hi nistɔ Bɛrnike hi zaa gɔ. Dood kittɔnɔ hi kamzige, hi gig ɗɔbsugo, hi gi daŋko hi hinnak hi hin-ɛɛnɛ. Hi gul mɔksilluk gbɔɔl bɔ gedu hi laaya gbɔlɛ wɔ, hi dood gbɔlɛ waal gbɔɔlya wɔ. Fɛstus raa hí kamz Pol gɔ.

²⁴ Fɛstus wɛɛ raa waar bɔ Agaripa: a waar Agaripa, mɔya hi dood wɔ nɛ mɔks duhɛ sɛw hi wiya, nɛ gbɛn wal yɔ Yahuduya wɔ hi gi dihɛ sɛw hi Urusalimaya wɔ sɛw hi kamzig be muutdu hi zɔ̧be an be matinge dɔglɛ, hi wɛɛ hi ɓooya̧a̧ a rı̄ı̄ an gi kɔm za̧a̧til gɛ. Walɔ gii gi erk yɔ.

²⁵ Wɛɛ be tɛb dɔglɔ hi zul be, bé zɛ̄m hin-a̧a̧b yɔ gɔ an gi rii wɔrk gɛ. Yɔ gii hi zulɔ raa a Waar gbɔɔl bɔ gii gi gbɛrsib dɔglɛ, be mɔk an be yaag hɔ ro an gi gbɛrsig ma.

²⁶ Wɛɛ be dāg dɔgl rɔb a gi zulha an be bi̧i̧s waar wɛ bɔ ɗɛɛrwol gɛ be. Hinɔ gii be kamzig a nɛ muutdu, hi a mɔ muut du, mɔɔ Waar Agaripa, wɛ watig hinɛ an be mɛɛ hinyɔ gɔ be bi̧i̧ a ɗɛɛrwol du.

²⁷ Be gbɛn à hi yaa luknɔya ya̧a̧rtɔs, hi gog hin-a̧a̧b yɔ woo hi gɛ̧ɛ̧nig gɛ, yɔ ka̧d gɛ.