TƆMSYAADƐ WOOSƐ 24 - Nouveau Testament Doyayo

TƆMSYAADƐ WOOSƐ 24

¹ Yɔ ɔ̧t tal nɔɔn-gbunu Bɛtmaakwookya gbɔɔl mɔɔt bɔ Ananiyas tuur gɔ a Kaysariya. Zaatin hi Yahuduya ɗɛntɛ zaadɛ hi Tɛrtulus doo ya̧a̧mɛɛkya bɔ. Yɔ hi tuur a hɛbtzulya bɔ Felikus ge hi dɔg hinyɔ hi gɛ̧ɛ̧n nɛ Pol gɔ.

² Yɔ hi el Pol i, Tɛrtulus yɛɛl hinɔ gɔ gi gɛ̧ɛ̧nig gɔ anyɔ lɛ: a Baa Felikus Doo gbɔɔlɛ, wi ɗɔɔtig rɔbtɔnɔ a mɔ gbɔlums dɔŋgo. Hinyɔ rēk a hɛbtyɔ gedu gɛ, hi gɛbsig a mɔ dɔŋgo.

³ Hin wɔrɔ lab sɛw wi dak a mɔɔge a lɛl sɛw, wi wɛɛ wi gim baanik gbɔɔltɔnɔ.

⁴ Taa an be mɔɔsum hi dɔgl kito, yɛrɛ baa, be zɔ̧mɔ, anyɔ mɔ gisiw ya̧a̧rmɛɛko, laksiwi dɔgl yɛrɛ kaasi.

⁵ Wi zɛm wal yɛrɛ gi doo bɔbtin lɛlha̧tirgoyayɔ, gi sɔmbik Yahuduya wɔ waal du sɛw. Gii gi dood Nazarɛdya wɔ hi gɛ̧ksig gbɔnɔ zulya̧.

⁶ Tɛb nɛ an gi ɓi̧i̧l Bɛtluk bɔ, wi wa̧a̧ge. [Ha̧a̧w nɛ an wi gbaasig dɔgl anyɔ maakdɔgl wi gi raako,

⁷ wɛɛ laaya gbɔɔl mɔɔt bɔ Liiziyas zaa loog wi naan du hi tɛŋko,

⁸ raa dɔglɔgɛ̧ɛ̧nikya wɔ hi zaa a mɔɔge. ] Gɔ mɔ watig hin hi zul mɔ, mɔ ɗɛɛ an mɔ mɛɛ dɔgl yɔ wi gig gɛ̧ɛ̧nik sɛw rɔbɔ lɛl a hinyɔ gɔ gi dɔgsum gedu.

⁹ Yahuduya wɔ hi ɔks ya̧a̧ya̧ hi Tɛrtulus hɛw, hi raa a hɔɔ, hinyɔ dɔg sɛw gi rɔbo.

¹⁰ Hɛbtzulya bɔ Felikus yaas Pol naanɛ a gi booya̧a̧. Pol dɔgɔ: a be mɛɛ a wɛl kittɔnɔ mɔ gi ɗɔɔtig dɔglyɛ̧ɛ̧kya a hɛbt yɛrɛ gedu. Yɛrɛ be dag hato an be dɔks zul be hin hi kpoos esigi a mɔ muutdu.

¹¹ Yɔ be dɔɔ a Urusalima an be ɗɔbs Bɛto, dāār yɛms koobl daa eer gɛ. An mɔ tɛb dɔglɔ rɔbtɔnɔ mɔ zɛŋk anbɔ.

¹² Hí zɛ̧be a Bɛtluk du, zaabe a mɔksilluk du, zaa a waal gbɔɔl du, be ya̧a̧ gɔtingo hi doo za gɛ, zaabe a be sɔmbik dood saal gɛ.

¹³ Wɛɛ hi ɗɛ̄ɛ̄ an hi zuun hinyɔ hi gib gɛ̧ɛ̧nik hi rɔb ɓɔri gɛ.

¹⁴ Yɛrɛ hinyɔ gɔ be zunsum gɛrɛ: be gi woosig baa wi Bɛtya̧ hin hi gbɔnɔ za segyɔ hii gɔ hi el a gbɔnɔ gɛ̧ksilyɔ. Be ɗɔbsig maakdɔglyɔ Muusa bi̧i̧ a ɗɛɛrwol du hi Bɛtya̧a̧kɛŋkya wɔ ya̧nɛ wɔ hi bi̧i̧ sɛw be.

¹⁵ Mɔkil benɛ a Bɛt ge riitin hi mɔkil ya̧nɛ yɔ hi ta̧a̧ her. Bɛt gí rɛms dood rɔ́bɛ hi dood ha̧a̧lɛ wɔ gi wɛɛ gi ɗunsihi a wɔrk du.

¹⁶ Yɔ anbɔ be kɛɛko an kpoos be gi er a Bɛt muut du, hi a dood muutdu sɛw.

¹⁷ Yɔ be tuu be ɔɔ Urusalima hɛbtɔ wɛl kittɔnɔ, be wɛɛ be rek hɔ ma an be kams dood be hii tusɛ, be gaa gaasɛ be wɛɛ be woos Bɛt maako.

¹⁸ Yɔ be wook maak bɔ a Bɛtluk du anbɔ hi gul hi zɛ̧be, yɔ be da̧a̧s muul be gaasugɔ. Bé ɔ́ks nɛ hi dood saal gɛ, be taa nɛ nams gɔk gɛ.

¹⁹ Yahuduya zaadɛ wɔ hi fu̧u̧ a Àaziya hi gidi be. Gi nɛ an hii hi zaa nɛ hi gɛ̧ɛ̧nib hin a mɔ muutdu gid hi gin hinza an hi dɔg be zulha.

²⁰ Zaabe, an dood wɔ hi gi dihɛ hi dɔgsum hin-a̧a̧b yɔ hi zɛm a be woo a ɔ̧tyɔ be erk nɛ a dɔglyɛ̧ɛ̧kyaya̧ wɔ hi muutdu gedu.

²¹ Hi zɛm hin gbun yɛrɛ gii kpɔd: yɔ be erk hi muutdu be ɓooya̧a̧ be raa a yɔ be ɗɔbsig a Bɛt gi ɗuns wɔrkɛ gii ro, nɛ gisib dɔgl gbaak nɛɛko! Anbɔ.

²² Hɔnɛyɔ Felikus mɛɛ Yeesu gbɔnɔ dɔgl rɔbtɔnɔ, raa a laya wɔ gbɔɔlya̧ mɔɔt bɔ Liiziyas gɔ gi zaa ro, be ɔɔ dɔgl mɔ gbɛɛruko. Wɛɛ hɛks dood sɛw.

²³ Wɛɛ raa laaya gbɔɔl bɔ a gi ooge, gi ɔsig lɛlfɛɛtil kaasi, bɔgi ans naaza wɔ ha̧a̧hi zaak a ge gbɔnɔ an hi ɗansig hinyɔ ha̧a̧ge.

²⁴ Kuudu yɔ ɔ̧t kaasi talɔ, Felikus zaatin hi nistɔ Yahu-duya bɔ Durusila. Wɛɛ yaa doo elz Pol zaa. Wɛɛ lagsig ɗɔbsig dɔgl yɔ dɔg a Yeesu Kristu zulha.

²⁵ Hɔnɛyɔ Pol gi book hinwook riit dɔglɛ hi zul-ook dɔglɛ, hi dɔglyɛ̧ɛ̧k yɔ gɔ gi zaa kuudu dɔglɔ, Felikus bɛɛ lak anbɔ kolɔ tuugtu, wɛɛ raa Pol a rekum kete, lɛl gɔ gi fɛɛb be elzum mɔ zaa ɓɛ.

²⁶ Hɔnɛyɔ Felikus gi gɔk anbɔ be, rum a Pol gi gaag tus an gi bisige, wɛɛ Pol be gaag gɛ be. Hinɔ gii gɔ gi gig waak elzig an hi bootinya̧a̧.

²⁷ Yɔ wɛl eer talɔ, Pɔrkiyus Fɛstus yɛr hɛbtzulya bɔ Felikus ɗɔɔtillɛlɔ an hɛbtzulya be. Yɔ Felikus ha̧a̧g an gi gɔ Yahuduya wɔ kpoosya̧ gi harihi, wɛɛ ɔɔ Pol a luknɔ du.