TƆMSYAADƐ WOOSƐ 15 - Nouveau Testament Doyayo

TƆMSYAADƐ WOOSƐ 15

¹ Dood zaadɛ wɔ hi fu̧u̧z a Yahuduya hi zaa a Aŋtakiya hi yɛls yɛ̧ɛ̧dɛya̧ Yeesu fɔkya wɔ hingok anyɔ lɛ: a à nɛ nāb an Muusa maakɔdɔgl yɔ raa gɛ, nɛ ɗɛ̄ɛ̄ an nɛ za̧a̧ gɛ.

² Pol hi Barnabas hi tā̧ā̧ wɔrɔ dɔglya̧ bɔ gɛ zaŋ, hi gbaatin ha̧a̧ltɔnɔ a dɔgl bɔrɔ hage. Yɔ anbɔ yɛ̧ɛ̧dɛ Yeesu fɔkya wɔ hi wɛɛ hi her Pol hi Barnabas hi dood zaadɛ wɔ hi fu̧u̧ a Aŋtakiya hi yaanihi dɔglɔ a Urusalima a tɔmsya wɔ hi ɗɛntɛ Bɛtwoos kaŋkigya wɔ hi an hi gbɛrsihi dɔglɔ.

³ Yɔ Yeesu fɔkya wɔ Aŋtakiya hi yaa wɔrɔ a Urusalima, hi talk a Finikiya hi a Samariya, hi fɔks Yeesu ɗɔbsigya zaadɛ wɔ a dood wɔ hi mɛ̄ɛ̄ nɛ Bɛt gɛ hi zɛmr kpoosya̧ zɛmr a Bɛt ge. Yɔ dood wɔ hi lag anbɔ, harihi hi sɛw.

⁴ Yɔ hi tuur a Urusalima, Yeesu fɔkya ɔksilya̧ wɔ hi tɔmsya wɔ, hi ɗɛntɛ Bɛtwoos kaŋkigya wɔ hi zehi rɔbtɔnɔ. Wɔrɔ hi fɔksihi hinyɔ Bɛt woo hi hii sɛw.

⁵ Hɔnɛ dood zaadɛ Bɛtɗɔbsigya wɔ hi fu̧u̧z a Farisaya wɔ hi tees du hi ɗuk hi dɔgɔ a gi an hi nab dood dɔɔmɛ wɔ nabɔ, hí wɛɛ hí raahi hi fɔb Muusa maakɔdɔgl bɔ be.

⁶ Yeesu tɔmsya wɔ hi ɗɛntɛ Bɛtwoos kaŋkigya wɔ hi wɛɛ hi ɔks lɛlgbun an hi see dɔglɔ.

⁷ Yɔ hi faltinhin gi amɔ Piyɛr ɗund dɔgsihi: a yɛ̧ɛ̧dɛ be wɛ, nɛ mɛɛ a Bɛt herib nɛ teesdu a biitirnaan du an Dɔgl Rɔb bɔ gi tuu be ya̧a̧ du a dood dɔɔmɛ wɔ hi teesdu an hi kɛm hi ɗɔbsɔ.

⁸ Wɛɛ yɔ Bɛt mɛɛ dood kpoos sɛw, zuun a ta̧a̧ dood dɔ̧ɔ̧t dɔɔmɛ wɔ anyɔ gaahi Mɔkilɔ an wɛɛ be.

⁹ Gɔ̄ hinza dɔɔm hi teesdu an gi gɛ̧ksihi hi wɛɛ gɛ, gaas kpoosya̧ anyɔ hi ɗɔbs Yeesu.

¹⁰ Yɛrɛ nɔ nɛ maatig Bɛto nɛ wɛɛ nɛ gbaasig fɔkɔya wɔ hinɗɔmnyɔ daarlɛl nɔ? An baa wɛ hiya, hi wɛya hi zul wɛ, hinɔ yɛ̧rɛyɛ̧rɔ.

¹¹ Yɛrɛ wɛ ɗɔbsig a wɛ za̧a̧ a Waar Yeesu gɛmsilɔ bɔ gi dɔŋgo an hii be.

¹² Dood wɔ hi mɔks nɛ sɛw hi kɔm sob hi kɛmsig Barnabas hi Pol gɛrs dɔgl wɔ hi fɔkugo hi woos zaadɛ gbɔlɛ wɔ Bɛt woo nɛ hi hii a dood dɔɔmɛ wɔ hi tees du.

¹³ Yɔ hi da̧a̧s ya̧a̧boonɛ Yakuba goo raahi:

¹⁴ a yɛ̧ɛ̧dɛ be wɛ, lagsinbe! Simɔŋ fɔk hinyɔ Bɛt yɛɛl gi woo nɛ a dood dɔɔmɛ wɔ hi zulha an gi zaa gi her zaadɛ wɔ gɔ hi wɛɛsig doodɔ.

¹⁵ Dɔgl yɛrɛ riitin hi Bɛtya̧a̧kɛŋkya wɔ dɔgl ya̧nɛ wɔ hi bi̧i̧

¹⁶ a Bɛt raa: a gɔ gi kuudu anbɔ bé wɛɛza bé wɛɛ bé wɔm Dawda lukɔ bɔ ɛ̧br nɛko, be wɛɛ be gɛmsɔ, be esige.

¹⁷ Yɔ anbɔ dood zaadɛ wɔ sɛw hí tɛb Waar Bɛto, hi dood dɔɔmɛ wɔ be gihi elik sɛw an hi wɛɛ dood benɛ.

¹⁸ Waar Bɛt raa anbɔ. Dɔg dɔglɔ lɔɔlɔɔ an hi mɛɛ.

¹⁹ Yakuba wɛɛ raa: a ya̧a̧n gii be mɔk a bɔwɛ zɛks dood wɔ hi taa Yahuduya gɛ hi zɛmr kpoosya̧ hi ta̧a̧ Bɛto hi gig fɔko.

²⁰ Yɛrɛ yɛwɛ bi̧i̧sihi ɗɛɛrwoli a bɔhi tɔb namb ɓi̧i̧limya wɔ hi gɔnik maako hi wɛɛ hi kpɔɔnik loorɛ, bɔhi naamansi, bɔhi tɔb nambyɔ hi ɓɔ̧rɔ, bɔhi tɔb namb ga̧a̧mɛ.

²¹ Ya̧a̧nɛ, yɛɛl amntɔnɔ dood hi dɔk Muusa maakdɔglɔ a waal gbɔlɛ wɔ hi du sɛw, dood hi gi dɔglɔ zaŋgig a mɔksilluk wɔ du a holum-ɔ̧t nuŋg sɛw be.

²² Yɔ anbɔ tɔmsya wɔ hi ɗɛntɛ Bɛtwoos kaŋkigya wɔ hi Yeesu fɔkya Urusalimaya zaadɛ wɔ sɛw hi see hinɔ bɛr an hi her dood hi teesdu hi yaahi a Aŋtakiya hi Pol , hi Barnabas, hi wɛɛ hi her Yahuda yɔ nuŋgɔ zaa a Barsabas hi Silas, hi eer sɛw hi gi dood gbɔlɛ a hi tees du.

²³ Hi wɛɛ hi bi̧i̧ ɗɛɛrwol anyɔ lɛ hi yaanihi: a Wii tɔmsya wɔ hi ɗɛntɛ Bɛtwoos kaŋkigya wɔ wi boo yɛ̧ɛ̧dɛ wi Yeesu fɔkya dɔ̧ɔ̧t dɔɔmɛ wɔ nɛ gi a Aŋtakiya, a Siriya hi a Kilikiya.

²⁴ Wi lag a dood zaadɛ hi fu̧u̧ wi teesdu dihɛ hi rek hi zɛksinɛ, hi luutin hi ya̧a̧boonɛ. Wii wí rāāhi an hi rek hi gɔ hin dɔɔm anbɔ gɛ.

²⁵ Ya̧a̧nɛ wi mɔks wi wɔya̧a̧ lɛlgbunu an wi her walɛ zaadɛ wi teesdu wi yaahi a nɛɛge an hi kam Barnabas hi Pol , wɔ ha̧a̧wi a hii gbɔɔltɔnɔ.

²⁶ Ya̧nɛ hi gaa kolya̧ an hi wɔr a Waar wɛ Yeesu Kristu nuŋgɔ dɔŋgo.

²⁷ Wi yaa Yahuda hi Silas an hi dɔgsin hin gbun bɔ gii hi zulya̧ anyɔ wi bi̧i̧sin a ɗɛɛrwol du.

²⁸ Bɛt Mɔkilɔ hi wii sɛw, wi mɔk an bɔwi gbosin hinɗɔmn gbaak a zulha, gɛ gɔ wi gaan dɔgl yɛrɛ yɔ gi an hi ta̧a̧g kpɔd:

²⁹ Dɔglɔ gɛ an bɔnɛ tɔb namb wɔ hi gɔn maako, bɔnɛ tɔb namb ga̧a̧mɛ, bɔnɛ tɔb namb yɔ hi ɓɔ̧rɔ, bɔnɛ naamansi. Nɛ oo muul nɛ an bɔnɛ gɔ hin-a̧a̧bɛ wɔrɔ. Gid nɛ oo zul nɛ hi hin wɔrɔ gɔkɔ, nɛ woo rɔbo. An Bɛt gi oonɛ, wɛ ɔɔ naako!

³⁰ Yɔ dood hi waar ihi, hi loo ɗɛɛrwol bɔ hi kam gɔ a Aŋtakiya. Yɔ hi tuur a hɔ hi mɔks dood Yeesu fɔkya wɔ kittɔnɔ hi gaahi ɗɛɛrwol bɔ.

³¹ Yɔ wɔrɔ hi zaŋgin ɗɛɛrwol bɔ gi da̧a̧ hi dag hat gbɔɔltɔnɔ hi dɔgl yɔ hi bi̧i̧sihi hi ɓaasinihi muulɛ.

³² Anyɔ Yahuda hi Silas hi gi Bɛtya̧a̧kɛŋkyaadɛ hi zulya̧ be, hi dɔks wɔrɔ dɔgl kittɔnɔ hi ɓaasinihi muulɛ hi wɛɛ hi gaahi tɛŋko.

³³ Yɔ tɔmsya wɔ hi am hɔ kaasi, wɔrɔ hi waar ihi hi yaahi rɔbtɔnɔ hi wɛɛ a dood wɔ hi yaazihi nɛ hi. [

³⁴ Silas be ɔnɛ wɛɛ gɛ; see hinɔ bɛr an gi kɔm dihɔ. ]

³⁵ Pol hi Barnabas be, hi am a Aŋtakiya hi gi Waar Yeesu Dɔglɔ Rɔb bɔ dɔko hi wɛɛ hi hingok geha be, hi dood zaadɛ kittɔnɔ lɛlgbunu.

³⁶ Yɔ hi am dihɔ kaasi, Pol raa Barnabas a yɛnɛ wɛ wɛɛ a waal gbɔlɛ wɔ hi du sɔmsɔm an wɛ zɛ̧btir yɛ̧ɛ̧dɛ wɛ Yeesu fɔkya wɔ a lɛl yɔ wɛ daa nɛ ge sɛw wɛ dɔg nɛ Waar Yeesu dɔglɔ amntɔnɔ an wɛ seehi hi gi rɔbtɔnɔ.

³⁷ Barnabas ha̧a̧g an gi kam nɛ Yohana yɔ nuŋgɔ zaa a Markus hi hii hɛw.

³⁸ Hɔnɛ Pol be hā̧a̧g an Yohana-Markus gi retin hi hii gɛ, anyɔ da ɔzihi nɛ a Pamfila, gi fɔ̄hi woos du gɛ.

³⁹ Gabs ɗund gbɔɔltɔnɔ hi teesdu wɛɛ gaahi ma hɛɛtingo. Barnabas loo Markus hi kar lɛmb du hi rek a Kiprus, wɛɛ Pol her Silas hi rek lɛlya̧ gɔ sɔm be.

⁴⁰ Yɔ yɛ̧ɛ̧dɛ Yeesu fɔkya wɔ hi gaa Pol hi Silas Waar Yeesu naan du an Bɛt gɛmsilɔ gi gi hi hiya, hi rek gɔ.

⁴¹ Hi daa a Siriya hi a Silisi hɛbt du sɛw hi gaak Yeesu fɔkya wɔ lɛl sɔmsɔm tɛŋko hi Bɛt dɔglɛ.