1 KƆRƐŊGTU 15 - Nouveau Testament Doyayo

1 KƆRƐŊGTU 15

¹ Yɛ̧ɛ̧dɛ mi wɛ, mi gisin dɔk an nɛ mɛks Dɔgl Rɔb bɔ mi da mi dɔgsinɛ, yɔ nɛ ta̧a̧ Yeesu dɔgl bɔ hi kpoos nɛ, nɛ gig waak fɔki.

² Gid nɛ wa̧a̧ dɔglɔ kpoos ɗu anyɔ mi da mi dɔgsinɛ, dɔglɔ gii za̧a̧sinɛ. À lab gɛ yɔ nɛ ɗɔbs ya̧a̧rɛ.

³ Mi baar mi gogsin hinyɔ mi dagɔ, mi ɔɔnin an hingok gbɔɔl yɔ daarlɛlɛ a Kristu wɔr a wɛ hinha̧a̧l dɔŋgo anyɔ Bɛt ɗɛɛrwolɔ dɔgɔ:

⁴ a wɔrɔ hi i̧i̧ge wɛɛ rɛml ɗuk a ɔ̧t taasimɛ anyɔ Bɛt ɗɛɛrwolɔ dɔgɔ ;

⁵ wɛɛ mits Piyɛr , kuudu wɛɛ mits fɔkɔya koobl daa eer wɔ.

⁶ Kuudu mits yɛ̧ɛ̧dɛ zaadɛ fɔkɔ-yaadɛ tɛmɛrɛ nɔɔnɛ muutɔ, a ɔ̧t gbun bɔ gedu. Yɛ̧ɛ̧dɛ wɔrɔ zaadɛya̧ hi wɔr be, zaadɛya̧ kitɛ hi gi za̧a̧tili àgiyɔ te.

⁷ Wɛɛ kuudu ɓɛ mits Yakuba, kuudu mits tɔmsya wɔ sɛw.

⁸ A hi kuudu sɛwi, wɛɛ mits miya, yɔ mi gi an waa yɔ hi hodige.

⁹ Mi yɛ̧b mi daar tɔmsya wɔ sɛw, anyɔ mi zɛks nɛ Yeesu fɔkya wɔ ɔksilya̧ yɔ gi Bɛt ɔ̧nɛ, mí rı̄ı̄ an hi elim a tɔmsya gɛ.

¹⁰ Hi Bɛt gɛmsil ɔ̧ɔ̧n ro, mi gi hinyɔ mi giro, gɛmsilɔ bɔ gi a mi gbaŋgi taa hintɔs. Yɔ anbɔ mi woo Bɛt woosɔ mi daarihi sɛw. Mí wōō hi zul mi gɛ, Bɛt gɛmsilɔ yɔ gihi mii gii woo.

¹¹ Yɛrɛyɔ, gi gi miya, gi gi hiya, Dɔgl Rɔb bɔ wi gisin dɔk gɛrɛ, nɛ wɛɛ nɛ ɗɔbs dɔglɔ giibɔ.

¹² Yɛrɛyɔ an wi dɔgnik Bɛtdɔglɛ a Kristu rɛmlɔ a wɔrkɛ teesdu ɗuukɔ, ri dood zaadɛ a nɛ teesdu hi dɔk a wɔrkɛ rɛmtig taa nɔ?

¹³ À wɔrkɛ rɛmtig taa nɛ gɛ, Kristu yɔ rɛml nɛ a wɔrk du gɛ ma.

¹⁴ Wɛɛ à Kristu rɛml nɛ gɛ, Bɛtdɔgl wi dɔk bɔ yɔ ginɛ hintɔsi ma, ɗɔbsig nɛ bɔ hɛw yɔ gi hintɔsi be.

¹⁵ À taa nɛ an Bɛt gi rɛms nɛ wɔrkɛ wɔ gɛ, yɔ anbɔ an doo hi see hi zɛm gedu a wi gi Bɛt dɔgldɔkya ya̧a̧gɔ̧ɔ̧nyaadɛ a Bɛt gbaŋgi anyɔ wi dɔg hindɔɔm hi nuŋgɔ a gii rɛms Kristu a wɔrk du, à da rɛmsig nɛ gɛ.

¹⁶ Nɛ gi taa an wɔrkɛ hi rɛml gɛ, Kristu hɛw rɛml ma gɛ.

¹⁷ Wɛɛ à Kristu rɛml gɛ, ɗɔbsig nɛ gi tɔsyɔ, nɛ wɛɛ nɛ gis a nɛ hinha̧a̧l du tɛ̧.

¹⁸ Wɛɛ wɔ hi ɗɔbs nɛ Kristu hi wɔrɔ hi wag nɛ ya̧nɛ da̧a̧da̧.

¹⁹ Gid mɔkil yɔ wɛ gbaak a Kristu ge gisɛ ɗaak a waabil wɛ yɛrɛ gedu kpɔdi, wɛ rii an hi mɛɛsɛ ya̧a̧r gi daar dood sɛw.

²⁰ Nɛ yɛrɛ ɔnɛ, Kristu rɛml ma a wɔrkɛ tees du, wɛɛ wɔ hi wɔr nɛ sɛw gbɔnɔya̧ dorkyayɔ.

²¹ Ya̧a̧nɛ, anyɔ wɔrk dag tɛŋk a doo dɔŋgo, wɔrkɛ rɛmtig dag tɛŋk gɔ a doo dɔŋg be.

²² Wɛɛ anyɔ dood sɛw hi wɔrk a ɔksigya̧ bɔ gedu hi Àdamu, dood sɛw hi wɛɛ hi rɛml gɔ ɔksigya̧ bɔ gedu hi Kristu be.

²³ Bɔ be gi rɛml a fɔbtingo ɔ̧ɔ̧ gedu. Kristu gii baarɔ, gɔgi wɛɛzig be doodɔ wɔ hi rɛml gɔ a zaakɔ bɔ gedu.

²⁴ Kuudu, waalda̧a̧k gɔ gi tuurɔ, Kristu gi bɛɛ waar ums wɔ sɛw, hi gbɔlums wɔ sɛw, hi tɛŋk gbɔlɛ wɔ sɛw ha̧tirgo, gi wɛns Bɛt yɔ gi Baaba wáátɔ bɔ naan du.

²⁵ Ya̧a̧nɛ gi an Kristu gi ɗɔɔt waar i gi tuur an Bɛt gi gbaa lɔlɔhɛ̧ɛ̧nikya wɔ a gi dɔɔ du.

²⁶ Lɔlhɛ̧ɛ̧nikya yɔ̧ɔ̧sum bɔ Bɛt gɔ gi ha̧tirge, gɛ wɔrko.

²⁷ Anyɔ Bɛt ɗɛɛrwolɔ raa a Bɛt gbaa hin sɛw a waaɔ dɔɔ du, wɛ mɛɛ a yɔ hi bi̧i̧ a hin sɛw hi tiis zulya̧ a Kristu dɔŋdi, hinɔ taa raak a Bɛt hi zulɔ gi tiis zulɔ a Kristu dɔŋdi. Ya̧a̧nɛ Bɛt gii tiis hin sɛw a Kristu dɔŋdi.

²⁸ Wɛɛ hin sɛw gɔ hi tiis zulya̧ a Kristu dɔŋdi, gɔ gi anbɔ Kristu hi zulɔ gi tiis zulɔ a Za̧a̧nyɔ gbaasig nɛ hin sɛw gi dɔŋdi an kuudu Bɛt gigi hin sɛw a hin sɛw du.

²⁹ À lab gɛ, wɔ hi ta̧a̧k Bɛtmɛm look a wɔrkɛ dɔŋgo, hi woo ri be? À wɔrkɛ wɔ hi taa nɛ rɛmlik zaŋ be, nɔ hi gi Bɛtmɛm look a hi dɔŋgo?

³⁰ An wiya, nɔ wi gi a nɔk du ɔ̧t nuŋgo?

³¹ Yɛ̧ɛ̧dɛ mi wɛ, ɔ̧t nuŋg sɛw mi gi a wɔrk naan du, mi dɔg rɔbo anyɔ muul mi ɓaa a Waar wɛ Yeesu Kristu muulɛ a nɛ dɔŋgo.

³² Yɔ mi gi nɛ a Efesu, mi gɔ gabs hi namb hɛtum ha̧a̧lɛ; à mi gɔ nɛ anyɔ doo ha̧a̧g rɛ, yɔ ginɛ an mi dag nɔ gbɔɔlɔ gedu? À taa nɛ an wɔrkɛ hi rɛml gɛ, nɛ yɔ anbɔ, anyɔ ya̧a̧daanik dɔgɔ: yɛwɛ le, wɛ yɔ̧ ma, yoosig wɛ wɔrkwɔr be!

³³ Bɔnɛ maat zul nɛ: sams hi doo ha̧a̧lɛ gɔ ha̧tir ya̧a̧ rɔb ha̧tiro.

³⁴ Rɛ̧n ha nɛ wa̧a̧ zul nɛ anyɔ rii. Ɔɔn hinha̧a̧l nɛ. Ya̧a̧nɛ mi gbɛn dood zaadɛ a nɛ teesdu hí mɛ̄ɛ̄ Bɛt gɛ nɛ zaŋ. Mi gi book an seem gi ha̧a̧nɛ.

³⁵ Yɔ anbɔ kinsa doo za gi warɔ: a wɔrkɛ hi rɛml ri nɔ? Hi wɛɛ hi wɛɛz hi nɔ muulɔ?

³⁶ Mɔɔ doo yoo! Mɔ mɛɛ gɛ ya? Dɔ̧ɔ̧t yɔ mɔ lug hɛbtdi à wɔr gɛ ɗɛɛ an gi pir ri?

³⁷ Wɛɛ hinyɔ mɔ lugɔ gi gaat tɔs, zaabe tot gaato, zaabe hinza gaato, ɔ̧nɛ rı̄ı̄tin hi hinyɔ gɔ pir gɛ. Gaat bɔ muulɔ sɔm, tɛ̧ɛ̧ bɔ muulɔ sɔm be, hí riitin nɛ gɛ zaŋ.

³⁸ Bɛt gaag muulɔ anyɔ ha̧a̧g ro. Hinlɛŋks yɔ gi sɛw Bɛt gaag muul ɔnɛ yɔ fɔg giya.

³⁹ Hinza̧a̧til namb yɔ gi sɛw hi taa gbun bɔ: doo nambɔ gi sɔm, namb nambɔ gi sɔm, nɔɔs nambɔ gi sɔm, dut nambɔ gi sɔm.

⁴⁰ Muul bɛtum giro, hɛbtum gi be; muul bɛtum gaatigɔ sɔm hi muul hɛbtum gaatigɔ.

⁴¹ Ɔ̧t gaatigɔ sɔm, sɛɛ gbɔɔl bɔ buutigɔ sɔm, sɛwaat buutig ya̧nɛ sɔm, sɛɛwaa za buutigɔ sɔm hi sɛɛwaa za dɔɔm buutigɔ be.

⁴² Wɔrkɛ rɛmtigya̧ gi gi anbɔ. Hi lug muulɔ bɔ hɛbtdi dokili wɛɛ taa rɛmlik dokili.

⁴³ Hi lug muul bɔ hi bɔ̧ɔ̧sɛ, gi wɛɛ gi rɛml hi gbɔlumsɛ; hi lug muul bɔ hɔntili, gi wɛɛ gi rɛml hi tɛŋk gbɔɔltɔnɔ.

⁴⁴ Hi lug muul nambya, gi rɛml muul mɔkilya; gid muul nambya giro, muul mɔkilya gigi hɛw.

⁴⁵ Ya̧a̧nɛ Bɛt ɗɛɛrwolɔ raa a doo doos bɔ Adamu wɛɛ kol za̧a̧tilyɔ. Adamu yɔ̧ɔ̧sumɔ bɔ raakɔ a Kristu gi Mɔkil yɔ gi gaak za̧a̧tig giya.

⁴⁶ Yɛrɛ hinyɔ gi Bɛt mɔkilya taa hin doosi, hinyɔ fu̧u̧z hɛbtdi gii gi zaa doosi, wɛɛ hin Bɛtmɔkilya bɔ gi zaa kuudu be.

⁴⁷ Doo biitir bɔ Bɛt ha̧dzig a hɛbtdi gi hɛbtumyɔ, doo eesum bɔ be gi bɛtumyɔ.

⁴⁸ Za̧a̧nyɔ ki̧y hi hɛbto, dood wɔ hɛbtdi hi gi lab be. Za̧a̧nyɔ fu̧u̧z a bɛtha, wɔ hi gi bɛtha hi gi lab be.

⁴⁹ Anyɔ wɛ riitin hi doo hɛbtum bɔ a waabil yɔ ɓɔryɔ duge, gbunɔ gii wɛ riitin hi doo bɛtum bɔ kuudu a waabil yɔ gi zaak gedu.

⁵⁰ Yɛ̧ɛ̧dɛ mi wɛ, mi raa a riya? Hinyɔ Bɛt kim hi yɔ̧kti hi ga̧a̧mɛ hi ɗɛ̄ɛ̄ an hi dag Bɛt wáát bɔ ya̧nɛ gɛ, wɛɛ hindokili taa an gi waa a hinyɔ taa dokil gɛ gedu.

⁵¹ Laginɛ! Yɛrɛ mi gisin dɔk dɔgl za yaatilya: wɛ́ taa wɔrk wɛ sɛw, wɛ́ sɛw wɛ́ zɛmrɔ.

⁵² Hinɔ gi tuur a pɔ̧r-ulk yɔ̧ɔ̧sum bɔ gedu nɔɔktɔnɔ, a lɔlgbɛɛk du. Bɛtwalsɛr gi bɛɛ pɔ̧r ulko, Bɛt gi rɛms wɔrkɛ wɔ hi dag muul za̧a̧tig faaya, wɛ́ wɛɛ wɛ́ zɛmr za̧a̧tili.

⁵³ Ya̧a̧nɛ muul dokil yɛrɛ gi an gi wɛɛ gi heg muul za̧a̧tig faaya bɔ; wɛɛ muul wɔrkil yɛrɛ be gi heg muul yɔ gɔ gi wɔr gɛ.

⁵⁴ Muul dokil bɔ gɔ gi heg muul za̧a̧tig faaya bɔ, wɛɛ muul wɔrkil bɔ gɔ gi heg muulyɔ gɔ gi wɔr gɛ, kuudu hinyɔ hi bi̧i̧ gi tuurɔ: a wɔrk i̧i̧y ɗɛɛt buudu.

⁵⁵ Eh! wɔrko, ɗɛɛt mɔ gi ay? Eh! wɔrko, ros mɔ gi ay?

⁵⁶ Wɔrk rosɔ gɛ: hinha̧a̧lɛ, hinha̧a̧l tɛŋkɔ be gɛ: maakdɔglɛ.

⁵⁷ Yɛrɛ bant gi a Bɛt yɔ gi wɛ gaak ɗɛɛt a Waar wɛ Yeesu Kristu zul ge!

⁵⁸ Ya̧a̧nɛ yɛ̧ɛ̧dɛ mi rɔbɛ wɛ, waan hi kpoos nɛ gbunu, bɔnɛ namɔ, waasin Waar Yeesu woosɔwook hi tɛŋko anyɔ nɛ mɛɛ a woos nɛ taa an gi wɛɛ hintɔs anyɔ nɛ ɔks hi Waar Yeesu.