Apocalipsis 3 - Jiñi Tsiji' bʌ Wen T'añ cha'añ Estudio

I cʌntesʌntel Sardis

¹ Ts'ijbuben xcʌntaya i cha'añ xñopt'añob mu' bʌ i tempañob i bʌ ya' ti Sardis: Jiñi am bʌ i cha'añ wuctiquil espíritu i cha'añ Dios yic'ot wucp'ejl ec', jiñʌch mu' bʌ i yʌl ili t'añ: “Cʌmbil c cha'añ la' melbal, cujil chʌmeñetla yilal anquese lon cuxuletla ti alol.

² Chʌcʌ q'uele la' bʌ, la' cha' p'ojlic i wenlel la' pusic'al woli bʌ ti jilel, come tsa' c taja mach uts'atic la' melbal ti' tojlel Dios.

³ Ña'tanla chuqui tsa' la' wu'bi yic'ot chuqui tsa' la' jac'ʌ. Xuc'ul yom mi la' ñop. Cʌyʌx la' mul. Mi ma'añic mi la' chʌcʌ q'uel la' bʌ, mi caj c tilel ba'añetla che' bajche' xujch'. Ma'añic mi caj la' ña'tan baqui ora mi caj c tilel ba'añetla.

⁴ Añ hermañujob ti Sardis mach bʌ añic tsi' bi'b-esayob i pislel. Mi caj i cha'leñob xʌmbal quic'ot, lʌpʌl i cha'añob sʌsʌc bʌ i pislel. Che'ʌch yom come uts'at i melbal.

⁵ Jiñi mu' bʌ i mʌjlel i cha'añ mi caj i yʌq'uentel i lʌp sʌsʌc bʌ i pislel. Ma'añic mi caj c yʌpben i c'aba' ti juñ ba' otsʌbilob i c'aba' año' bʌ i cuxtʌlel. Mi caj c su'b ti' tojel c Tat yic'ot ti' tojel i yángelob.

⁶ Jiñi am bʌ i chiquin la' i yu'biben i t'añ jiñi Espíritu mu' bʌ i su'ben xñopt'añob”.

I cʌntesʌntel Filadelfia

⁷ Ts'ijbuben xcʌntaya i cha'añ xñopt'añob mu' bʌ i tempañob i bʌ ya' ti Filadelfia: “Jiñi Ch'ujul Bʌ, jiñʌch Isujm Bʌ, am bʌ i cha'añ i llave David, che' añ chuqui mi' jam, ma'añic majqui mi' ñup', che' añ chuqui mi' ñup', ma'añic majqui mi' jam. Jiñʌch mu' bʌ i yʌl ili t'añ:

⁸ Cʌmbil c cha'añ la' melbal. Awilan, jamʌl jump'ejl i ti' tsa' bʌ cʌc'ʌ ti' tojel la' wut, ma'añic majqui mi' mejlel i ñup', come anquese ts'ita' jach la' p'ʌtʌlel tsa'ix la' jac'beyon c t'añ, ma'añic tsa' la' wʌlʌ mach la' cʌñʌyoñic.

⁹ Awilan, mi caj c pʌy tilel ti la' tojlel i cha'año' bʌ Satanás, wiñicob mu' bʌ i cha'leñob lot, mi' cuyob i bʌ ti israelob anquese mach israelobic, mux caj c pʌyob tilel cha'añ mi' ñocchocoñob i bʌ ti' tojel la' woc, mi caj i ña'tañob c'ux mi cubiñetla.

¹⁰ Come xuc'ul woli la' jac'beñon c t'añ anquese wersa mi la' cuch wocol, jiñi cha'añ mi caj cʌntañetla che' ti' yorajlel wocol mu' bʌ caj i tilel ti pejtelel pañimil cha'añ mi yilʌbentelob i pusic'al jiñi chumulo' bʌ ti pañimil.

¹¹ Awilan, talon ti ora; lotola ti la' pusic'al jiñi tsa' bʌ aq'uentiyetla ame añic majqui mi' chilbeñetla la' corona.

¹² Jiñi mu' bʌ i mʌjlel i cha'añ mi caj i yajñel che' bajche' oy ti' templo c Dios, ma'añix mi caj i chʌn loq'uel ya'i. Mi caj c ts'ijbuben i c'aba' c Dios ti jiñi wiñic yic'ot tsiji' bʌ j c'aba' yic'ot i c'aba' i tejclum c Dios, jiñi tsiji' bʌ Jerusalén mu' bʌ i loq'uel tilel ti panchan ch'oyol bʌ tic Dios.

¹³ Jiñi am bʌ i chiquin la' i yu'biben i t'añ jiñi Espíritu mu' bʌ i su'ben xñopt'añob”.

I cʌntesʌntel Laodicea

¹⁴ Ts'ijbuben jiñi xcʌntaya i cha'añ xñopt'añob mu' bʌ i tempañob i bʌ ya' ti Laodicea: “Awilan; jiñi lac Yum, jiñi xuc'ul bʌ Testigo, jiñi ñaxan bʌ mu' bʌ i cha'len yumʌl ti' tojlel pejtelel i melbal Dios, jiñʌch mu' bʌ i yʌl ili t'añ:

¹⁵ Cʌmbil c cha'añ la' melbal, ma'añic mi la' wʌc' la' pusic'al cha'añ mi la' melbeñon que'tel, ma'añic mi la' wʌc' la' pusic'al cha'añ mi la' contrajiñon, mach ticʌweticla, mach tsʌwañeticla. [Uts'at junchajpic jach la' ña'tʌbal.]

¹⁶ Pero c'unq'uixiñet jach la, jiñi cha'añ mi caj c xejtañetla loq'uel tic tojlel, come mach ti pejtelelic la' pusic'al mi la' mel chuqui yom.

¹⁷ Mi la' lon al: Wen chumulon lojon, ca'bʌl tsa' p'ojli c chu'bʌañ, ma'añic chuqui añ to yom c cha'añ lojon, ma'añic mi la' ña'tan mach wen chumuleticla, c'ax p'ump'uñetla, ma'añic la' chu'bʌañ, xpots'etla, pits'iletla yilal.

¹⁸ Mic su'beñetla cha'añ mi la' mʌn oro tic tojlel sʌc-esʌbil bʌ ti c'ajc, cha'añ wen chumul mi la' wajñel, mʌñʌla wen sʌsʌc bʌ la' pislel cha'añ mi la' lʌp, ame quisintiquic mi la' wu'bin che' pits'il mi la' q'uejlel, chʌjq'uesan la ochel i ts'ʌcal la wut cha'añ mi' c'otel.

¹⁹ Jiñi mu' bʌ j c'uxbin mic tic'; mic ju'sʌben i pusic'al. Jiñi cha'añ yom bʌxetla, cʌyʌla la' mul.

²⁰ Awilan, wa'alon, woli c jats'ben i ti' otot. Mi añ majqui mi yu'bibeñon c t'añ mu' bʌ i jambeñon i ti' otot, mi caj cochel ba'añ, mi caj c cha'len we'el yic'ot. Mux caj i cha'len we'el quic'ot ja'el.

²¹ Jiñi mu' bʌ i mʌjlel i cha'añ mi caj c su'ben buchtʌl quic'ot tic yumʌntel, che' bajche' tsa' buchleyon quic'ot c Tat ti' yumʌntel che' bʌ tsa' mʌjli c cha'añ.

²² Jiñi am bʌ i chiquin la' i yu'biben i t'añ jiñi Espíritu mu' bʌ i su'ben xñopt'añob”.