Numeros 29 - Jiñi Tsiji' bʌ Wen T'añ cha'añ Estudio

¹ “Ti jiñi ñaxan bʌ q'uiñ che' ti' wucp'ejlel uw, mi caj la' mel ch'ujul bʌ tempa bʌ come jiñʌch i q'uiñilel cha'añ mi la' wus trompeta, jiñi cha'añ mach yomic mi la' cha'len e'tel.

² Ti jiñi q'uiñ mi la' wʌq'ueñon pulbil bʌ c majtañ xojocña bʌ i yujts'il mi cu'bin, juncojt alʌ tat wacax, yic'ot juncojt tat tʌñʌme', yic'ot wuccojt tʌñʌme' añ jaxto bʌ jump'ejl i ja'bilel, mach bʌ i p'ajomalic,

³ yic'ot c majtañ wen chʌmeñ bʌ juch'bil bʌ harina xajc'ubil bʌ yic'ot olivo aceite; yom wʌcp'ejl kilo cha'añ jujuncojt alʌ tat wacax, yic'ot chʌmp'ejl kilo cha'añ jiñi tat tʌñʌme',

⁴ yic'ot cha'p'ejl kilo cha'añ jujuncojt jiñi wuccojt tʌñʌme';

⁵ yic'ot mi caj la' tsʌnsʌbeñon juncojt tat chivo cha'añ i tojol la' mul cha'añ uts'at mi la' wajñel yic'oton,

⁶ yic'ot ja'el jiñi pulbil bʌ c majtañ mu' bʌ la' wʌc' ti' jujump'ejl uw, yic'ot c majtañ mu' bʌ la' wʌq'ueñon ti jujump'ejl q'uiñ, yic'ot lʌmʌl bʌ c majtañ che' bajche' tsa' c su'beyetla tic mandar, jiñʌch xojocña bʌ i yujts'il pulbil bʌ c majtañ.”

⁷ “Che' ti' lujump'ejlel q'uiñ che' ti' wucp'ejlel uw, mi caj la' mel ch'ujul bʌ tempa bʌ, cha'añ mi la' peq'uesan la' bʌ tic tojlel: mach yomic mi la' cha'len e'tel.

⁸ Ti jiñi q'uiñ mi caj la' wʌq'ueñon pulbil bʌ c majtañ xojocña bʌ i yujts'il mi cu'bin, jiñʌch juncojt alʌ tat wacax, yic'ot juncojt tat tʌñʌme', yic'ot wuccojt tʌñʌme' añ jaxto bʌ jump'ejl i ja'bilel mach bʌ i p'ajomalic.

⁹ Jiñi c majtañ tac jiñʌch: wen chʌmeñ bʌ juch'bil harina xajc'ubil bʌ yic'ot olivo aceite, yom wʌcp'ejl kilo cha'añ jujuncojt alʌ tat wacax, yic'ot chʌmp'ejl kilo cha'añ jiñi tat tʌñʌme',

¹⁰ yic'ot cha'p'ejl kilo cha'añ jujuncojt jiñi wuccojt tʌñʌme';

¹¹ yic'ot juncojt tat chivo cha'añ i tojol la' mul, yic'ot jiñi majtañʌl mu' bʌ la' wʌc' che' ti' q'uiñilel i ñusʌntel la' mul, yic'ot jiñi majtañʌl mu' bʌ la' pulbeñon ti jujump'ejl q'uiñ, yic'ot jiñi wen juch'bil bʌ harina yic'ot lʌmʌl tac bʌ c majtañ.”

¹² “Che' ja'el che' ti' jo'lujump'ejlel q'uiñ che' ti' wucp'ejlel uw mi caj la' mel ch'ujul bʌ tempa bʌ, cha'añ mi caj la' mel wucp'ejl q'uiñ ñuc bʌ q'uiñijel tic tojlel: mach yomic mi la' cha'len e'tel.

¹³ Mi caj la' wʌq'ueñon pulbil bʌ c majtañ xojocña bʌ i yujts'il mi cu'bin: yom uxlujuncojt alʌ tat wacax, yic'ot cha'cojt tat tʌñʌme', yic'ot chʌnlujuncojt tʌñʌme' añ jaxto bʌ jump'ejl i ja'bilel mach bʌ i p'ajomalic.

¹⁴ Jiñi c majtañ tac jiñʌch: wen chʌmeñ bʌ juch'bil bʌ harina xajc'ubil bʌ yic'ot olivo aceite, yom wʌcp'ejl kilo cha'añ jujuncojt jiñi uxlujuncojt alʌ tat wacax, yic'ot chʌmp'ejl kilo cha'añ jujuncojt tat tʌñʌme',

¹⁵ yic'ot cha'p'ejl kilo cha'añ jujuncojt jiñi chʌnlujuncojt tʌñʌme';

¹⁶ yic'ot juncojt tat chivo cha'añ i tojol la' mul, yic'ot jiñi pulbil bʌ c majtañ mu' bʌ la' wʌc' ti jujump'ejl q'uiñ, yic'ot jiñi wen chʌmeñ bʌ juch'bil bʌ harina, yic'ot jiñi lʌmʌl tac bʌ c majtañ.”

¹⁷ “Che' ti' cha'p'ejlel q'uiñ, mi caj la' wʌq'ueñon lajchʌncojt alʌ tat wacax, yic'ot cha'cojt tat tʌñʌme', yic'ot chʌnlujuncojt tʌñʌme' añ jaxto bʌ jump'ejl i ja'bilel, mach bʌ i p'ajomalic,

¹⁸ temel yic'ot c majtañ tac wen chʌmeñ bʌ juch'bil bʌ harina yic'ot c majtañ lʌmʌl tac bʌ, cha'añ jiñi jujuncojt alʌ tat wacax, yic'ot jujuncojt tat tʌñʌme', yic'ot jujuncojt tʌñʌme', che' bajche' c'amel yom cha'añ jujuncojt alʌc'ʌl che' bajche' tsa' c su'beyetla tic Mandar;

¹⁹ yic'ot yom juncojt tat chivo cha'añ i tojol la' mul, yic'ot jiñi pulbil bʌ c majtañ mu' bʌ la' wʌc' ti jujump'ejl q'uiñ, yic'ot melbil bʌ harina yic'ot jiñi lʌmʌl bʌ c majtañ.”

²⁰ “Che' ti yuxp'ejlel q'uiñ, mi caj la' wʌq'ueñon junlujuncojt alʌ tat wacax, yic'ot cha'cojt tat tʌñʌme', yic'ot chʌnlujuncojt tʌñʌme' añ jaxto bʌ jump'ejl i ja'bilel, mach bʌ i p'ajomalic,

²¹ temel yic'ot c majtañ tac melbil bʌ ti harina yic'ot c majtañ lʌmʌl tac bʌ, cha'añ jiñi jujuncojt alʌ tat wacax, yic'ot jujuncojt tat tʌñʌme', yic'ot jujuncojt tʌñʌme', che' bajche' c'amel yom cha'añ jujuncojt alʌc'ʌl che' bajche' tsa' c su'beyetla tic Mandar;

²² yic'ot yom juncojt tat chivo cha'añ i tojol la' mul, yic'ot jiñi pulbil bʌ c majtañ mu' bʌ la' wʌc' ti jujump'ejl q'uiñ, yic'ot melbil bʌ harina yic'ot jiñi lʌmʌl bʌ c majtañ.”

²³ “Che' ti' chʌmp'ejlel q'uiñ, mi caj la' wʌq'ueñon junlujuncojt alʌ tat wacax, yic'ot cha'cojt tat tʌñʌme', yic'ot chʌnlujuncojt tʌñʌme' añ jaxto bʌ jump'ejl i ja'bilel, mach bʌ i p'ajomalic,

²⁴ temel yic'ot c majtañ tac melbil bʌ ti harina yic'ot c majtañ lʌmʌl tac bʌ, cha'añ jiñi jujuncojt alʌ tat wacax, yic'ot jujuncojt tat tʌñʌme', yic'ot jujuncojt tʌñʌme', che' bajche' c'amel yom cha'añ jujuncojt alʌc'ʌl che' bajche' tsa' c su'beyetla tic Mandar;

²⁵ yic'ot yom juncojt tat chivo cha'añ i tojol la' mul, yic'ot jiñi pulbil bʌ c majtañ mu' bʌ la' wʌc' ti jujump'ejl q'uiñ, yic'ot melbil bʌ harina yic'ot jiñi lʌmʌl bʌ c majtañ.”

²⁶ “Che' ti' jo'p'ejlel q'uiñ, mi caj la' wʌq'ueñon boloncojt alʌ tat wacax, yic'ot cha'cojt tat tʌñʌme', yic'ot chʌnlujuncojt tʌñʌme' añ jaxto bʌ jump'ejl i ja'bilel, mach bʌ i p'ajomalic,

²⁷ temel yic'ot c majtañ tac melbil bʌ ti harina yic'ot c majtañ lʌmʌl tac bʌ, cha'añ jiñi jujuncojt alʌ tat wacax, yic'ot jujuncojt tat tʌñʌme', yic'ot jujuncojt tʌñʌme', che' bajche' c'amel yom cha'añ jujuncojt alʌc'ʌl che' bajche' tsa' c su'beyetla tic Mandar;

²⁸ yic'ot yom juncojt tat chivo cha'añ i tojol la' mul, yic'ot jiñi pulbil bʌ c majtañ mu' bʌ la' wʌc' ti jujump'ejl q'uiñ, yic'ot melbil bʌ harina yic'ot jiñi lʌmʌl bʌ c majtañ.”

²⁹ “Che' ti' wʌcp'ejlel q'uiñ, mi caj la' wʌq'ueñon waxʌccojt alʌ tat wacax, yic'ot cha'cojt tat tʌñʌme', yic'ot chʌnlujuncojt tʌñʌme' añ jaxto bʌ jump'ejl i ja'bilel, mach bʌ i p'ajomalic,

³⁰ temel yic'ot c majtañ tac melbil bʌ ti harina yic'ot c majtañ lʌmʌl tac bʌ, cha'añ jiñi jujuncojt alʌ tat wacax, yic'ot jujuncojt tat tʌñʌme', yic'ot jujuncojt tʌñʌme', che' bajche' c'amel yom cha'añ jujuncojt alʌc'ʌl che' bajche' tsa' c su'beyetla tic Mandar;

³¹ yic'ot yom juncojt tat chivo cha'añ i tojol la' mul, yic'ot jiñi pulbil bʌ c majtañ mu' bʌ la' wʌc' ti jujump'ejl q'uiñ, yic'ot melbil bʌ harina yic'ot jiñi lʌmʌl bʌ c majtañ.”

³² “Che' ti' wucp'ejlel q'uiñ, mi caj la' wʌq'ueñon wuccojt alʌ tat wacax, yic'ot cha'cojt tat tʌñʌme', yic'ot chʌnlujuncojt tʌñʌme' añ jaxto bʌ jump'ejl i ja'bilel, mach bʌ i p'ajomalic,

³³ temel yic'ot c majtañ tac melbil bʌ ti harina yic'ot c majtañ lʌmʌl tac bʌ, cha'añ jiñi jujuncojt alʌ tat wacax, yic'ot jujuncojt tat tʌñʌme', yic'ot jujuncojt tʌñʌme', che' bajche' c'amel yom cha'añ jujuncojt alʌc'ʌl che' bajche' tsa' c su'beyetla tic Mandar;

³⁴ yic'ot yom juncojt tat chivo cha'añ i tojol la' mul, yic'ot jiñi pulbil bʌ c majtañ mu' bʌ la' wʌc' ti jujump'ejl q'uiñ, yic'ot melbil bʌ harina yic'ot jiñi lʌmʌl bʌ c majtañ.”

³⁵ “Che' ti waxʌcp'ejl q'uiñ jiñʌch ch'ujul bʌ q'uiñijel: mach yomic mi la' cha'len e'tel.

³⁶ Mi caj la' wʌq'ueñon pulbil bʌ c majtañ, xojocña bʌ i yujts'il mi cu'bin, juncojt alʌ tat wacax, yic'ot juncojt tat tʌñʌme', yic'ot wuccojt tʌñʌme' añ jaxto bʌ jump'ejl i ja'bilel, mach bʌ i p'ajomalic,

³⁷ temel yic'ot c majtañ tac melbil bʌ ti harina yic'ot c majtañ lʌmʌl tac bʌ, cha'añ jiñi alʌ tat wacax, yic'ot tat tʌñʌme', yic'ot tʌñʌme' tac, che' bajche' c'amel yom cha'añ jujuncojt alʌc'ʌl che' bajche' tsa' c su'beyetla tic Mandar;

³⁸ yic'ot yom juncojt tat chivo cha'añ i tojol la' mul, yic'ot jiñi pulbil bʌ c majtañ mu' bʌ la' wʌc' ti jujump'ejl q'uiñ, yic'ot melbil bʌ harina yic'ot jiñi lʌmʌl bʌ c majtañ.”

³⁹ “Jiñʌch c majtañ tac mu' bʌ caj la' wʌq'ueñon che' ti yorajlel mi la' mel ch'ujul bʌ q'uiñijel tac, yic'ot che' mi la' wʌq'ueñon xuc'ul bʌ la' t'añ yic'ot c majtañ tilem bʌ ti la' pusic'al, yic'ot pulbil bʌ c majtañ tac, yic'ot c majtañ melbil tac bʌ ti harina, yic'ot lʌmʌl bʌ c majtañ tac, yic'ot c majtañ mu' bʌ la' wʌq'ueñon cha'añ i ñʌch'tʌlel la' pusic'al.”

⁴⁰ Che' jiñi Moisés tsi' su'be israelob pejtelel che' bajche' tsi' yʌc'ʌ mandar lac Yum.