Genesis 48 - Jiñi Tsiji' bʌ Wen T'añ cha'añ Estudio

Jacob tsi' yʌq'ueyob i yutslel i t'añ Efraín yic'ot Manasés

¹ Che' ñumeñix cha'p'ejl uxp'ejl q'uiñ, tsi' su'beyob José: —C'am a tat. Jiñi cha'añ José tsi' pʌyʌ majlel jiñi cha'tiquil i yalobilob, Manasés yic'ot Efraín.

² Che' jiñi tsa' su'benti Jacob: —Wʌ'an a walobil José, woli i tilel i q'uelet. Israel tsi' cha'le wersa ch'ojyel, tsa' buchle ti' wʌyib,

³ tsi' su'be José: —Jiñi Dios mach bʌ añic i p'isol i p'ʌtʌlel, tsi' pʌsbeyon i bʌ ya' ti Luz am bʌ ti' lumal Canaán, tsi' yʌq'ueyon i yutslel i t'añ,

⁴ tsi' su'beyon: “Mi caj c p'ojlesañet, mi caj c p'ojlesan a walobilob, mi caj a wochel ti' tat ca'bʌl wiñicob x'ixicob ti' mojt ti' mojt; mi caj cʌq'ueñob ili lum a p'olbal maxto bʌ añic tsi' yilayob pañimil, i cha'añobʌch mi caj i yajñel ti pejtelel ora.”

⁵ Wʌle jiñi cha'tiquil a walobilob Efraín yic'ot Manasés tsa' bʌ i yilayob pañimil ti' lumal Egipto che' maxto julemoñic ba' añet, c cha'añobix; che'ʌch ja'el Rubén yic'ot Simeón, c cha'añobʌch mi cajel.

⁶ Jiñi a walobilob mu' bʌ caj i tilelob ti wi'il a cha'añobʌch, mi caj i t'oxbentelob i chu'bʌañ i tat ti' c'aba' Efraín yic'ot ti' c'aba' Manasés.

⁷ Che' bʌ tsa' loq'uiyon ti Padan-aram, tsa' chʌmi Raquel ti' lumal Canaán ya' ti bij che' ñajt to añ Efrata; tsa' c mucu ya' ti' bijlel Efrata, jiñʌch Belén.

⁸ Jiñi cha'añ Israel tsi' q'uele i yalobilob José, tsi' yʌlʌ: —¿Majquiyob iliyi?

⁹ José tsi' jac'be i tat: —Jiñʌch calobilob tsa' bʌ i yʌq'ueyon Dios ti ili lum. —Lʌc'tesañob tilel ba'añon cha'añ mi cʌq'ueñob i yutslel c t'añ, —che'en Israel.

¹⁰ Wolix ti yajpel i wut Israel come ñoxix, ma'añix tsa' wen c'oti i wut. José tsi' lʌc'tesa tilel i yalobilob ba'añ Israel, Israel tsi' ts'ujts'uyob yic'ot tsi' meq'ueyob.

¹¹ Israel tsi' su'be José: —Ma'añix tsa' c chʌn ña'ta j q'uel a wut, pero wʌle Dios woli' yʌq'ueñon j q'uel a walobilob ja'el.

¹² Jiñi cha'añ José tsi' chucuyob loq'uel i yalobilob ti' ya' Israel, tsi' c'uchchoco i bʌ ti lum ya' ti' tojel i tat.

¹³ José tsi' pʌyʌ tilel ti' cha'ticlel i yalobilob; Efraín ti ñoj bʌ i c'ʌb, ba'añ ts'ej bʌ i c'ʌb Israel, Manasés ti ts'ej bʌ i c'ʌb, ba'añ ñoj bʌ i c'ʌb Israel; tsi' lʌc'tesayob tilel ba'añ i tat.

¹⁴ Israel tsi' sʌts'ʌ i c'ʌb, tsi' c'ʌcʌ ñoj bʌ i c'ʌb ti' jol Efraín jiñi ijts'iñʌl bʌ, ixcu i ts'ej bʌ i c'ʌb tsi' c'ʌcʌ ti' jol Manasés. Che'ʌch tsi' jele i c'ʌb, anquese Manasés jiñʌch jiñi ascuñʌl bʌ.

¹⁵ Jacob tsi' yʌq'ue José i yutslel i t'añ, tsi' yʌlʌ: “Jiñi Dios tsa' bʌ i tsajcayob majlel c tatob, Abraham yic'ot Isaac, jiñʌch tsa' bʌ i we'sayon che' bʌ tsa' quila pañimil c'ʌlʌl wʌle,

¹⁶ jiñi Ángel tsa' bʌ i loc'sayon ti pejtelel wocol, la' i yʌq'ueñob i wenlel ili ch'itoñob. La' i ch'ʌmbeñoñob j c'aba' yic'ot i c'aba' c tatob, Abraham yic'ot Isaac, la' wen p'ojliquetla ti pañimil.”

¹⁷ Che' bʌ tsi' q'uele José woli' c'ʌc jiñi ñoj bʌ i c'ʌb i tat ti' jol Efraín, ma'añic tsi' mula; tsi' chucbe loq'uel i c'ʌb i tat ti' jol Efraín, tsi' c'axtesʌbe ti' jol Manasés.

¹⁸ José tsi' su'be i tat: —Mach che'iqui c tat, come jiñi ascuñʌl bʌ jiñʌch Manasés; ac'ʌ ñoj bʌ a c'ʌb ti' jol.

¹⁹ Pero i tat ma'añic tsi' jac'ʌ, che' jiñi tsi' jac'be: —Cujilʌch, calobil, cujilʌch; che' ja'el mi caj i yochel ti' tat ca'bʌl wiñicob x'ixicob yic'ot ñuc mi caj i majlel ja'el; pero ñumen ñuc mi caj i majlel i yijts'in, jiñi i p'olbal mi caj ti p'ojlel ti ñuc bʌ tejclum tac ti' mojt ti' mojt.

²⁰ Tsi' yʌq'ueyob i yutslel i t'añ ti jiñi q'uiñ, tsi' yʌlʌ: —Ti la' c'aba' mi caj i yʌq'ueñtelob i yutslel i t'añ i yalobilob Israel, mi caj i yʌlob: “La' i coltañet Dios che' bajche' tsi' colta Efraín yic'ot Manasés”. Che'ʌch tsi' yʌc'ʌ ti ñaxan Efraín, ti wi'il Manasés.

²¹ Ti wi'il Israel tsi' su'be José: —Joñon mi caj c chʌmel, pero Dios mi caj i yajñel la' wic'ot, mi caj i cha' pʌyetla sujtel ti' lumal la' ñojte'elob.

²² Joñon mi cʌq'ueñet jumpejt lum ñumen bajche' mi cʌq'uen a werañob, jiñʌch tsa' bʌ c chilbeyob amorreojob ti quespada yic'ot tic jalʌjb.