Exodo 40 - Jiñi Tsiji' bʌ Wen T'añ cha'añ Estudio

Moisés tsi' wa'choco Tabernáculo

¹ Che' jiñi lac Yum tsi' pejca Moisés, tsi' su'be:

² “Ti ñaxan bʌ q'uiñ ti jiñi ñaxan bʌ uw yom ma' wa'chocon jiñi Tabernáculo ba' mi la' tempan la' bʌ;

³ yom ma' wʌc' jiñi Arca ba' lotbil jiñi lujump'ejl mandar yic'ot yom ma' mos ti pisil.

⁴ Yom ma' wotsan jiñi mesa, yic'ot yom ma' wʌc' ya' ba' yom mi' yajñel; yom ma' wotsan ja'el jiñi yajñib c'ajc yic'ot yom ma' tsuc'ben i c'ʌc'al jiñi lámpara tac.

⁵ Yom ma' wʌc' jiñi pulʌntib melbil bʌ ti oro cha'añ jiñi pom ti' tojel jiñi Arca yic'ot yom ma' joc'chocon jiñi pisil ya' ti ti' jiñi Tabernáculo ba' mi' yochelob.

⁶ Ti wi'il yom ma' wa'chocon jiñi pulʌntib ba' mi' pulel jiñi majtañʌl ya' ti' tojel ba' mi' yochelob ti Tabernáculo ba' mi' tempañob i bʌ.

⁷ Ti wi'il yom ma' wʌc' ti xinlʌpʌl i yajñib ja' ya' ti jiñi Tabernáculo ba' mi' tempañob i bʌ yic'ot ba' mi' pulel jiñi majtañʌl yic'ot yom ma' wotsʌben i ya'lel.

⁸ Ti yujtibal, yom ma' mel jiñi patio ya' ti' joytʌlel yic'ot yom ma' joc'chocon jiñi cortina ya' ti ti' jiñi patio.

⁹ Ti wi'il yom ma' ch'ʌm jiñi olivo aceite cha'añ bojñibʌl, yom ma' bon jiñi Tabernáculo yic'ot pejtelel chuqui tac añ ya'i; yom ma' laj sʌc-esan pejtelel chuqui tac mi' c'ʌjñel cha'añ ch'ujul mi' yajñel.

¹⁰ Yom ma' bon ja'el ti olivo aceite jiñi pulʌntib ba' mi' pulel majtañʌl yic'ot pejtelel chuqui tac mi' c'ʌjñel; yom ma' sʌc-esan jiñi pulʌntib cha'añ c'ax ch'ujul mi' yajñel.

¹¹ Che' ja'el yom ma' bon ti olivo aceite i yajñib ja', yic'ot i buchlib cha'añ sʌc mi yajñel.

¹² Yom ma' pʌy majlel Aarón yic'ot i yalobilob ba'añ i ti' Tabernáculo ba' mi tempañob i bʌ yic'ot yom mi' pocob i bʌ ti ja'.

¹³ Yom ma' su'ben i lʌp ch'ujul bʌ i bujc Aarón, yom ma' bon ti olivo aceite yic'ot yom ma' sʌc-esan, cha'añ mi' melbeñon que'tel ti motomaj.

¹⁴ Ti wi'il yom ma' pʌybeñob tilel i yalobilob Aarón cha'añ ma' lʌpbeñob pʌl bʌ i pislelob;

¹⁵ yom ma' boñob ja'el che' bajche' tsa' melbe i tat, cha'añ mi' melbeñoñob que'tel ti motomaj. Che'ʌch yom mi' bojñelob jiñi motomajob ti' tojlel i p'olbalob c'ʌlʌl ti pejtelel ora.”

¹⁶ Moisés tsi' laj mele che' bajche' tsi' su'be lac Yum.

¹⁷ Che' ti ñaxan bʌ q'uiñ ti ñaxan bʌ uw, che' wolix i majlel ti' cha'p'ejlel ja'b i loq'uelob ti Egipto, tsa' wa'choconti jiñi Tabernáculo.

¹⁸ Moisés tsi' wa'choco jiñi Tabernáculo, tsi' buchchocobe i c'ʌclib tac, tsi' yʌq'ue i tablajlel tac, tsi' yʌq'ue i te'el tac yic'ot tsi' yʌc'ʌ ti wa'chocontel i yoyel tac.

¹⁹ Tsi' tich'i jiñi pisil tac ti' pam jiñi Tabernáculo yic'ot tsi' yʌc'ʌ yam bʌ junlajm jiñi pisil ti' pam che' bajche' lac Yum tsi' su'be Moisés.

²⁰ Ti wi'il tsi' yotsa jiñi lujump'ejl mandar ya' ti' mal jiñi Arca; tsi' yotsa ja'el jiñi bara tac ya' ti' mal jiñi Arca, yic'ot ya' ti' pam jiñi Arca tsi' yʌq'ue i majc.

²¹ Ti wi'il tsi' yotsa jiñi Arca ya' ti' mal jiñi Tabernáculo, tsi' yʌc'ʌ ja'el jiñi colem bʌ pisil cha'añ mi' mʌctañ jiñi Arca ba' lotbil i T'añ lac Yum, che' bajche' lac Yum tsi' yʌq'ue mandar Moisés.

²² Tsi' yʌc'ʌ jiñi mesa ya' ti Tabernáculo ba' mi' tempañob i bʌ am bʌ ti' tojel norte ya' ba' joc'ol jiñi pisil mu' bʌ i t'ox jiñi mal ba'añ jiñi ch'ujul bʌ ajñibʌl,

²³ yic'ot ya' ti mesa tsi' yʌc'ʌ jiñi waj ti' tojlel lac Yum, che' bajche' lac Yum tsi' yʌq'ue mandar Moisés.

²⁴ Tsi' yʌc'ʌ ja'el i ts'ʌjbib c'ajc ya' ti' mal jiñi Tabernáculo ba' mi' tempañob i bʌ, ti' tojel jiñi mesa ti' tojel sur ba' joc'ol jiñi cortina,

²⁵ yic'ot tsi' tsuc'u jiñi lámpara tac ti' tojlel lac Yum, che' bajche' lac Yum tsi' yʌq'ue mandar Moisés.

²⁶ Moisés tsi' yʌc'ʌ ja'el jiñi pulʌntib melbil bʌ ti oro ya' ti Tabernáculo ba' mi' tempañob i bʌ ti' tojel jiñi joc'ol bʌ pisil,

²⁷ yic'ot tsi' pulu ti pulʌntib jiñi xojocña bʌ pom, che' bajche' lac Yum tsi' yʌq'ue mandar Moisés.

²⁸ Che' ja'el tsi' joc'choco jiñi cortina ya' ti ti' jiñi Tabernáculo.

²⁹ Yic'ot tsi' yʌc'ʌ jiñi pulʌntib ba' mi' pulel jiñi majtañʌl ya' ti' tojel ba' mi' yochelob ya' ti Tabernáculo ba' mi tempañob i bʌ, yic'ot ya'i tsi' pulu jiñi alʌc'ʌl, jiñʌch pulbil bʌ majtañʌl yic'ot majtañʌl melbil bʌ ti juch'bil bʌ harina, che' bajche' lac Yum tsi' yʌq'ue mandar Moisés.

³⁰ Tsi' yʌc'ʌ ja'el i yajñib ja' ti xinlʌpʌl ya' ti Tabernáculo ba' mi' tempañob i bʌ yic'ot ba'añ jiñi pulʌntib, yic'ot tsi' but'u ti ja' cha'añ mi' pocob i bʌ.

³¹ Ya'i tsi' pocoyob i c'ʌb yic'ot i yoc jiñi Moisés, Aarón yic'ot i yalobilob.

³² Che' ba' ora mi' yochelob ya' ti Tabernáculo ba' mi' tempañob i bʌ yic'ot che' ba' ora mi' lʌc'tesañob i bʌ ya' ti pulʌntib, mi' ñaxan pocob i bʌ, che' bajche' lac Yum tsi' yʌq'ue mandar Moisés.

³³ Ti' yujtibal tsi' wa'chocobe i mʌjquil jiñi patio ya' ti' joytʌlel jiñi Tabernáculo yic'ot ya' ti pulʌntib, yic'ot tsi' joc'choco jiñi cortina ya' ti ti' jiñi patio. Che'ʌch tsa' ujti i mel Moisés pejtelel jiñi e'tel.

Tsa' bujt'i jiñi Tabernáculo ti' ñuclel lac Yum

³⁴ Jiñi tocal tsi' moso jiñi Tabernáculo ba' mi' tempañob i bʌ, ixcu i ñuclel lac Yum tsi' but'u jiñi Tabernáculo.

³⁵ Ma'añix tsa' mejli ti ochel Moisés ya' ti Tabernáculo ba' mi' tempañob i bʌ, come jiñi tocal tsi' moso yic'ot tsa' bujt'i ti' ñuclel lac Yum.

³⁶ Che' ba ora jiñi tocal mi' cha' ch'ujyel letsel ya' ti' pam jiñi Tabernáculo, jiñi israelob mi' cha' techob i xʌmbal;

³⁷ pero che' maxto añic mi' ch'ujyel letsel jiñi tocal, ma'añic mi' ñijcañob i bʌ jinto ti jiñi q'uiñ che' mi' ch'ujyel letsel jiñi tocal,

³⁸ come i tocal lac Yum ya'añ che' ti q'uiñil ya' ti' pam jiñi Tabernáculo, ixcu che' ti ac'ʌlel añ c'ajc ti jiñi tocal cha'añ mi' pʌs i c'ʌc'al ti' tojlel pejtelel israelob. Che'ʌch tsa' ujti ti pejtelel i xʌmbalob jiñi israelob.