Exodo 25 - Jiñi Tsiji' bʌ Wen T'añ cha'añ Estudio

4. CHE' BAJCHE' YOM MI' MEJLEL TABERNÁCULO ( 25.1—31.17 ) Jiñi majtañʌl cha'añ Tabernáculo

¹ Lac Yum tsi' pejca Moisés tsi' su'be:

² Su'beñob jiñi israelob cha'añ mi' yʌq'ueñoñob c majtañ. La' i yʌc'ob che' bajche' tilemob ti' pusic'al, mach cha'añic xic'bebilob pero yom ti jump'ejlob jach i pusic'al.

³ Jiñʌch ili majtañʌl tac mu' bʌ cajel c ch'ʌmbeñetla: jiñʌch oro, plata, cobre,

⁴ yʌjyʌx bʌ pisil, chʌccojan bʌ pisil, chʌchʌc bʌ pisil, wen bʌ lino bʌ pisil, yic'ot i tsutsel tac chivo,

⁵ yic'ot i pʌchʌlel tac i tat tʌñʌme' ts'ajbil bʌ ti chʌchʌc bʌ i bojñil, i pʌchʌlel cojtom, acacia te',

⁶ olivo aceite cha'añ c'ajc, xojocña bʌ i yujts'il i xajb olivo aceite cha'añ mi' mujlel ti' jol motomaj yic'ot i xajb jiñi xojocña bʌ i yujts'il pom,

⁷ xajlel i c'aba' ónice, yic'ot ujʌl cha'añ mi' ts'istʌl ochel ti' bujc motomajob i c'aba' efod yic'ot cha'añ mi yʌjq'uel ya' ti' tajñ i bujc.

⁸ Com mi' mel israelob jump'ejl ch'ujul bʌ ajñibʌl cha'añ mic chumtʌl yic'otob.

⁹ Che' bajche' mi caj c pʌsbeñet, che'ʌch mi' cajel a melbeñon jiñi Tabernáculo yic'ot pejtelel jiñi yom tac bʌ c'ʌñol.

Jiñi Arca ba' mi' lojtel i T'añ Dios

¹⁰ Yom mi la' c'ʌn acacia te' cha'añ i melol Arca. Yom i tamlel jump'ejl metro yic'ot junc'al centímetro, yic'ot 65 centímetro i xujc, yic'ot 65 centímetro i chañlel.

¹¹ Yom mi la' tep' ti puro oro ya' ti' mal yic'ot ti' pat. Yom mi la' wʌc' ti' joytʌlel i ti' ti'il i xujc tac, melbil bʌ ti puro oro ja'el.

¹² Yom mi la' wulmesan oro cha'añ mi la' mel chʌmp'ejl xotol tac bʌ oro cha'añ ma' wʌc' ya' ti jujunwejl i xujc. Yom cha'p'ejl ti junwejl yic'ot yam bʌ cha'p'ejl ti yam bʌ junwejl i xujc.

¹³ Yom mi la' mel bara tac ja'el melbil bʌ ti te' i c'aba' acacia. Yom mi la' tep' ti oro.

¹⁴ Yom mi la' juc ochel jiñi barajte' tac ti jujunwejl i xujc jiñi Arca ba'añ jiñi xotol tac bʌ melbil bʌ ti oro, cha'añ mi la' c'ʌn la' q'uech majlel jiñi Arca.

¹⁵ Jiñi barajte' tac ya' yom mi' cʌytʌl ti jiñi xotol tac bʌ oro, mach yomic mi' loc'sʌntel.

¹⁶ Ya' ti' mal jiñi Arca, mi caj a lot jiñi Wen T'añ mu' bʌ caj cʌq'ueñet.

¹⁷ Yom mi la' melben i majc jiñi Arca ti puro oro, yom i tamlel jump'ejl metro yic'ot lujump'ejl centímetro, yom i xujc 65 centímetro.

¹⁸ Yom mi la' mel ja'el cha'tiquil i yejtal ángelob ti puro oro, cujbil bʌ ti martillo, mu' bʌ i yajñel ti' cha'wejlel i xujc jiñi Arca.

¹⁹ Yom mi la' wʌc' juntiquil querubín ti jujunwejl tsuyul bʌ mi cʌytʌl ya' ti Arca ba' mic c ñusʌbeñob i mul wiñicob x'ixicob.

²⁰ Jiñi yejtal ángelob yom tich'bil i wich' ya' ti' pam jiñi Arca, cha'añ mi' mosben i pam ya' ba mic ñusʌbeñob i mul wiñicob x'ixicob, jiñi i wutob yom mi' q'uelob ya' ba' mi caj c ñusʌbeñob i mul wiñicob x'ixicob.

²¹ Che' ujtemix jiñi Arca yom ma' wʌq'uen i majc ya' ti' pam. Mi caj a wotsan ti' mal Arca jiñi Wen T'añ mu' bʌ caj cʌq'ueñet.

²² Ya'i mi caj c pʌsbeñet c bʌ. Mi caj pejcañet ya' ti' pam ba' mic ñusan mulil, ya' ti' yojlil jiñi cha'tiquil i yejtal querubiñob am bʌ ti' pam jiñi Arca. Pejtelel jiñi mandar tac mu' bʌ c su'beñet yom mi' jac'ob jiñi israelob.

Jiñi mesa cha'añ waj

²³ Yom mi la' mel jump'ejl mesa ti acacia te'. I tamlel yom 90 centímetro, yom 45 centímetro i xujc, yom 65 centímetro i chañlel.

²⁴ Yom mi la' tep' ti puro oro. Tep'bil yom ja'el ti' joytʌlel i xujc tac i ti' ti'il ti puro oro.

²⁵ Yom mi la' melben ja'el i ch'ʌjlil i xujc tac jiñi mesa ti joytʌlel che' bajche' 7 centímetro i ñuclel. Mele ja'el yam bʌ i ch'ʌjlil i ti' ti'il i xujc tac ti oro pero mero ch'och'oc jax yom.

²⁶ Yom mi la' mel chʌnxojt oro cha'añ mi la' wʌc' ya' ti jujunwejl i xujc jiñi mesa. Yom junxojt ya' ti jujunts'ijt i yoc jiñi mesa.

²⁷ Jiñi xotol tac bʌ mi caj i yajñel ya' ti' xujc tac ba' mi' mejlel ti ochel jiñi bara tac, cha'añ mi' mejlel ti ch'ujyel majlel jiñi mesa.

²⁸ Yom mi la' c'ʌn acacia te' ti' melol jiñi bara tac. Tep'ela ti oro, jiñʌch mu' bʌ i cajel la' c'ʌn la' ch'ʌm majlel jiñi mesa.

²⁹ Che' ja'el yom mi la' mel ti oro jiñi plato tac, yic'ot cuchara tac, yic'ot jarra tac, yic'ot colem taza tac cha'añ lʌmʌl tac bʌ majtañʌl.

³⁰ Yom mi la' wʌc' jiñi waj ya' ti mesa cha'añ mi' yajñel tic tojlel ti pejtelel ora.

Candelabro melbil bʌ ti oro

³¹ Mi caj la' mel jump'ejl i c'ʌclib lámpara ba' mi' ts'ʌjbel c'ajc tac, yom melbil ti puro oro. Yom mi la' cuj ti martillo i c'ʌclib yic'ot i te'el jiñi lámpara yic'ot ja'el i copajlel tac yic'ot i ch'ʌjlil tac.

³² Yom wʌcts'ijt i c'ʌb i te'el i yajñib c'ajc tac, uxts'ijt i c'ʌb ti jujunwejl i te'el.

³³ Yom uxp'ejl i ch'ʌjlil lajal bajche' i ñich jiñi almendro ti jujunts'ijt i c'ʌb. Ti jujump'ejl i ch'ʌjlil yom añ che' bajche' i yutbal i ñich pimel.

³⁴ Ya' ti' te'el i buchlib c'ajc yom chʌmp'ejl copa che' lajal bajche' i ñich almendro temel yic'ot i ch'ʌjlil tac.

³⁵ Che' ja'el yom jump'ejl che' bajche' i ñich pimel ya' ti' ñi' tac i c'ʌb yic'ot ya' ti ye'bal tac i c'ʌb.

³⁶ Pejtelel i yutbal tac yic'ot i c'ʌb tac, yic'ot i te'el, yom melol ti junq'uejl jach oro cujbil bʌ ti martillo.

³⁷ Mi caj a mel wucts'ijt ba' mi' tsujq'uel jiñi c'ajc, cha'añ mi la' tsuc' cha'añ mi' pʌs i c'ʌc'al.

³⁸ Che' ja'el jiñi mu' bʌ la' c'ʌn cha'añ mi la' yʌp jiñi c'ajc yic'ot i yajñib i tʌñʌl jiñi c'ajc, yom melbil ti puro oro.

³⁹ Yom mi la' c'ʌn uxlujump'ejl i cha'c'al (33) kilo puro oro cha'añ pejtelel mu' bʌ i c'ʌjñel cha'añ ba' mi' ts'ʌjbel jiñi c'ajc.

⁴⁰ Wen q'uele bajche' yilal wolic pʌsbeñet cha'añ che'ʌch mi caj la' mel pejtelel che' bajche' wolic pʌsbeñet ti ili wits.