Exodo 2 - Jiñi Tsiji' bʌ Wen T'añ cha'añ Estudio

Moisés tsi' yila pañimil

¹ Juntiquil wiñic bʌ i p'olbal Leví tsi' pʌyʌ i yijñam loq'uem bʌ ti' p'olbal Leví ja'el.

² Jiñi x'ixic tsa' caji cʌntan i yalobil, tsi' yʌc'ʌ ti pañimil juntiquil ch'itoñ. Che' bʌ tsi' q'uele i t'ojol jax jiñi ch'itoñ, tsi' mucu uxp'ejl uw.

³ Che' bʌ ma'añix tsa' mejli i chʌn muc i yalobil, tsi' chajpa chiquib, tsi' boño ti asfalto yic'ot i yetsel te', tsi' yotsa i yalobil ti' mal jiñi chiquib, che' jiñi tsi' yʌc'ʌ ti' yojlil amʌyol am bʌ ti ti' ja',

⁴ pero juntiquil i chich tsa' caji i ñajti q'uel chuqui mi' caj ti ujtel.

⁵ Jiñi xch'oc bʌ i yalobil faraón tsa' c'oti ti ts'ʌmel ya' ti ja', che' woliyob ti xʌmbal ya' ti ti' ja' jiñi xch'oco' bʌ i yaj e'tel, tsi' q'uele jiñi chiquib ti' mal jiñi amʌyol, tsi' su'be juntiquil i criada cha'añ mi' ch'ʌmben tilel.

⁶ Che' bʌ tsi' jamʌ jiñi chiquib tsi' q'uele ya'añ alʌ ch'itoñ woli ti uq'uel. Tsi' p'unta, tsi' yʌlʌ: —Jiñʌch i yalobil juntiquil hebreo.

⁷ Jiñi cha'añ i chich jiñi alʌ ch'itoñ tsi' su'be i yalobil faraón: —¿A wom ba mic majlel c pʌybeñet tilel xmec' alʌl ti' tojlel hebreojob cha'añ mi' cosʌbeñet jiñi alʌl?

⁸ —Yom cu —che'en i yalobil faraón. Jiñi xch'oc tsa' majli i pʌy tilel i ña' jiñi alʌl.

⁹ Jiñi i yalobil faraón tsi' su'be i ña' jiñi alʌl: —Pʌyʌ majlel ili alʌl cha'añ ma' cosʌbeñon; mi caj cʌq'ueñet a tojol. Jiñi x'ixic tsi' pʌyʌ majlel jiñi alʌl cha'añ mi' cosan.

¹⁰ Che' bʌ tsa'ix coli jiñi alʌl, i ña' tsi' cha' pʌyʌ tilel ba'añ i yalobil faraón. Ili yalobil faraón tsi' yotsa che' bajche' mero i yalobil, tsi' yotsʌbe i c'aba' Moisés, tsi' yʌlʌ: “Come tsa' c loc'sa ti ja'.”

Moisés tsa' puts'i loq'uel ti Egipto

¹¹ Ti jump'ejl q'uiñ che' wiñiquix Moisés tsa' majli ti xʌmbal ti' tojlel i pi'ʌlob. Tsi' q'uele woliyob ti tsʌts bʌ e'tel i pi'ʌlob, tsi' q'uele juntiquil egipcio woli' jats' juntiquil hebreo.

¹² Jiñi cha'añ Moisés tsi' joy q'uele pañimil, che' bʌ ma'añic majqui woli' q'uel, tsi' tsʌnsa jiñi egipcio, tsi' mucu ti ji'lum.

¹³ Che' ti yijc'ʌlal tsa' cha' loq'ui ti xʌmbal. Awilan, woli' jats'ob i bʌ cha'tiquil hebreojob. Moisés tsi' c'ajtibe jiñi woli bʌ ti jats': —¿Chucoch woli a jats' a pi'ʌl?

¹⁴ Tsi' jac'ʌ: —¿Majqui tsi' wa'chocoyet ti yumʌl tic tojlel lojon cha'añ ma' cha'len meloñel? ¿A wom ba a tsʌnsañon lojon che' bajche' tsa' tsʌnsa jiñi egipcio? Jiñi cha'añ Moisés tsa' caji ti bʌq'uen, tsi' ña'ta: “Tsa'ix tsictiyi jiñi tsa' bʌ c mele.”

¹⁵ Che' bʌ tsi' yu'bi faraón jiñi tsa' bʌ i mele Moisés, tsi' ña'ta i tsʌnsan; pero Moisés tsa' puts'i ti' tojlel faraón, tsa' majli ti chumtʌl ti' lumal Madián. Ya' tsa' buchle ti ti' pozo.

¹⁶ Añ wuctiquil xch'oc bʌ i yalobilob jiñi motomaj ti Madián, tsa' tiliyob ti luch ja' jiñi xch'octacob, tsi' but'uyob i yajñib ja' cha'añ mi' yʌq'ueñ i jap i tʌñʌme' i tat.

¹⁷ Pero tsa' c'otiyob xcʌnta tʌñʌme'ob, tsa' caji i chocob loq'uel jiñi xch'octacob; che' jiñi Moisés tsa' ch'ojyi i coltañ jiñi xch'octacob, tsi' yʌq'ue i jap ja' jiñi tʌñʌme' tac i cha'añob.

¹⁸ Che' bʌ tsa' sujtiyob ti yotot ba'añ i tat i c'aba' Reuel tsi' c'ajtibeyob: —¿Chucoch ora jach tsa' sujtiyetla tilel wʌle?

¹⁹ —Juntiquil wiñic ch'oyol bʌ ti Egipto tsi' coltayon lojon, jiñi cha'añ ma'añic tsa' mejli i mʌctañon lojon jiñi xcʌnta tʌñʌme'ob; che' ja'el jiñi wiñic tsi' luchbeyon lojon ja', tsi' yʌq'ue i jap ja' lac tʌñʌme' —che' tsi' jac'beyob.

²⁰ Reuel tsi' c'ajtibe i yalobilob: —¿Baqui añ? ¿Chucoch tsa' la' wʌc'ʌ ti majlel jiñi wiñic? Pʌyʌla tilel cha'añ mi' c'ux waj.

²¹ Moisés tsi' jac'ʌ chumtʌl ya' ti yotot Reuel, ya'ix tsa' cʌle. Reuel tsi' yʌq'ue Moisés xch'oc bʌ i yalobil i c'aba' Séfora cha'añ i yijñam.

²² Séfora tsi' yʌc'ʌ ti pañimil i yalobil, Moisés tsi' yotsʌbe i c'aba' Gersón, come tsi' yʌlʌ: “Ch'oyolon ti ñajtʌl, mach c lumalic ilayi.”

²³ Che' bʌ tsa' ñumi ca'bʌl q'uiñ, tsa' chʌmi jiñi rey ti Egipto. Jiñi israelob año' bʌ ti Egipto tsi' cha'leyob ajcʌn cha'añ tsʌts bʌ e'tel, tsi' cha'leyob wocol t'añ; Dios tsi' yu'bibeyob i t'añ cha'añ ca'bʌl wocol e'tel.

²⁴ Dios tsi' yu'bibe i yajcʌn israelob, tsi' ña'ta jiñi xuc'ul bʌ i t'añ tsa' bʌ i yʌq'ue Abraham yic'ot Isaac yic'ot Jacob.

²⁵ Dios tsi' q'uele jiñi israelob, tsi' cʌmbeyob i wocol. El: Dios Is 40.18 Elohim Dios Gn 1.1 El-Elyon: C'ax Ñuc Bʌ Dios Gn 14.22 El-Olam: Dios Am Bʌ Ti Pejtelel Ora Gn 21.33 El-Shaddai: Dios Mach Bʌ Añic i P'isol i P'ʌtʌlel Gn 17.1 Adon: C Yum Sal 114.7 Adonai: C Yum Jos 5.14 Yo Soy El que Soy: Joñoñʌch Jiñi Am Bʌ Ex 3.14-15 Jehová Dios: C Yum Dios Gn 2.4. Jehová Elohim: C Yum Dios Sal 81.10 Jehová-sebaot: I Yum Panchan yic'ot Pañimil 1 Sm 1.3 Jehová-jireh: Lac Yum Mu' Bʌ Yʌq'ueñonla Chuqui la Com Gn 22.14 Jehová-nisi: Lac Yum Jiñʌch Lac Bandera Ex 17.15 Jehová-Shalom: Lac Yum jiñʌch lac ñʌch'tʌlel Jue 6.24.