Iberani 8 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pueꞌ Iesu ia miꞌi Tadulako Menómbá Mahile to mopakaróhó dándina Pueꞌ Ala

¹ Ntóáꞌna paturoꞌkiꞌ deꞌe ia miꞌi: ara mpuꞌu miꞌi Tadulako Menómbá Mahile to mehoda tándáꞌ i kuánána pehodaꞌána Pueꞌ Ala i surugáꞌ.

² Ia mewaliꞌ Tadulako Menómbá Mahile to mobágóꞌ i katoroꞌá to magasaꞌ i lalu bambaruꞌ penómbáꞌá to toꞌu to tiꞌara naꞌaró tauna, agáiáná naꞌaró Pueꞌ Ala i surugáꞌ.

³ Upu-upu Tadulako Menómbá Mahile raꞌángkáꞌ bona mohuhuꞌ binataꞌ hai popenómbá to ntániꞌna i Pueꞌ Ala. Noꞌonoꞌ woꞌo, Iesu Tadulako Menómbá Mahile hangaa-ngaa mohuhuꞌ popenómbáNa i Pueꞌ Ala, ia miꞌi wátáNa haduduáNa.

⁴ Ane rápáꞌna ara mani Iesu i duniáꞌ, Ia tiꞌara ina mewaliꞌ tadulako menómbá, láwiꞌ aramoheꞌ tadulako menómbá to mohuhuꞌ popenómbá i Pueꞌ Ala mouláꞌ Paturoꞌna Musa.

⁵ Tadulako menómbá iti mobágóꞌheꞌ i lalu támbi penómbáꞌá to i duniáꞌ deꞌe. Támbi penómbáꞌá iti ara kahibaliána hai apa to ara i surugáꞌ. Onoꞌ miꞌi haneꞌi hangkoia, hangko tiꞌara mani Musa moaró Bambaruꞌ Penómbáꞌá, Pueꞌ Ala mongkóráꞌ i hia, Nauliꞌ, “Nupailalu! Upu-upu iti hangaa-ngaa nubábehi hibali hai apa to Kupopaitaꞌákoꞌ i wongko buluꞌ!”

⁶ Agáiáná deꞌe-deꞌe Pueꞌ Ala mampoweꞌi Iesu bágóꞌ to melumbuꞌ ntepuꞌu kamaroꞌana hangko i pobágóꞌraꞌ tadulako menómbá i duniáꞌ deꞌe, noꞌonoꞌ woꞌo maróhó mani pototowi to woꞌu to natangaꞌ-tangaꞌi Iesu hangko i pototowi to hangkoia to napahaweꞌ nabiꞌ Musa, láwiꞌ ntóáꞌna ia miꞌi dándina Pueꞌ Ala to melumbuꞌ kamaroꞌana.

⁷ Ane rápáꞌna tiꞌara ara kamakuraꞌna pototowiNa to rungu-runguna, ia miꞌi Paturoꞌna Musa, ketiꞌara piꞌi paraluu Pueꞌ Ala mopaꞌara pototowi to karongkánina.

⁸ Agáiáná Pueꞌ Ala mosalaꞌiheꞌ taunáNa ánti katiꞌárána rabuku mouláꞌ dándiNa to rungu-runguna iti, onoꞌ miꞌi haneꞌi Nahángáꞌáꞌáheꞌ node: “Nipehádingi! Hangkani tempó ina Kupaꞌara pototowi to woꞌu i toSáráeliꞌ hai toIudá.

⁹ Tiꞌara nodo podándiNgkuꞌ to Kupaꞌara i toioruraꞌ hangkoia i kaKuántiraꞌ mesuwuꞌ hangko i tampoꞌ Másiriꞌ. Ánti katiꞌáráraꞌ tetidaꞌ i podándiNgkuꞌ iti, onoꞌ miꞌi haneꞌi Kusápuákaheꞌ.

¹⁰ Mewaliꞌ, deꞌe miꞌi podándiNgkuꞌ to ina Kupaꞌara hai toSáráeliꞌ i alo to ina haweꞌ: HawaꞌKuꞌ ina Kuwoli i lalu pekiriraꞌ hai ina Kuꞌukiꞌ i laluraꞌ. Kódóꞌ ina mewaliꞌAꞌ Pueꞌ Alaraꞌ, hai hira ina mewaliꞌheꞌ taunáNgkuꞌ.

¹¹ I tempó iti, tiꞌarapoheꞌ paraluu mopaturoꞌ halaluraꞌ ba hángká rángáraꞌ bona hira moisáꞌAꞌ, láwiꞌ hira upu-upu ina moisáꞌAꞌ, maroꞌa to i reá tueꞌraꞌ, maroꞌa to i wóiꞌ tueꞌraꞌ.

¹² I tempó iti, ina Kuámpungi dósáraꞌ, hai tiꞌara piꞌi ina Kubuhinao salaꞌraꞌ.” (Ieremia 31:31-34)

¹³ Mewaliꞌ i lalu ngkóráꞌna Pueꞌ Ala iti, Ia mampolaluita kana i dándiNa to woꞌu, hai mouláꞌ laluitaNa, dándi to rungu-runguna hangaa-ngaa rapaháwángi, tiꞌara piꞌi mobunduꞌ láwiꞌ liu miꞌi tempóna.