YOANE 5 - Ngunese Bible

¹ Edaku ki tea maga wanogoe nasaisaiana sikai ki naka ni Yudea e doko; go Yesu e paki Yerusalem pano.

² Go luku‐noai‐ava sikai e doko Yerusalem pisari namata‐pua ni shiip, waina e pei tea sosoana pae Heberu ki Bethesda, waina e peani natara‐taup̃a lima.

³ Taua sikai ni naatam̃oli maga eu one natara‐taup̃a maga wanogoe, waina eu sasana, waina eu kesa, waina eu pei pito, waina eu lologara, eu do leogoro naparivariana ni noai:

⁴ nalakena te ragi seara agelo sikai ki Yehovah e siwo paki lukunoai‐ava wanogoe, po mari noai e duletule: go naata waina e pea paki asa edaku ki naduletuleakiana ni noai e pei tea mariana e p̃ia pa dua ki nasasanaana waina e pei tea vuatiana asa.

⁵ Go naatam̃oli sikai ni doko tokora wanogoe, waina e peani natau rualima dolu tamate latolu nasasanaana aneana.

⁶ Ragi waina Yesu e punusi a e one, po atae naga e dapala nogoe doko ragi varau,

⁷ e noa ki nia, e naga, Ku masauna naga p̃a vei tea mariana p̃a wia kite? Tea sasana wanogoe e pasa dara e, e naga, Nawota, a da peani te naatam̃oli sikai mau, ragi waina noai e pei tea duletuleakiana, waina ega nadi ki nau paki luku‐noai‐ava: ma ragi waina kinau a do umai, tea p̃ota sikai e pea ki nau siwo pano.

⁸ Yesu e noa ki nia, e naga, P̃a tuleana, p̃a tape dakati nawewele anigo, po surata.

⁹ Go m̃araverave naatam̃oli wanogoe e pei tea mariana e p̃ia, go e dape dakati nawewele aneana po surata.

¹⁰ Go e pei sabbath naaleatia wanogoe. Nalakena tea wanogoe navarapule maga ni Yudea eu noa ki tea waina e pei tea maripauriana, eu naga, E pei sabbath, go e da pae nawotaeana mau naga p̃a tape dakati nawewele anigo.

¹¹ Ma nae e pasa dara ra, e naga, Tea waina e mari au a p̃ia, nae e noa ki nau, e naga, P̃a tape dakati nawewele anigo, po surata.

¹² Eu pusuusu paki nia, eu naga, Naatam̃oli waina e noa ki‐go, naga P̃a tape dakati, po surata, e pei sei?

¹³ Ma tea waina e pei tea maripauriana e da atae a mau: nalakena Yesu e moro pano, go taua sikai ni naatam̃oli maga eu doko tokora wanogoe.

¹⁴ Edaku ki tea maga wanogoe Yesu e pap̃ai e roara ni nasum̃a tapu, po noa ki nia, e naga, P̃a leo, ku pei tea mariana ku p̃ia, p̃a ta moro mari naleo sa mau, naga tea waina e sa p̃arua liu ega ta pakilina ki‐go mau.

¹⁵ Naatam̃oli wanogoe e pano, po noakisai navarapule maga ni Yudea naga tea waina e mari a e p̃ia e pei Yesu.

¹⁶ Go nalakena tea wanogoe navarapule maga ni Yudea eu kopalele Yesu, nalakena e mari tea maga wanogoe sabbath.

¹⁷ Ma Yesu e pasa dara ra, e naga, Tamagu e do p̃osiwosi pa pa paki ragi waia, go kinau a do p̃osiwosi.

¹⁸ Nalakena tea wanogoe navarapule maga ni Yudea eu laaga p̃arua naga euga mari punue a, nalakena e dapiri sabbath, tea wanogoe e da sikina mau, ma e soso Sup̃e ki Tamana aneana, e dum̃ana mari a e pitotowo ma Sup̃e.

¹⁹ Nalakena tea wanogoe Yesu e pasa dara po noa ki da, e naga. Lomau, lomau, a noa ki mu, a naga, Natuna e da mari atae dum̃ana mari te navatuna mau, ma e mari tea waina e punusi Tamana e do mari a. Nalakena naleo maga waina nae e pe mari ra, naleo maga wanogoe Natuna ma e do mari ra dakiusi a.

²⁰ Nalakena Tamana e dodomi Natuna, po piseiki nia naleo maga mamau puti waina nae e do mari ra; go ega wo piseiki nia nawosiana maga waina eu p̃arua liu tea maga waia, naga nimu kuga maga.

²¹ Nalakena dakiusi waina Tamana e do sike tea mate maga eu duleana po pakamauri ki da, dapala nogoe Natuna ma e do pakamauri ki tea maga waina e masauna.

²² Nalakena Tamana e da pasap̃otae te naata mau, ma e dua Natuna navasap̃otaeana mamau; naga tea maga mamau puti euga dodomadagani Natuna, ega tapala waina eu dodomadagani Tamana.

²³ Tea waina e da dodomadagani Natuna mau, e da dodomadagani Tamana mau waina e dip̃aki lua e umai.

²⁴ Lomau, lomau, a noa ki mu, naga Tea waina e dogo navasaana aginau, po saralomau navasaana ki tea waina e dip̃aki lua au umai, e peani namauriana waina e du mau du, go ega wo da umai paki navasap̃otaeana mau, ma e po m̃elu dua ki namateana po paki namauriana.

²⁵ Lomau, lomau, a noa ki mu, naga Aura ega wo umai, go e pei ragi waia, waina tea mate maga euga wo dogo nadaleo ni Sup̃e Natuna asa; go tea maga waina eu dogo euga wo mauri.

²⁶ Nalakena dakiusi waina Tamana e peani namauriana e doko asa, dapala nogoe e dua Natuna naga nae ma ega veani namauriana ega toko asa:

²⁷ go e dua e naveinawotaana naga ega mari navasap̃otaeana, nalakena e pei naatam̃oli Natuna.

²⁸ Kuga ta maga tea wanogoe mau: nalakena aura ega wo umai waina tea maga mamau puti waina eu one matigo maga one euga wo dogo nadaleona,

²⁹ po dave umai; tea maga waina eu mari naleo p̃ia maga, euga wo dave umai paki namoroduleanaana ni namauriana; go tea maga waina eu mari naleo sa maga, euga wo dave umai paki namoroduleanaana ni navasap̃otaeana.

³⁰ Kinau a da mari atae dum̃agu mari te navatuna sikai mau: a pasap̃otae dapala waina a dogo: go navasap̃otaeana aginau e leana; nalakena a da laaga namasauana aginau mau, ma a laaga namasauana ki tea waina e dip̃aki lua au umai.

³¹ Kinau a pe noa sokisoki nalo kakagu, nanoasokisokiana aginau e pe ta pei lomau mau.

³² Tea waina e do noa sokisoki nalo kakagu e pei tea p̃ota sikai; go a atae naga nanoasokisokiana waina e do noa sokisoki a nalo kakagu e pei lomau.

³³ Nimu ku dip̃aki lua pa punusi Yoane, go e magi nalomauana noa sokisoki.

³⁴ Ma nanoasokisokiana waina kinau a dape a e da m̃elu naatam̃oli mau: ma a noa tea maga wanogoe naga nimu kuga vei tea mautipauriana.

³⁵ Nae e pei nasulu waina e soro po maramalaga: go nimu ku masauna naga kuga laelaea namarama aneana ragi seara.

³⁶ Ma nanoasokisokiana waina kinau a peani a e p̃arua liu tea ki Yoane: nalakena nawosiana maga waina Tamagu e dua au ara naga aga mari sua ra, nawosiana maga wanogoe waina a do mari ra, eu do noa sokisoki nalo kakagu, naga Tamagu e dip̃aki lua au umai.

³⁷ Go Tamagu waina e dip̃aki lua au umai, nae e noa sokisoki nalo kakagu. Ku da dogo nadaleona te ragi mau, go ku da punusi navunusiana kakana mau.

³⁸ Go ku da peani navasaana aneana doko nap̃alaumu doko mau: nalakena tea waina nae e dip̃aki lua e umai, nimu ku da saralomau navasaana aneana mau.

³⁹ Kuga veve usiusi navasaana midiriana maga nalakena ku midoaki nia naga ku peani namauriana waina e du mau du ara;

⁴⁰ go nara eu pei tea waina eu do noa sokisoki nalo kakagu; go ku karai umai punusi au, naga kuga veani namauriana.

⁴¹ A da dape nasamasamaana m̃elu naatam̃oli maga mau.

⁴² Ma a atae mu, naga ku da peani nadodomiana paki Sup̃e doko nap̃alaumu mau.

⁴³ Kinau a umai pae nagisa ni Tamagu, go ku da piragi au mau: tea p̃ota sikai e pe umai pae nagisana aneana, nae wanogoe ku pe viragi a.

⁴⁴ Nimu ku mari atae saralomau dapale sava, waina ku do dum̃amu dape nasamasamaana kiamu, go nasamasamaana waina e m̃elu Sup̃e sikai maau umai ku da laaga asa mau?

⁴⁵ Kuga ta midoa ki nia mau naga kinau aga wo pasa dip̃a mu paki Tamagu: sikai e doko waina e do pasa dip̃a mu, Moses, waina nimu ku do leogoro pavatu asa.

⁴⁶ Nalakena ku pe saralomau navasaana ki Moses, ku pe saralomau navasaana aginau; nalakena nae e midiri nalo kakagu.

⁴⁷ Ma ku pe ta saralomau navasaana midiriana aneana maga mau, ku pe wo saralomau navasaana aginau maga dapale sava?