YOANE 4 - Ngunese Bible

¹ Nalakena tea wanogoe ragi waina Nawota e atae naga Farisi maga eu dogo naga Yesu e do mari po do bapetiso tea vasapiseikiana maga eu laapa liu tea maga ki Yoane

² (ma Yesu nae e da bapetiso mau, ma tea vasapiseikiana aneana maga eu bapetiso),

³ e doropusi Yudea, po moro paki Calilea pano.

⁴ Go e one asa one naga ega surata duaduru Samaria.

⁵ Go e umai paki natokoana ni Samaria sikai waina e pei tea sosoana ki Saikar, e pei m̃aladigi ki matele ni natano waina Yakob e dua natuna Yosef asa:

⁶ go namata noai ki Yakob e doko tokora wanogoe. Go Yesu waina e mawosa ki nasurataana e dasake dapala nogoe pisari namata noai wanogoe.

⁷ E alagoro pei aura kelatesa. Nagoroi ni Samaria sikai e umai naga ega vautui noai: Yesu e noa ki nia, e naga, P̃a tua au aga munu.

⁸ Nalakena tea vasapiseikiana aneana maga eu paki natokoana pano naga euga vakotovi navinaga.

⁹ Nalakena tea wanogoe nagoroi ni Samaria wanogoe e noa ki nia, e naga, Ekasana nigo, waina ku pei naatam̃oli sikai ni Yudea, ku datagovi au naga p̃a munu, waina a pei nagoroi sikai ni Samaria? (Nalakena naka ni Yudea go naka ni Samaria eu da dum̃ada puati ra mau.)

¹⁰ Yesu e pasa dara po noa ki nia, e naga, Ku pe atae navituam̃olikiana ki Sup̃e, go sei e doko waina e noa ki‐go, P̃a tua au aga munu; nigo ku pe datagovi a, go e pe tua ko noai mauri.

¹¹ Nagoroi wanogoe e noa ki nia, e naga, Nawota ku da peani lo vautu mau, go m̃oru noai waia e paki pua: go ku peani noai mauri wanogoe esava?

¹² Nigo ku p̃arua liu tamagida Yakob, waina e dua gami m̃oru noai waia, po dum̃ana munu asa, go natuna maga, go katel aneana maga kite?

¹³ Yesu e pasa dara po noa ki nia, e naga, Sara naata waina e munu noai waia seara ega wo moro madou:

¹⁴ ma naata waina e munu noai seara waina kinau aga wo dua e asa, ega wo da madou mau pa pa ega tu mau du; ma noai waina kinau aga wo dua e asa ega wo pei namata noai sikai nap̃alauna, waina ega wo do putaputa paki namauriana waina e du mau du.

¹⁵ Nagoroi wanogoe e noa ki nia, e naga, Nawota p̃a tua au noai wanogoe, naga aga ta madou mau, go naga aga ta surata umai paki nea naga aga vautu.

¹⁶ Yesu e noa ki nia, e naga, P̃a vano, p̃a soso naanoai anigo, go p̃a umai.

¹⁷ Nagoroi wanogoe e pasadara po noa ki nia, e naga, A da peani te naanoai mau. Yesu e noa ki nia, e naga, Ku noa p̃ia, ku naga, A da peani te naanoai mau:

¹⁸ nalakena ku peani sua naanoai lima; go tea waina ku peani a ragi waia e da pei naanoai anigo mau: ku noa lomau tea wanogoe.

¹⁹ Nagoroi wanogoe e noa ki nia, e naga, Nawota, a punusi naga nigo ku pei profeta sikai.

²⁰ Tamagami maga eu lotu tava waia; go nimu ku noa, naga tokora waina e one naatam̃oli one naga euga lotu asa e doko Yerusalem.

²¹ Yesu e noa ki nia, e naga, Koroi, p̃a saralomau navasaana aginau, aura ega wo umai, waina kuga wo da lotu ki Tamana asa tava waia sikina mau, kite Yerusalem sikina mau.

²² Nimu ku lotu ki tea waina ku da atae a mau: kinami au lotu ki tea waina au atae a: nalakena namautipauriana e pei tea ni naka ni Yudea.

²³ Ma aura ega wo umai, go e pei ragi waia, waina tea lotu lomau maga euga wo lotu ki Tamana asa pae naatana go nalomauana: nalakena Tamana e laaga naga tea maga waina eu lotu ki nia euga tapala nogoe.

²⁴ Sup̃e e pei Naatana: go tea maga waina eu lotu ki nia e one ara one naga euga lotu pae naatana go nalomauana.

²⁵ Nagoroi wanogoe e noa ki nia, e naga, A atae naga Messiah ega wo umai (waina e pei tea sosoana ki Kristo): ragi waina nae ega umai, ega wo noa ki sai gida naleo maga mamau puti.

²⁶ Yesu e noa ki nia, e naga, Kinau waina a pasa ki‐go a pei nae.

²⁷ E noa sua tea wanogoe go tea vasapiseikiana aneana maga eu rumai; go eu maga nalakena nae go nagoroi sikai ero dum̃ada pasa ki da; ma te naata sikai e da noa, Ku laaga nasava? Kite, Ekasana koro dum̃amu pasa ki mu?

²⁸ Nalakena tea wanogoe nagoroi wanogoe e doropusi napura ni noai aneana e doko, go e paki natokoana pano; po noa ki naatam̃oli maga, e naga, Kuga umai,

²⁹ punusi naatam̃oli sikai, waina e noa ki nau naleo maga mamau puti waina a mari a: nae e pei Kristo kite?

³⁰ Eu dave natokoana pano po do umai punusi a.

³¹ Ragi ni namalopa kakana tea vasapiseikiana aneana maga eu pavarani a, eu naga, Rabbi, p̃a kanikani.

³² Ma e noa ki da, e naga, Kinau a peani navinaga naga aga kani a waina nimu ku da atae a mau.

³³ Nalakena tea wanogoe tea vasapiseikiana maga eu dum̃ada noa ki da, eu naga, Te naata e maneana dapetape umai naga ega kanikani kite?

³⁴ Yesu e noa ki da, e naga, Navinaga aginau e pei naga aga mari namasauana ki tea waina e dip̃aki lua au umai, go naga aga mari sua nawosiana aneana.

³⁵ Nimu ku da noa naga, Atelagi pati eu ko doko, go nalolovaeana ega wo umai kite? Kuga leo, a noa ki mu, naga Kuga sike namatamu, po leo punusi vanua maga, naga eu dare sua ragi waia raki nalolovaeana.

³⁶ Tea waina e lolovae e dape namoriana, po piladaua ki nawana paki namauriana waina e du mau du; naga tea waina e sapuraki go tea waina e lolovae eroga rua laelaea.

³⁷ Nalakena nalo ni tea wanogoe navasaana e pei lomau waina e naga, Sikai e sapuraki, go tea p̃ota e lolovae.

³⁸ Kinau a dip̃aki lua mu naga kuga lolovae ki tea waina nimu ku da p̃osiwosi ki nia mau: tea p̃ota maga eu p̃osiwosi, go nimu ku po umai sili paki nawosiana adeada.

³⁹ Go naka ni Samaria tea laapa kakada ni natokoana wanogoe eu saralomau asa nalakena navasaana ki nogoroi wanogoe, waina e noa sokisoki, naga E noa ki nau naleo maga mamau puti waina a mari a.

⁴⁰ Nalakena tea wanogoe ragi waina naka ni Samaria eu rumai punusi a, eu pavarani a naga ega toko sikoti ra doko: go e doko tokora wanogoe doko naaleatia dua.

⁴¹ Go tea p̃ota laapa eu saralomau nalakena navasaana aneana;

⁴² go eu noa ki nagoroi wanogoe, eu naga, Au da moro saralomau nalakena navasaana anigo mau: nalakena au po dum̃agami dogo e, po atae naga lomau nae e pei Tea Maumau pauri ni maramana.

⁴³ Go edaku ki naaleatia dua wanogoe e dave m̃elu dua ki tokora wanogoe paki Calilea pano.

⁴⁴ Nalakena Yesu e dum̃ana noa sokisoki, naga profeta sikai e da peani te nadodomadaganiana navanua aneana mau.

⁴⁵ Go ragi waina e umai paki Calilea, naka ni Calilea eu piragi a, eu punusi naleo maga mamau puti waina e mari a Yerusalem ragi ni nasaisaiana: nalakena nara ma eu paki nasaisaiana pano.

⁴⁶ Nalakena tea wanogoe e moro umai paki Kana ni Calilea, tokora waina e mari noai e pei waine asa. Go naatam̃oli warua sikai ki nawota e doko, waina natuna naanoai e sasana one Kapernaum.

⁴⁷ Ragi waina e dogo naga Yesu e po pae Yudea umai paki Calilea, e pano punusi a, po pavarani a naga ega siwo umai, po mari pauri natuna naanoai: nalakena e pei m̃aladigi naga ega mate.

⁴⁸ Nalakena tea wanogoe Yesu e noa ki nia, e naga, Ku pe ta punusi navaivaiana maga go tea ni namagaana maga ku pe wo da saralomau mau.

⁴⁹ Naatam̃oli warua ki nawota wanogoe e noa ki nia, e naga, Nawota, p̃a siwo umai ragi waina piakiki aginau e ko da mate mau.

⁵⁰ Yesu e noa ki nia, e naga, P̃a vano; natum̃a naanoai e mauri. Naatam̃oli wanogoe e saralomau navasaana waina Yesu e noa ki nia asa, go e pano.

⁵¹ Go ragi waina nae e do siwo pano, tea suasua aneana maga eu sua e, po noa, naga natuna naanoai e mauri.

⁵² Go e pusuusu paki da ki aura waina e pae asa dogokitep̃ia. Go eu noa ki nia, eu naga, Nanova aura kelarua namasakiana e marua ki nia.

⁵³ Go tamana e atae naga e pei aura waina Yesu e noa ki nia, e naga, Natum̃a naanoai e mauri: go nae e saralomau, go nasum̃a aneana mamau.

⁵⁴ Tea wanogoe e moro pei navaivaiana kerua waina Yesu e mari a, ragi waina e pae sua Yudea umai paki Calilea.