YOANE 20 - Ngunese Bible

¹ Go naaleatia vea ni wiik malip̃ogi sa kakana, ragi waina e ko maligo doko, Maria ni Macdala e umai paki matigo, po punusi vatu e pei tea tapeluaana m̃elu dua ki matigo.

² Nalakena tea wanogoe e sava, po umai punusi Simon Petero, go tea vasapiseikiana p̃ota waina Yesu e dodomi a, po noa ki da, e naga, Eu dape lua Nawota m̃elu dua ki matigo, go au da atae tokora waina eu doropusi a asa mau.

³ Nalakena tea wanogoe Petero e dave pano, go tea vasapiseikiana p̃ota wanogoe, go ero do pano paki matigo.

⁴ Go ero dua sava dum̃ada sikoti ra: go tea vasapiseikiana p̃ota wanogoe e sava kasua liu Petero, po pea umai paki matigo;

⁵ go e kolo po leo paki ekopu, po punusi namasia maga ni nakulukulu ni linen eu one; ma e da paki ekopu mau.

⁶ Ragi wanogoe Simon Petero ma e umai dausi a, po paki ekopu ni matigo; go e leopunusi namasia maga ni nakulukulu ni linen eu one,

⁷ go tea kasitoro, waina e doko nap̃auna, e da one sikoti namasia maga ni nakulukulu ni linen mau, ma e pei tea lugiana e masale one tokora sikai.

⁸ Ragi wanogoe nalakena tea wanogoe tea vasapiseikiana p̃ota wanogoe waina e pea umai paki matigo nae ma e paki ekopu, go e punusi, po saralomau.

⁹ Nalakena ero ko da atae navasaana midiriana mau, naga e one asa one naga ega moro duleana m̃elu dua ki tea mate maga.

¹⁰ Go tea vasapiseikiana dua wanogoe ero moro paki nasum̃a adeada pano.

¹¹ Ma Maria e lawodu katama pisari matigo po do dagi: go ragi waina e do dagi, e kolo po leo paki matigo;

¹² go e punusi agelo dua ero suni sugoro tare ero do natano, sikai e doko ep̃au, go sikai e doko etua, tokora waina nap̃atoko ni Yesu e one sua asa.

¹³ Go ero noa ki nia, ero naga, Koroi ekasana ku dagi? E noa ki da, e naga, Nalakena eu dape lua Nawota aginau, go a da atae tokora waina eu doropusi a asa mau.

¹⁴ Ragi waina e noa sua tea wanogoe, e dum̃ana doa e paki natakuna, po leopunusi Yesu e lawodu, go e da atae mau naga e pei Yesu.

¹⁵ Yesu e noa ki nia, e naga, Koroi, ekasana ku dagi? Ku laaga sei? Nae e midoaki nia naga e pei tea waina e leo paratiki roara, go e noa ki nia, e naga, Nawota, nigo ku pe tapetape a pano, p̃a noa ki nau tokora waina ku doropusi a asa, go kinau aga wo dape lua e.

¹⁶ Yesu e noa ki nia, e naga, Maria. Nae e dum̃ana doa e, po noa ki nia pae Heberu, e naga, Rabboni, waina e pei tea noaana e pei, Tea Vasapiseiki.

¹⁷ Yesu e noa ki nia, e naga, P̃a ta kisidogo au mau; nalakena a ko da sake pano punusi Tamagu mau: ma p̃a va punusi taigu maga, po noa ki da, naga A naga aga sake pano punusi Tamagu go Tamamu, go Sup̃e aginau go Sup̃e animu.

¹⁸ Maria ni Macdala e umai po dogorogo paki tea vasapiseikiana maga, e naga, A po punusi Nawota, go naga e noa ki nia tea maga wanogoe.

¹⁹ Go ragi waina e pei ragi melu ni naaleatia wanogoe, tea vea ni wiik, go ragi waina namata maga eu pei tea kokoroana tokora waina tea vasapiseikiana maga eu doko asa, nalakena namataukiana ni navarapule maga ni Yudea, Yesu e umai po lawodu m̃aleoputo kakada, po noa ki da, e naga, Kuga veani natam̃ateana.

²⁰ Go ragi waina e noa sua tea wanogoe e pisei ki da nam̃elearuna maga go navidina. Nalakena tea wanogoe tea vasapiseikiana maga eu laelaea, ragi waina eu punusi Nawota.

²¹ Nalakena tea wanogoe Yesu e moro noa ki da, e naga, Kuga veani natam̃ateana: dapala waina Tamagu e dip̃aki lua au, kinau ma a dip̃aki lua mu.

²² Go ragi waina e noa sua tea wanogoe, e marodua ra, po noa ki da, e naga, Kuga tape Naatana Tapu.

²³ Tea maga waina ku pe madeada midoakikorokoro namarinaleosaana adeada maga, eu pe wo madeada pei tea midoakikorokoroana; go tea maga waina ku pe wo mari soki namarinaleosaana adeada maga, eu pe wo pei tea marisokiana.

²⁴ Ma Toma, tea rualima sikai tamate dua sikai kakada, waina e pei tea sosoana ki Didimo, e da sikoti ra doko mau ragi waina Yesu e umai.

²⁵ Nalakena tea wanogoe tea vasapiseikiana p̃ota maga eu noa ki nia, eu naga, Au po punusi Nawota. Ma e noa ki da, e naga, A pe ta punusi malo masai ni tuturi maga nam̃elearuna maga mau, go a pe ta doropusi nakinigu paki malo masai ni tuturi maga mau, go a pe ta doropusi nam̃elearugu paki navidina mau, a pe wo da saralomau mau.

²⁶ Go edaku ki naaleatia latolu tea vasapiseikiana aneana maga eu moro doko ekopu, go Toma e sikoti ra doko. Yesu e umai, namata maga eu pei tea kokoroana, go e lawodu m̃aleoputo kakada, po naga, Kuga veani natam̃ateana.

²⁷ E edaku noa ki Toma, e naga, P̃a sai ki nakinim̃a paki nea, go p̃a vunusi nam̃elearugu maga, go p̃a sai ki nam̃elearum̃a, po doropusi a paki navidigu: go p̃a ta pei tea ta saralomau mau, ma p̃a saralomau.

²⁸ Toma e pasa dara po noa ki nia, e naga, Nawota aginau go Sup̃e aginau.

²⁹ Yesu e noa ki nia, e naga, Ku po saralomau nalakena ku po punusi au: tea maga waina eu da punusi mau, go eu saralomau eu maropa.

³⁰ Go Yesu e mari navaivaiana p̃ota laapa narae ni tea vasapiseikiana maga, waina eu da pei tea midiriana tusi waia mau:

³¹ ma tea maga wanogoe eu pei tea midiriana, naga kuga saralomau naga Yesu e pei Kristo, Sup̃e Natuna; go naga ragi waina kuga saralomau kuga veani namauriana pae nagisana.