YOANE 18 - Ngunese Bible

¹ Ragi waina Yesu e noa sua navasaana maga wanogoe, e dave pano sikoti tea vasapiseikiana aneana maga paki taleva kerua ni noaisara ni Kidron, paki tokora waina roara sikai e doko asa, go e sili paki asa, nae go tea vasapiseikiana maga eu mamau.

² Go Yuda ma, waina e pitua ki nia, e atae tokora wanogoe: nalakena Yesu go tea vasapiseikiana aneana maga eu paka laapa saisai tokora wanogoe.

³ Nalakena tea wanogoe Yuda, waina e piragi sua tagona sikai ni naatam̃oli maga ni navakalo, go tasiga maga waina eu m̃elu tea viri warua maga go Farisi maga, e umai paki tokora wanogoe, eu puati lantern maga go nasulu maga go nalikau maga.

⁴ Nalakena tea wanogoe, Yesu, waina e atae naleo maga mamau puti waina euga vakilina ki nia, e dua sai, po noa ki da, e naga, Ku laaga sei?

⁵ Eu pasa dara e, eu naga, Yesu ni Nasareth. Yesu e noa ki da, e naga, Kinau e pei nae. Go Yuda ma, waina e pitua ki nia, e lawodu sikoti ra.

⁶ Go ragi waina e noa ki da, Kinau a pei nae, eu sukasuka pano, po dowo paki natano.

⁷ Nalakena tea wanogoe e moro pusuusu paki da, e naga, Ku laaga sei? Go eu naga, Yesu ni Nasareth.

⁸ Yesu e pasa dara, e naga, A noa ki sua mu, naga Kinau a pei nae: go ku pe laaga au, kuga suasua ki tea maga waia naga euga vano:

⁹ naga navasaana waina e noa e ega lolomana, e naga, Tea maga waina ku dua au ara, a da dape puoli ki sikai kakada mau.

¹⁰ Ragi wanogoe Simon Petero waina e peani lova sikai e sai lua e, po dae tea suasua ki tea viri warua liu, po dae lua nadaligana ni matua. Go nagisa ni tea suasua wanogoe e pei Malko.

¹¹ Nalakena tea wanogoe Yesu e noa ki Petero, e naga, P̃a sai ki lova liliu paki nala: lasa munu waina Tamagu e dua au asa, aga ta munugi a kite?

¹² Nalakena tea wanogoe tagona go tea waina e maraki ra, go tasiga maga ki navarapule maga ni Yudea eu puasoki Yesu po soli a, po piragi a pano punusi Annas pea;

¹³ nalakena e pei Kaiafas m̃ona, waina e pei tea viri warua liu natau wanogoe.

¹⁴ Go Kaiafas e pei tea waina e pusum̃aki paki navarapule maga ni Yudea, naga e p̃ia naga naatam̃oli sikai ega magi narei mate.

¹⁵ Go Simon Petero e dausi Yesu, go tea vasapiseikiana p̃ota sikai. Go tea vasapiseikiana wanogoe e pei tea ataeana paki tea viri warua liu, go e sikoti Yesu paki ekopu, paki namasopa ni nasum̃a ki tea viri warua liu;

¹⁶ ma Petero e lawodu pisari namata katama. Nalakena tea wanogoe tea vasapiseikiana p̃ota wanogoe, waina e pei tea ataeana paki tea viri warua liu, e dave pano po pasa ki nagoroi waina e doko raki namata, po piragi Petero umai paki namasopa.

¹⁷ Nalakena tea wanogoe nagoroi atara wanogoe waina e doko raki namata e noa ki Petero, e naga, Nigo ma ku pei sikai ni tea vasapiseikiana maga ki naatam̃oli waia kite? Nae e naga, A da pei sikai mau.

¹⁸ Go tea suasua maga go tasiga maga eu lawodu tokora wanogoe, eu mari nakapu sikai ni nam̃elevara; nalakena e maladi; go eu do datalai: go Petero ma e sikoti ra doko, e lawodu po datalai.

¹⁹ Nalakena tea wanogoe tea viri warua liu e pusuusu paki Yesu nalo ni tea vasapiseikiana aneana maga, go nalo ni navasapiseikiana aneana.

²⁰ Yesu e pasa dara e, e naga, Kinau a pasa ki maramana lina; kinau a pasa piseiki sara ragi ekopu ni nasum̃a ni nasaisaiana maga, go ni nasum̃a tapu, waina navarapule maga ni Yudea eu saisai puti ara; go a da pasa panako te navatuna mau.

²¹ Ekasana ku pusuusu paki nau? P̃a vusuusu paki tea maga waina eu dogo au ki tea waina a pasa ki da asa: p̃a leo, tea maga waia eu atae tea waina kinau a noa e.

²² Go ragi waina e noa sua tea wanogoe, tasiga maga sikai kakada waina e lawodu pisari a, e dapagi Yesu po naga, Ku pasa dara tea viri warua liu dapala nogoe kite?

²³ Yesu e pasa dara e, e naga, A pe vasa sa, p̃a noa sokisoki nalo ni tea sa wanogoe: ma a pe vasa p̃ia, ekasana ku p̃okati au?

²⁴ Nalakena tea wanogoe Annas e dip̃aki luae epei tea soliana pa punusi Kaiafas tea viri warua liu.

²⁵ Go Simon Petero e lawodu po do datalai. Nalakena tea wanogoe eu noa ki nia, eu naga, Nigo ma ku pei sikai ni tea vasapiseikiana aneana maga kite? Nae e pasagoro, po naga, A da pei sikai kakada mau.

²⁶ Tea sikai ni tea suasua maga ki tea viri warua liu, waina Petero e dae lua nadaligana, e naga, Kinau a da punusi ko ku sikoti a roara kite?

²⁷ Nalakena tea wanogoe Petero e moro pasagoro: go m̃araverave toa e dare.

²⁸ Ragi wanogoe eu piragi lua Yesu m̃elu dua ki Kaiafas paki Pretorio: go e pei malip̃ogi; go nara eu da dum̃ada paki ekopu ni Pretorio mau, naga euga ta pei tea mariana euga loa mau, ma naga euga kani navakalauana.

²⁹ Nalakena tea wanogoe Pilato e paki katama punusi ra, po naga, Seve navasadip̃aana ku dape a umai dip̃a naatam̃oli waia?

³⁰ Eu pasa dara po noa ki nia, eu naga, Nae e pe ta pei tea mari naleo sa mau, au pe ta pitua ki nia paki‐go mau.

³¹ Nalakena tea wanogoe Pilato e noa ki da, e naga, Nimu kuga vuati a, po pasa p̃otae a pataka ni nawotaeana animu. Navarapule maga ni Yudea eu noa ki nia, eu naga, E da pae nawotaeana mau naga kinami auga mari punue te naata:

³² naga navasaana ki Yesu ega lolomana, waina e noa e, e paivai ki namateana waina ega wo mate asa.

³³ Nalakena tea wanogoe Pilato e moro paki ekopu ni Pretorio, po soso Yesu, po noa ki nia, e naga, Nigo ku pei Nawota ki naka ni Yudea kite?

³⁴ Yesu e pasa dara, e naga, Nigo ku dum̃am̃a noa tea wanogoe kite? Kite tea p̃ota maga eu noa ki‐go asa nalo kakagu?

³⁵ Pilato e pasa dara, e naga, Kinau e pei naatam̃oli ni Yudea sikai kite? Nalauna anigo go tea viri warua maga eu pitua ki‐go paki nau: ku mari nasava?

³⁶ Yesu e pasa dara, e naga, Namarakiana aginau e da pei tea ni maramana waia mau: namarakiana aginau e pe vei tea ni maramana waia, tea suasua aginau maga eu pe marimari, naga aga ta pei tea vituakiana paki navarapule maga ni Yudea mau: ma ragi waia namarakiana aginau e da pae tokora wanogoe umai mau.

³⁷ Nalakena tea wanogoe Pilato e noa ki nia, e naga, Go nigo ku pei nawota sikai kite? Yesu e pasa dara, e naga, Nigo ku noa naga kinau a pei nawota sikai. Kinau a pakilina nalakena tea wanogoe, go a umai paki maramana nalakena tea wanogoe, naga aga magi nalomauana noasokisoki. Sara naatam̃oli waina eu pei tea ni nalomauana eu dogo nadaleogu.

³⁸ Pilato e noa ki nia, e naga, Nasava e pei nalomauana? Go ragi waina e noa sua tea wanogoe, e moro paki katama punusi navarapule maga ni Yudea, po noa ki da, e naga, Kinau a da pap̃ai te namariana sa asa mau.

³⁹ Ma nimu ku peani natomariana sikai, naga aga manimu peresi tea sikai ragi ni navakalauana: nalakena tea wanogoe ku masauna naga aga manimu peresi Nawota ki naka ni Yudea kite?

⁴⁰ Nalakena tea wanogoe eu moro pioso, po naga, P̃a ta peresi naatam̃oli waia mau, ma p̃a veresi Barabba. Go Barabba e pei tea tape pavakoto sikai.