YOANE 11 - Ngunese Bible

¹ Go naatam̃oli sikai e sasana, Lasaro ni Bethania, ni natokoana kiki ki Maria go ki taina Martha.

² Go e pei Maria waina e puvurai ki Nawota ki naroro lolo, po kasi nam̃elena maga ki naloluna, waina gorena Lasaro e sasana.

³ Nalakena tea wanogoe gorena maga ero dip̃aki lua pa punusi a, po naga, Nawota, p̃a leo, tea waina ku dodomi a e sasana.

⁴ Ma ragi waina Yesu e dogo e, e naga, Nasasanaana waia e da paki namateana mau, ma e pakilina nalakena nasamasamaana ki Sup̃e, naga Sup̃e natuna ega vei tea samasamaniana asa.

⁵ Go Yesu e dodomi Martha, go taina, go Lasaro.

⁶ Nalakena tea wanogoe ragi waina e dogo naga e sasana ragi wanogoe e doko tokora waina e doko asa naaleatia dua.

⁷ Ma edaku ki tea wanogoe e noa ki tea vasapiseikiana maga, e naga, Tuga moro paki Yudea pano.

⁸ Tea vasapiseikiana maga eu noa ki nia, eu naga, Rabbi, ragi waia navarapule maga ni Yudea eu do laaga naga euga nadi ko ki vatu; go ku naga p̃a moro paki tokora wanogoe kite?

⁹ Yesu e pasa dara, e naga, Aura maga ni naaleatia sikai eu da pei rualima sikai tamate dua kite? Te naata sikai e pe surata aleati, e pe ta dapilagona mau, nalakena e punusi namarama ni maramana waia.

¹⁰ Ma te naata sikai e pe surata p̃ogi, e pe tapilagona, nalakena namarama e da doko asa mau.

¹¹ E noa tea maga wanogoe: go edaku ki tea wanogoe e noa ki da, e naga, Tagida ri Lasaro e maturu; ma aga vano naga aga pulevule a.

¹² Nalakena tea wanogoe tea vasapiseikiana maga eu noa ki nia, eu naga, Nawota, e pe maturu, ega wo mauri.

¹³ Ma Yesu e noa e nalo ni namateana aneana: ma nara eu midoaki nia naga e noa e nalo ni namaromaroana ni namaturuana.

¹⁴ Nalakena tea wanogoe ragi wanogoe Yesu e noa ki da lina, e naga, Lasaro e mate.

¹⁵ Go a laelaea nalakena nimu naga a da doko tokora wanogoe mau, naga kuga saralomau; ma tuga va punusi a.

¹⁶ Nalakena tea wanogoe Toma, waina e pei tea sosoana ki Didimo, e noa ki tea maga waina eu mamau pei tea vasapiseikiana maga, e naga, Nigida ma tuga vano, naga tuga mate sikoti a.

¹⁷ Nalakena tea wanogoe ragi waina Yesu e umai e pap̃ai naga e one sua matigo naaleatia pati.

¹⁸ Go Bethania e pei m̃aladigi ki Yerusalem, namalopa kakada e m̃aladigi pei maile dua;

¹⁹ go navarapule maga ni Yudea tea laapa kakada eu rumai punusi Martha go Maria, naga euga vasapakavakale ra nalo ni goreda.

²⁰ Nalakena tea wanogoe Martha, ragi waina e dogo naga Yesu e do umai, e pa sua e; ma Maria e doko dorogo ekopu ni nasum̃a.

²¹ Nalakena tea wanogoe Martha e noa ki Yesu, e naga, Nawota, ku pe toko nea, goregu te pe ta mate mau.

²² Go ragi waia a atae naga tea waina p̃a wo datagovi Sup̃e asa, Sup̃e ega wo dua ko asa.

²³ Yesu e noa ki nia, e naga, Gorem̃a ega wo moro duleana.

²⁴ Martha e noa ki nia, e naga, A atae naga ega wo moro duleana ragi ni namoroduleanaana naaleatia edaku mau.

²⁵ Yesu e noa ki nia, e naga, Kinau a pei namoroduleanaana, go namauriana: tea waina e saralomau au, e pe mate, ma ega wo mauri:

²⁶ go sara naata waina eu mauri doko po saralomau au euga wo da mate mau pa pa ega tu mau du. Ku saralomau tea wanogoe kite?

²⁷ E noa ki nia, e naga, Ioro, Nawota: kinau a saralomau sua naga nigo ku pei Kristo, Sup̃e Natuna, waina ega umai paki maramana.

²⁸ Go ragi waina e noa sua tea wanogoe, e pano, po soso panako ki taina Maria, e naga, Tea Vasapiseiki e po umai, go e soso ko.

²⁹ Go nae, ragi waina e dogo e, e duleana m̃araverave, po pano punusi a.

³⁰ (Go Yesu e ko da umai paki natokoana kiki wanogoe mau, ma e ko doko tokora waina Martha e sua e asa.)

³¹ Nalakena tea wanogoe navarapule maga ni Yudea waina eu sikoti a doko ekopu ni nasum̃a, po do pasapakavakale a, ragi waina eu punusi Maria, naga e duleana m̃araverave po dave pano, eu dausi a, eu midoa ki nia naga e naga ega vaki matigo pano, naga ega tagi tokora wanogoe.

³² Nalakena tea wanogoe Maria, ragi waina e umai paki tokora waina Yesu e doko asa, po punusi a, e dowo pisari nam̃elena maga, po noa ki nia, e naga, Nawota, ku pe toko nea, goregu te pe ta mate mau.

³³ Nalakena tea wanogoe ragi waina Yesu e punusi a e dagi, go navarapule maga ni Yudea waina eu sikoti a umai eu dagi, e uru ki namidoakisakiana pae naatana, po dum̃ana durua ki nia,

³⁴ po naga, Ku doropusi a e one esava? Eu noa ki nia, eu naga, Nawota, p̃a umai po punusi.

³⁵ Yesu e kai.

³⁶ Nalakena tea wanogoe navarapule maga ni Yudea eu naga, Kuga leo, e dodomi p̃arua ki nia pa!

³⁷ Ma te seara kakada eu naga, Naatam̃oli waia, waina e p̃olagati namata ni tea waina e kesa, e da mariatae mari naga naatam̃oli waia ma ega ta mate mau kite?

³⁸ Nalakena tea wanogoe Yesu e moro uru ki namidoakisakiana nap̃alauna po umai paki matigo. Go e pei valea sikai, go vatu sikai e ovi asa.

³⁹ Yesu e naga, Kuga tape lua vatu. Martha, gore ni tea waina e mate, e noa ki nia, e naga, Nawota, ragi waia te p̃oa: nalakena e doko naaleatia pati.

⁴⁰ Yesu e noa ki nia, e naga, A da noa ki‐go, naga, ku pe saralomau, ku pe vunusi nasamasamaana ki Sup̃e kite?

⁴¹ Nalakena tea wanogoe eu dape lua vatu. Go Yesu e leo sake, po naga, Mama, a pasadodom̃ata ki‐go nalakena ku dogo au.

⁴² Go kinau a atae naga ku dogo au sara ragi: ma a noa e nalakena taua ni naatam̃oli maga waina eu lawodu daliviri, naga euga saralomau naga nigo ku dip̃aki lua au umai.

⁴³ Go ragi waina e noa sua tea wanogoe, e pioso ki nadaleo kasua sikai, e naga, Lasaro, p̃a tave umai.

⁴⁴ Go tea waina e mate e dave umai, e pei tea vivisiana nam̃elena go nam̃elearuna maga ki namasia maga ni nakulukulu; go naraena e pei tea kalutigoroana ki tea kasitoro sikai. Yesu e noa ki da, e naga, Kuga veresi a, po doro e naga ega vano.

⁴⁵ Nalakena tea wanogoe navarapule maga ni Yudea tea laapa kakada, waina eu rumai punusi Maria po punusi tea waina e mari a, eu saralomau asa.

⁴⁶ Ma seara kakada eu pano punusi Farisi maga, po noa ki da tea maga waina Yesu e mari a.

⁴⁷ Nalakena tea wanogoe tea viri warua maga go Farisi maga eu piragi saisai ki nasaisaiana ni navasap̃otaeana sikai, po naga, Tu mari nasava? Nalakena naatam̃oli waia e do mari navaivaiana laapa.

⁴⁸ Tu pe toroe epe tapalana doko, naatam̃oli maga mamau puti euga wo saralomau asa: go naka ni Roma eu pe wo umai po dape lua tokora anigida go nalauna anigida.

⁴⁹ Ma tea sikai kakada, Kaiafas, waina e pei tea viri warua liu natau wanogoe, e noa ki da, e naga, Nimu ku da atae te navatuna mau,

⁵⁰ go ku da midoaki nia mau, naga e p̃ia ki mu naga naatam̃oli sikai ega magi narei mate, go naga nalauna mamau ega ta matepuoli mau.

⁵¹ Ma e da dum̃ana noa tea wanogoe mau: ma e pei tea viri warua liu natau wanogoe, po peanoasai naga ega magi nalauna wanogoe mate;

⁵² go naga ega ta magi nalauna wanogoe sikina mate mau, ma naga ega viragi saisai ki Sup̃e natuna maga waina eu pei taperavera euga vei tea sikai maau.

⁵³ Nalakena tea wanogoe eu pae naaleatia wanogoe pa pa seke naga euga mari punue a.

⁵⁴ Nalakena tea wanogoe Yesu e da moro surata lina m̃aleoputo ni navarapule maga ni Yudea mau, ma e m̃elu dua ki tokora wanogoe pano paki navanua waina e pei m̃aladigi ki m̃asop̃alo, paki natokoana sikai waina e pei tea sosoana ki Efraim; go e doko tokora wanogoe doko sikoti tea vasapiseikiana maga.

⁵⁵ Go navakalauana ki naka ni Yudea e pei m̃aladigi: go tea laapa eu pae navanua sake paki Yerusalem pano pea ki navakalauana, naga euga tum̃ada mari ra euga tautau.

⁵⁶ Nalakena tea wanogoe eu laaga Yesu, po dum̃ada noa ki da, ragi waina eu do lawodu roara ni nasum̃a tapu, eu naga, Nimu ku midoaki nasava? Naga ega wo da umai paki nasaisaiana mau kite?

⁵⁷ Go tea viri warua maga go Farisi maga eu pitua ki sua natip̃akiana, naga te naata sikai e pe atae tokora waina e doko asa, ega noasai a, naga euga vuasoki a.