YOANE 10 - Ngunese Bible

¹ Lomau, lomau, a noa ki mu, naga Tea waina e da sili pae namata paki loga ni shiip mau, ma e pagi pae tokora p̃ota sikai, nae e pei tea vanako go tea tape pavakoto.

² Ma tea waina e sili paki asa pae namata, e pei tea leo paratiki shiip.

³ Go tea waina e doko raki namata e maneana p̃olagati; go shiip eu dogo nadaleona: go e soso shiip aneana pae nagisada, po piragi ra paki etaku pano.

⁴ Ragi waina e dip̃aki sua puti tea aneana maga paki etaku, e surata pea ki da, go shiip eu dausi a: nalakena eu atae nadaleona.

⁵ Go euga wo da dausi tea p̃ota sikai mau, ma euga wo sava dua ki nia pano: nalakena eu da atae nadaleo ni tea p̃ota maga mau.

⁶ Naluluakia wanogoe Yesu e noa ki da asa: ma nara eu da midoaki atae tea maga waina e pasa ki da ara mau.

⁷ Nalakena tea wanogoe Yesu e moro noa ki da, e naga, Lomau, lomau, a noa ki mu, naga Kinau a pei namata ki shiip.

⁸ Tea maga mamau puti waina eu rumai pea ki nau eu pei tea vanako maga go tea tape pavakoto maga: ma shiip eu da dogo ra mau.

⁹ Kinau a pei namata: te naata e pe vae au paki loga, e pe wo pei tea mautipauriana go e pe wo paki loga go e pe wo paki etaku, go e pe wo pap̃ai nakaniana.

¹⁰ Tea vanako e umai naga ega vanako, go naga ega mari punue, go naga ega mari puoli: kinau a umai naga euga veani namauriana, go naga euga veani p̃arua ki nia.

¹¹ Kinau a pei tea leo paratiki wia ni shiip: tea leo paratiki wia ni shiip e magi shiip doropusi namauriana aneana.

¹² Tea waina e pei tea vasadapuiana, go e da pei tea leo paratiki shiip mau, waina shiip eu da pei tea aneana mau, e leopunusi wulf e umai, go e doropusi shiip eu doko, po sava pano, go wulf e katilua ra po daperavera ki da:

¹³ e sava pano nalakena e pei tea vasadapuiana sikai, po da midoa ki parati ki shiip mau.

¹⁴ Kinau a pei tea leo paratiki wia ni shiip; go a atae tea aginau maga, go tea aginau maga eu atae au, dapala waina Tamagu e atae au,

¹⁵ go kinau a atae Tamagu; go a magi shiip doropusi namauriana aginau.

¹⁶ Go a peani shiip p̃ota, waina eu da pei tea ni loga waia mau: nara ma e one au one naga aga viragi ra, go euga wo dogo nadaleogu, go euga wo pei tea mariana euga vei navata sikai maau, tea leo paratiki sikai maau ni shiip.

¹⁷ Nalakena tea wanogoe Tamagu e dodomi au, nalakena e doropusi namauriana aginau, naga ega moro dape a.

¹⁸ Te naata sikai e da dape lua e kiagu mau, ma a dum̃agu doropusi a. A peani naveinawotaana naga aga toropusi a, go a peani naveinawotaana naga aga moro dape a. Natip̃akiana wanogoe a dape a ki Tamagu.

¹⁹ Natap̃otaeana sikai e moro pakilina m̃aleoputo ni navarapule maga ni Yudea nalakena navasaana maga wanogoe.

²⁰ Go tea laapa kakada eu naga, E peani dimon sikai, po daratara; ekasana ku dogo e?

²¹ Tea p̃ota seara eu naga, Tea maga wanogoe eu da pei navasaana maga ki tea waina dimon sikai e doko asa mau. Dimon sikai e mari atae p̃olagati namata ni tea kesa maga kite?

²² Go nasaisaiana ni naveakotokotomauana e doko Yerusalem: e pei ragi ni namaladiana;

²³ go Yesu e do surata roara ni nasum̃a tapu, ekopu ni natara‐taup̃a ki Solomon.

²⁴ Nalakena tea wanogoe navarapule maga ni Yudea eu rumai dalivirigoro e, po noa ki nia, eu naga, Ku mari gami au midoaki putuaki pa pa paki seve ragi? Nigo ku pe vei Kristo, p̃a noa ki gami asa lina.

²⁵ Yesu e pasa dara ra, e naga, A noa ki sua mu asa, go ku da saralomau mau: nawosiana maga waina kinau a do mari a pae nagisa ni Tamagu, nara eu do noa sokisoki nalo kakagu.

²⁶ Ma nimu ku da saralomau mau, nalakena ku da pei shiip aginau seara kakada mau.

²⁷ Shiip aginau eu dogo nadaleogu, go kinau a atae ra, go eu dausi au:

²⁸ go kinau a dua ra namauriana waina e du mau du; go euga wo da mate puoli mau pa pa ega tu mau du, go te naata sikai ega wo da pua lua ra m̃elu dua ki nam̃elearugu mau.

²⁹ Tamagu, waina e dua au ara, e p̃arua liu tea maga mamau puti; go te naata sikai e da mari atae pua lua ra m̃elu dua ki nam̃elearu ni Tamagu mau.

³⁰ Kinau go Tamagu aro pei tea sikai maau.

³¹ Navarapule maga ni Yudea eu moro dape dakati vatu maga naga euga nadi a.

³² Yesu e pasa dara ra, e naga, A piseiki mu nawosiana wia laapa waina eu m̃elu Tamagu umai; ku nadi au ki vatu nalakena nawosiana maga wanogoe seve tea kakada?

³³ Navarapule maga ni Yudea eu pasa dara e, eu naga, Au da nadi ko ki vatu nalakena nawosiana wia sikai mau, ma au nadi ko nalakena navasasakiana; go nalakena nigo, waina ku pei naatam̃oli sikai, ku dum̃am̃a mari ko ku pei Sup̃e.

³⁴ Yesu e pasa dara ra, e naga, E da pei tea midiriana nawotaeana animu, naga Kinau a naga, Ku pei sup̃e maga, kite?

³⁵ E pe noa naga nara waina navasaana ki Sup̃e e umai paki da eu pei sup̃e maga (go navasaana midiriana e da mari atae pei tea veresiana mau),

³⁶ nimu ku noa nalo ni tea waina Tamana e dapugoro e po dip̃aki lua e umai paki maramana, Ku pasasaki; nalakena a naga, A pei Sup̃e Natuna, kite?

³⁷ A pe ta mari nawosiana maga ki Tamagu mau, kuga ta saralomau navasaana aginau mau.

³⁸ Ma a pe mari ra, go ku pe ta saralomau navasaana aginau mau, kuga saralomau nawosiana maga naga kuga atae po midoaki atae naga Tamagu e doko au, go kinau a doko Tamagu.

³⁹ Eu moro laaga naga euga vua soki a: go e dave pa dua ki nam̃elearuda pano.

⁴⁰ Go e moro paki taleva kerua ni Yordan pano paki tokora waina Yoane e pea do bapetiso asa; go e doko tokora wanogoe doko.

⁴¹ Go tea laapa eu rumai punusi a; go eu naga, Yoane e da mari te navaivaiana sikai mau: ma naleo maga mamau puti waina Yoane e noa ra nalo ni naatam̃oli waia eu pei lomau.

⁴² Go tea laapa eu saralomau asa tokora wanogoe.