NALEGAANA NI NALEGAANA MAGA 1 - Ngunese Bible

¹ Nalegaana ni nalegaana maga waina eu pei agi Solomon.

² Ega tum̃ili au ki natum̃iliana maga ni nawokana: Nalakena nadodomiana anigo e p̃ia liu waine.

³ Nap̃o ni naroro lolo anigo maga e p̃ia; Nagisam̃a e dapala naroro lolo takiana; Nalakena tea wanogoe nagoroi atara maga eu dodomi ko.

⁴ P̃a vuati au; auga wo sava dausi ko; Nawota e po piragi au paki ekopu ni em̃ago aneana maga: Auga wo sokamidi po laelaea ako, Auga wo midoa ki noa nadodomiana anigo p̃arua liu waine: Tea leana maga eu dodomi ko.

⁵ Kinau a loa, ma a pei tea leom̃atakiana, Nagoroi maga ni Yerusalem O, Dapala tap̃aup̃au maga ni Kedar, Dapala tea taugoro maga ki Solomon.

⁶ Kuga ta leo punusi au mau, nalakena kinau a loa, Nalakena elo e dap̃ara ki nau, P̃ilagu natuna naanoai maga eu maeto ki nau, Eu mari au a pei tea vavaigoro roara maga ni vaine; Ma roara ni vaine aginau, waina e pei aginau, a da pavaigoro e mau.

⁷ P̃a noa ki nau, tea waina naatagu e dodomi ko O, Tokora waina ku pagani navata anigo asa, tokora waina ku mari a e one natano asa aleati matua: Nalakena ekasana aga tapala tea waina e surata pasara Pisari navata maga ki tam̃a ri maga?

⁸ Ku pe ta atae a mau, tea vei rae wia m̃aleoputo ni nagoroi maga O, P̃a tave pano pae naatum̃eleana maga ni navata, Go p̃a vagani naninani natuda anigo maga pisari tap̃aup̃au maga ki tea leoparatiki maga ni shiip.

⁹ Tagu ri nagoroi O, a noa naga ku dakiusi Horse goroi aginau sikai ni kariot maga ki Faraoh.

¹⁰ Napupum̃a ero pei tea leom̃atakiana ki viria maga ni nalolu, Nanoam̃a ki naturi maga ni vatu wia maga.

¹¹ Auga wo manigo mari natali maga ni kold, Euga vilake wotuwotu maga ni silver

¹² Ragi waina nawota e doko pisari wede aneana, Naroro lolo ni nardo aginau e pitua ki nap̃ona.

¹³ Tea dodomiana aginau e maginau dapala tum̃ana sikai ni murra, Waine e one namawota ni nasusugu dua.

¹⁴ Tea dodomiana aginau e maginau dapala m̃okai sikai ni napum̃a ni henna doko roara maga ni vaine ni En‐kedi.

¹⁵ P̃a leo, ku pei rae wia, tagu ri nagoroi; p̃a leo, ku pei rae wia; Namatam̃a ero dapala tokopea maga.

¹⁶ P̃a leo, ku pei rae wia, tea dodomiana aginau, ioro, tea masauniana: Go nawewele anigida e malakesa.

¹⁷ Sila maga ni nasum̃a anigida maga eu pei sidar maga, Go natokai anigida maga eu pei paine maga.