NUMBERS 2 - Ngunese Bible

¹ Go Yehovah e pasa paki Moses go paki Aaron,

² po naga, Israel natuna maga euga sike tap̃aup̃au adeada maga sara naatam̃oli euga sikasikai doko m̃aladigi ki manututu adeada maga, ki navaivaiana maga ni nasum̃a maga ni tamada maga; euga m̃enaki dalivirigoro tap̃aup̃au ni nasaisaiana, naraeda euga leo paki asa.

³ Go tea maga waina euga m̃enaki taleva ni elo sake paki taleva waina elo e sake asa, euga m̃enaki m̃aladigi ki manututu ki Yudah, euga vae taua adeada maga: go tea maraki ni Yudah natuna maga ega vei Nahshon natu ni Amminadab.

⁴ Go taua aneana naveveana kakana e pei tivilia larua, manu pati, p̃onotia latesa.

⁵ Go tea maga waina euga m̃enaki paki m̃aladigi ki nia, euga vei naworawora ni Issakar: go tea maraki ni Issakar natuna maga ega vei Nethanel natu ni Suar:

⁶ Go taua aneana naveveana kakana e pei tivilia lima, manu pati, p̃onotia pati:

⁷ Go naworawora ni Sebulun euga m̃enaki doko m̃aladigi ki nia: go tea maraki ni Sebulun natuna maga ega vei Eliab natu ni Helon:

⁸ Go taua aneana naveveana kakana e pei tivilia lima, manu larua, p̃onotia pati.

⁹ Tea mamau puti wanogoe waina eu pei tea veveana ni taua ni Yudah, pae taua adeada maga, eu pei naatam̃oli manu p̃onotia sikai go tivilia latolu, manu latesa, p̃onotia pati. Nara euga vei tea vea maga waina euga m̃elu po surata pano.

¹⁰ Go tea maga waina euga m̃enaki taleva ni etua, euga m̃enaki m̃aladigi ki manututu ki Reuben, euga vae taua adeada maga: go tea maraki ni Reuben natuna maga ega vei Elisur natu ni Shedeur.

¹¹ Go taua aneana naveveana kakana e pei naatam̃oli tivilia pati, manu latesa, p̃onotia lima.

¹² Go tea maga waina euga m̃enaki paki m̃aladigi ki nia euga vei naworawora ni Simeon: go tea maraki ni Simeon natuna maga ega vei Shelumiel natu ni Surishaddai:

¹³ Go taua aneana naveveana kakana e pei tivilia lima, manu loveti, p̃onotia dolu:

¹⁴ Go naworawora ki Cad ega m̃enaki doko m̃aladigi ki nia: go tea maraki ni Cad natuna maga ega vei Eliasaf natu ni Reuel:

¹⁵ Go taua aneana naveveana kakana e pei tivilia pati, manu lima, p̃onotia latesa rualima takuna lima.

¹⁶ Tea mamau puti wanogoe waina eu pei tea veveana ni taua ni Reuben, pae taua adeada maga, eu pei naatam̃oli manu p̃onotia sikai, tivilia lima go manu sikai, p̃onotia pati rualima takuna lima. Go nara euga m̃elu po surata pano pei taua kerua.

¹⁷ Go ragi wanogoe tap̃aup̃au ni nasaisaiana ega vei tea risugiana pano, taua ni naworawora ni Levi euga tape a pano doko m̃aleoputo ni taua maga mamau puti: dapala waina euga m̃enaki doko, dapala nogoe euga tave po surata pano, sara naata sikasikai euga toko naliada, euga vae manututu adeada maga.

¹⁸ Go tea maga waina euga m̃enaki taleva ni elo musu, euga m̃enaki m̃aladigi ki manututu ki Efraim, euga vae taua adeada maga: go tea maraki ni Efraim natuna maga ega vei Elishama natu ni Ammihud.

¹⁹ Go taua aneana naveveana kakana e pei tivilia pati go p̃onotia lima.

²⁰ Go naworawora ni Manasseh euga wo doko paki m̃aladigi ki nia: go tea maraki ni Manasseh natuna maga ega vei Camaliel natu ni Pedahsur:

²¹ Go taua aneana naveveana kakana e pei tivilia dolu, manu dua, p̃onotia dua:

²² Go naworawora ni Benyamin ega wo doko paki m̃aladigi ki nia: go tea maraki ni Benyamin natuna maga ega vei Abidan natu ni Cideoni:

²³ Go taua aneana naveveana kakana e pei tivilia dolu, manu lima, p̃onotia pati.

²⁴ Tea mamau puti wanogoe waina eu pei tea veveana ni taua maga ni Efraim, eu pei naatam̃oli manu p̃onotia sikai go manu latolu, p̃onotia sikai. Go nara euga m̃elu po surata pano pei taua ketolu.

²⁵ Go tea maga waina euga m̃enaki taleva ni ep̃au, euga m̃enaki m̃aladigi ki manututu ki Dan, euga vae taua adeada maga: go tea maraki ni Dan natuna maga ega vei Ahieser natu ni Ammishaddai.

²⁶ Go taua aneana naveveana kakana e pei tivilia latesa, manu dua, p̃onotia larua.

²⁷ Go naworawora ni Asher euga m̃enaki doko m̃aladigi ki nia: go tea maraki ni Asher natuna maga ega vei Pakiel natu ni Okran:

²⁸ Go taua aneana naveveana kakana e pei tivilia pati, manu sikai, p̃onotia lima:

²⁹ Go naworawora ni Naftali euga m̃enaki doko m̃aladigi ki nia: go tea maraki ni Naftali natuna maga ega vei Ahira natu ni Enan:

³⁰ Go taua aneana naveveana kakana e pei tivilia lima, manu dolu, p̃onotia pati.

³¹ Tea mamau puti wanogoe waina eu pei tea veveana ni taua maga ni Dan, eu pei naatam̃oli manu p̃onotia sikai, tivilia lima go manu larua, p̃onotia latesa. Nara euga m̃elu po surata pano pei taua edaku mau, euga vae manututu adeada maga.

³² Tea maga wanogoe eu pei Israel natuna maga waina eu pei tea veveana pae nasum̃a maga ni tamada maga: tea mamau puti waina eu doko tokora ni nam̃enakiana maga waina eu pei tea veveana pae taua adeada maga, eu pei naatam̃oli manu p̃onotia latesa go manu dolu, p̃onotia lima rualima takuna lima.

³³ Ma naworawora ni Levi eu da pei tea veveana sikoti Israel natuna maga mau; dapala waina Yehovah e dip̃aki Moses asa.

³⁴ Go Israel natuna maga eu mari dapala nogoe; pataka ni tea mamau puti waina Yehovah e dip̃aki Moses asa, dapala nogoe eu m̃enaki m̃aladigi ki manututu adeada maga, go dapala nogoe eu m̃elu po surata pano, sara naata sikasikai pae naworada maga, pae nasum̃a maga ni tamada maga.