NAHUM 1 - Ngunese Bible

¹ Naveanoasaiana sikai nalo ni Nineveh. Tusi ni navunusiana ki Nahum, naatam̃oli ni Elkosh.

² Yehovah e pei Sup̃e totowo kasua sikai go e pei tea sikosiko; Yehovah e do sikosiko go e pura ki namaritausuana; Yehovah e do mari nasikosikoana paki tea maga waina eu do mari dip̃a e, go e do pavaigoro namaritausuana raki tea kokona ki nia maga.

³ Yehovah e daliali namaetoana, go e lapalapa nakasuaana, go ega wo da midoakikorokoro namarinaleotageleana mau: Yehovah napua aneana e doko suitaviro go e doko nalagi atu, go napopouru maga eu pei nam̃otam̃ota ni nam̃ele natuana.

⁴ E pasa kasua ki natasi, po mari a e garagara, e mari noaisara maga mamau puti eu dap̃a; Bashan go Karmel ero kokolo, go napum̃a ni Lebanon e kuku.

⁵ Tava warua maga eu duruuru naraena, go tava sula maga eu sara; go natano e pei tea marisakiana kivea ki nia, io, maramana go tea mamau puti waina eu doko asa doko.

⁶ Sei e mariatae lawodugoro namaritausuana aneana? Go sei e mariatae doko navivitinuana ni namaetoana aneana? Namaritausuana aneana e pei tea takiana pano dapala nakapu, go vatu maga eu pei tea nadi‐ki‐kotoviana pae asa.

⁷ Yehovah e p̃ia, e pei tokora ni nasavasiliana sikai naaleatia ni nariesokiana; go e atae tea maga waina eu pavatu asa.

⁸ Ma ega wo mari sa sa ki puti tokora wanogoe ki natave warua po lelep̃esi, go ega wo kopasi lua tea kokona maga ki namaligo.

⁹ Ku midoaki p̃otae dip̃a Yehovah nasava? Nae ega wo mari sua tea mamau puti: nariesokiana ega wo da moro duleana sala kerua mau.

¹⁰ Eu pe tapala namalasi vivitip̃a, po pei tea vueana ki tea munuana adeada, ma euga wo pei tea kani‐dinomiana dapala stro garagara.

¹¹ Sikai e doko waina e m̃elu ako pano, waina e do midoaki p̃otae tea sa dip̃a Yehovah, waina e do midoaki p̃otae ki nasigisigileoana.

¹² Yehovah e noa dapala nea: Eu pe kasua p̃ia po laapa, ma euga wo pei tea taeluaana po pano puoli. A po mari ko narogokitesaana, ma aga wo da moro mari ko narogokitesaana mau.

¹³ Go ragi waia aga wo mari kotovi nakau nanoa aneana m̃elu dua ki‐go pano, go aga wo mari kotovi natali solisoli anigo maga.

¹⁴ Go Yehovah e dip̃aki natip̃akiana nalo kakam̃a, naga nagisam̃a ega ta moro pei tea sapurakiana mau: aga wo daelua nasup̃e taeana go nasup̃e takiana m̃elu dua ki nasum̃a ki sup̃e anigo maga; aga wo mari matigom̃a; nalakena nigo ku loa.

¹⁵ P̃a leo, nam̃ele maga ni tea waina e do dape narogorogoana wia umai, waina e do dogorogo ki natam̃ateana, ero doko tava warua maga! Yudah O, p̃a vavaigoro nasaisaiana tatutakiana anigo maga, p̃a vakavuro nasaiana anigo maga: nalakena tea mari‐sa‐ki ega wo da moro umai dip̃a ko mau; e pei tea mari‐puoli‐ki‐ana sua.