MARKO 8 - Ngunese Bible

¹ Naaleatia maga wanogoe, ragi waina taua warua sikai ni naatam̃oli maga e moro doko, go eu da peani te navatuna waina euga kani a mau, e soso tea vasapiseikiana aneana maga umai punusi a, po noa ki da, e naga,

² A maritadodomi taua ni naatam̃oli maga, nalakena teu sikoti au doko naaleatia dolu, go eu da peani te navatuna waina euga kani a mau:

³ go a pe tip̃aki lua ra eu pe ta maladi paki nasum̃a adeada, eu pe matekimala napua; go te seara kakada eu pae uvea umai.

⁴ Go tea vasapiseikiana aneana maga eu pasadara e, eu naga, Te naata ega wo mari atae mari naatam̃oli maga waia euga dawosa ki navinaga masop̃alo waia ega vae sava?

⁵ Go e pusuusu paki da, e naga, Ku peani bred pisa?

⁶ Go eu naga, Elarua. Go e dip̃aki taua ni naatam̃oli maga naga euga to natano: go e dape bred larua wanogoe, go e dapasavasa dodom̃ata ki, po p̃oraworae, po do dua tea vasapiseikiana aneana maga, naga euga toropusi naraeda; go eu doropusi a narae ni taua ni naatam̃oli maga.

⁷ Go eu peani naika kirikiri pisa maau: go e pasa m̃ata ki da, po pitip̃aki naga euga moro doropusi ra naraeda.

⁸ Go eu ganikani, po dawosa: go eu pilae tea tu pele ni matele maga, eu pei nalasai larua.

⁹ Go eu alagoro pei manu pati: go e dapera ki da.

¹⁰ Go e m̃araverave pagi rarua nara ma tea vasapiseikiana aneana maga eu mamau, po umai paki navanua ni Dalmanutha.

¹¹ Go Farisi maga eu dave umai, po atulake pululu ki nia, eu datagovi a ki navaivaiana sikai pae nakoroatelagi, eu mari dogo e.

¹² Go e dotorosova pakipua naatana, po naga, Ekasana tagona waia eu datago navaivaiana? Lomau a noa ki mu naga, Te navaivaiana ega wo da pei tea vituakiana paki tagona waia mau.

¹³ Go e doropusi ra eu madoko, po moro pagi rarua po paki taleva kerua pano.

¹⁴ Go eu malio ki dape navinaga; go eu peani bred sikai maau e sikoti ra doko boti.

¹⁵ Go e pasa parati ki da, po naga, Kuga vunusi, kuga matamatua ki leven ki Farisi maga go leven ki Herod.

¹⁶ Go eu dum̃ada pusum̃aki paki da, po naga, Tu dika navinaga.

¹⁷ Go Yesu e atae a po noa ki da, e naga, Ekasana ku pusum̃aki, nalakena ku dika navinaga? Ku ko da leo atae mau, po da midoaki atae mau kite? Ku peani nap̃op̃omu e kasua doko kite?

¹⁸ Ku pilake namatamu, po da leo sai kite? Go ku pilake nadaligamu, po da dogo kite? Go ku da midoa ki nia kite?

¹⁹ Ragi waina a magi manu lima p̃orae bred lima, ku dape dakati nala pisa waina eu pura ki matele maga? Eu noa ki nia, eu naga, Rualima sikai tamate dua.

²⁰ Go ragi waina a magi manu pati p̃orae bred larua, ku pilae matele maga eu pei navakavuroana ni nalasai pisa? Go eu noa ki nia, eu naga, Elarua.

²¹ Go e noa ki da, e naga, Ku ko da midoaki atae kite?

²² Go eu rumai paki Bethsaida. Go eu piragi naatam̃oli kesa sikai umai punusi a, go eu pavarani a naga ega kisidogo e.

²³ Go e puati tea kesa wanogoe ki nam̃elearuna, po piragi a paki etaku ni natokoana; go ragi waina e daniu sua namatana maga, po doropusi sua nam̃elearuna maga asa, e pusuusu paki nia, e naga, Ku punusi te navatuna kite?

²⁴ Go e leo sake, po naga, A punusi naatam̃oli maga; nalakena e punusi ra eu dakiusi nakau maga, waina eu surata.

²⁵ Go e moro doropusi nam̃elearuna maga namatana maga; go e leosoki, po moro leosai p̃ia, po punusi m̃ata ki naleo maga mamau puti.

²⁶ Go e dip̃aki lua e paki nasum̃a aneana, po naga, P̃a ta paki natokoana mau.

²⁷ Go Yesu e pano, nara ma tea vasapiseikiana aneana maga eu mamau, po paki natokoana kiki maga ni Kaisarea Filippi: go e pusuusu paki tea vasapiseikiana aneana maga napua, e noa ki da, e naga, Naatam̃oli maga eu noa naga kinau a pei sei?

²⁸ Go eu noa ki nia, eu naga, Yoane Bapetiso: go tea p̃ota seara, Eliyah; ma tea p̃ota seara, Profeta maga sikai kakada.

²⁹ Go nae e pusuusu paki da, e naga, Ma nimu ku noa naga kinau a pei sei? Petero e pasadara po noa ki nia, e naga, Nigo ku pei Kristo.

³⁰ Go e pasa sokisoki ra naga euga ta noakisai te naata nalo kakana mau.

³¹ Go e atulake pasapisei ki da, naga e one naatam̃oli Natuna one naga ega sua narogokitesaana laapa, po pei tea tip̃adoana pae tea matua maga, go tea viri warua maga, go tea midiri maga, po pei tea maripunueana, go naga ega tuleana edaku ki naaleatia dolu.

³² Go e pasa lina ki navasaana wanogoe. Go Petero e puati a, po pae asa pasa kasua ki nia.

³³ Ma e dum̃ana doa e, po punusi tea vasapiseikiana aneana maga, po pasa kasua ki Petero, po naga, Pa vaki natakugu pano, Satan; nalakena ku da midoa ki m̃ata ki naleo maga ki Sup̃e mau, ma ku midoa ki m̃ata ki naleo maga ki naatam̃oli maga.

³⁴ Go e soso taua ni naatam̃oli maga nara ma tea vasapiseikiana aneana maga eu mamau umai punusi a, go e noa ki da, e naga, Te naata e pe masauna naga ega edakugoro au umai, ega tum̃ana pasagoro e, po dape dakati nakau valadagoto aneana, po dausi au.

³⁵ Nalakena naata waina e pe masauna naga ega mautipauri namauriana aneana ega wo dape puoli ki nia; go naata waina e pe wo dape puoli ki namauriana aneana nalakena kinau go narogorogoana wia ega wo mautipauri a.

³⁶ Nalakena naatam̃oli sikai e pe talua maramana mamau, po dape puoli ki namauriana aneana asa, e pe wia asa dapale sava?

³⁷ Nalakena naatam̃oli sikai ega vitua ki nasava naga ega taulua namauriana aneana asa?

³⁸ Nalakena naata waina e pe wo maliere ki nau go ki navasaana aginau maga tagona maripele go marinaleosa waia, naatam̃oli Natuna ma ega wo maliere ki naata wanogoe ragi waina ega wo umai pilake nasamasamaana ki Tamana sikoti agelo tautau maga euga wo mamau umai.