MARKO 4 - Ngunese Bible

¹ Go e moro atulake navasapiseikiana elau. Go taua warua sa sikai ni naatam̃oli maga eu saisai punusi a, dapala waina e pagi rarua sikai, po dasake asa. Go taua mamau ni naatam̃oli maga eu doko elau ni euta.

² Go e pasapisei ki da pae naluluakia maga tea laapa, po noa ki da navasapiseikiana aneana,

³ e naga, Kuga taki dorogo: Kuga leo, tea sapuraki e dave pano naga ega sapuraki:

⁴ go e pakilina, ragi waina e do sapuraki, naga napati seara e dowo pisari nadigi ni napua, go manu maga eu rumai po dadinomi a.

⁵ Go tea p̃ota seara e dowo paki malo ni vatu, waina natano e kiki asa; go e pisou m̃araverave, nalakena natano e da matolu mau:

⁶ go ragi waina elo e sake, e pei tea tap̃arakiana; go e kokolo, nalakena e dika nakoana.

⁷ Go tea p̃ota seara e dowo m̃aleoputo ni tea makalikali maga, go tea makalikali maga eu ulua sake, po mari a e doko, go e da dau ki nawana mau.

⁸ Go tea p̃ota seara e dowo sili paki natano wia, po dau ki nawana, e do ulua sake po lavulavu; go e dau, ki rualima dolu, go ki rualima latesa, go ki p̃onotia sikai.

⁹ Go e naga, Naata waina e pilake nadaliga maga naga ega rogo, ega rogo.

¹⁰ Go ragi waina e sikina doko, tea maga waina eu doko dalivirigoro e go tea rualima sikai tamate dua eu pusuusu paki nia ki naluluakia maga wanogoe.

¹¹ Go e noa ki da, e naga, Paia ni namarakiana ki Sup̃e e pei tea vituakiana paki mu: ma tea maga waina eu doko etaku, naleo maga mamau puti eu madeada pei tea mariana pae naluluakia maga:

¹² naga tea waina eu leosai euga leosai, po da leoatae mau; go naga tea waina eu dogo euga rogo, po da midoa ki atae mau; mase eu pe liliu umai, go e pe madeada pei tea midoakikorokoroana.

¹³ Go e noa ki da, e naga, Ku da atae naluluakia wanogoe kite? Go kuga wo atae naluluakia maga mamau puti dapale sava?

¹⁴ Tea sapuraki e sapura ki navasaana.

¹⁵ Go tea maga waia eu pei tea ni nadigi ni napua, waina navasaana e pei tea sapurakiana asa; go ragi waina eu dogo, Satan e umai m̃araverave, po dape lua navasaana waina e pei tea sapurakiana ara.

¹⁶ Go dapala nogoe tea maga waia eu pei tea maga waina eu pei tea sapurakiana paki malo ni vatu maga, waina, ragi waina eu dogo navasaana, eu dape a m̃araverave po laelaea;

¹⁷ go eu dika nakoada nap̃alauda, ma eu doko te ragi; go ragi waina nariesokiana kite nakopaleleana e pakilina nalakena navasaana, eu pei tea mariana eu dapilagona m̃araverave.

¹⁸ Go tea p̃ota seara eu pei tea maga waina eu pei tea sapurakiana m̃aleoputo ni tea makalikali maga; nara eu pei tea maga waina eu dogo navasaana,

¹⁹ go namidoa‐ki‐parati‐ki‐ana ni maramana, go nasurueana ni nasogolapaana, go namasauana ni tea p̃ota maga eu sili ara, po mari navasaana e dodo, go e pei tea mariana e da dau mau.

²⁰ Go tea maga waina eu pei tea sapurakiana paki natano wia; nara eu pei tea maga waina eu dogo navasaana, po dape a, po dau ki nawada, ki rualima dolu, go ki rualima latesa, go ki p̃onotia sikai.

²¹ Go e noa ki da, e naga, Nasulu e pei tea tapeana umai naga ega vei tea lawokiana etano ki lasa totowo, kite etano ki nawewele, go naga ega ta pei tea lawokiana naliana kite?

²² Nalakena te navatuna sikai e da pei tea surukiana mau, ma naga ega vei tea mariana ega toko lina; go te navatuna sikai e da pei tea mariana e sili mau, ma naga ega umai paki lina.

²³ Te naata sikai e pe vilake nadaliga maga naga ega rogo, ega rogo.

²⁴ Go e noa ki da, e naga, Kuga to punusi tea waina ku dogo e: totowo waina ku dowogi asa ega wo manimu pei tea rowogiana asa: go ega wo manimu pei tea sokariana.

²⁵ Nalakena naata waina e peani, ega wo pei tea vituakiana paki nia: go naata waina e da peani mau, tea waina e peani a ega wo pei tea tapeluaana kiana.

²⁶ Go e naga, Namarakiana ki Sup̃e e dakiusi waina naatam̃oli sikai e pe nadi ki napati ni nawa nakau natano;

²⁷ go e pe maturu po duleana p̃ogi go aleati, go napatina e pe visou po ulua, dapala waina nae e da atae a mau.

²⁸ Natano e dum̃ana dau ki nawana; nauluna e pea, m̃okai e dausi a korn e edaku puka m̃okai.

²⁹ Ma ragi waina nawana e mami, e m̃araverave sai ki tea tagaukotovi, nalakena e pei ragi ni nalolovaeana.

³⁰ Go e naga, Tuga noa naga namarakiana ki Sup̃e e dakiusi nasava? Kite tuga lulua ki nia ki seve naluluakia?

³¹ E dakiusi napati ni sinapi sikai, waina, ragi waina e pei tea sapurakiana natano, go e kiki sa ni napati maga mamau puti ni nawa nakau ni natano,

³² ma ragi waina e pei tea sapurakiana, e ulua sake, po p̃arua liu tea lawoana maga mamau puti, po sai ki arana warua maga; dapala waina manu maga ni nakoroatelagi eu mari atae doko etano ni melu kakana.

³³ Go ki naluluakia laapa dapala nogoe e pasa ki da navasaana, dapala waina eu mari atae dogo e:

³⁴ go e da pasa ki da masale ki naluluakia sikai mau: ma e noa p̃otae naleo maga mamau puti paki tea vasapiseikiana aneana maga ragi waina eu sikida doko.

³⁵ Go naaleatia wanogoe, ragi waina e po pei ragi melu, e noa ki da, e naga, Tuga tuagoto paki taleva kerua pano.

³⁶ Go eu doropusi taua ni naatam̃oli maga eu madoko, po musagi a, dapala waina e doko rarua. Go rarua p̃ota seara eu sikoti a pano.

³⁷ Go nalagi atu warua sikai e pakilina, go napeao maga eu do pagi paki nawoka ni rarua, dapala waina e do pei tea vakavuroana.

³⁸ Go nae e doko kiedaku, e maturu p̃aua: go eu pulevule a, po noa ki nia, eu naga, Tea Vasapiseiki, ku dodop̃arop̃aro naga tauga mate kite?

³⁹ Go e darapa, po pasa kasua ki nalagi, po noa ki natasi, e naga, P̃a vunuta, p̃a tatam̃ate. Go nalagi e maro, go e dam̃ate p̃arua.

⁴⁰ Go e noa ki da, e naga, Ekasana ku mataku? Ku ko dika nasaralomauana kite?

⁴¹ Go eu mataku p̃arua, po dum̃ada noa ki da, eu naga, Naata waia e pei sei, waina nalagi go natasi ma ero dogo parati ki nia?