MARKO 2 - Ngunese Bible

¹ Go ragi waina e moro sili paki Kapernaum edaku ki naaleatia seara, e pei tea rogorogokiana naga e doko ekopu ni nasum̃a.

² Go tea laapa eu saisai, dapala waina te namalopa e da moro doko mau, go e da moro doko pisari namata mau: go e pasa ki da navasaana.

³ Go eu rumai, eu dape tea sarumate sikai umai punusi a, waina e pei tea tapetapeana pae tea vati.

⁴ Go ragi waina eu mari sa umai paki m̃aladigi ki nia nalakena taua ni naatam̃oli maga, eu maripakasa ki elagi ni nasum̃a tokora waina e doko asa: go ragi waina eu kili sai sua e, eu doro pakitano nawewele waina tea sarumate e one asa one,

⁵ Go Yesu e punusi nasaralomauana adeada po noa ki tea sarumate, e naga, Koto, namarinaleosaana anigo maga eu pei tea midoakikorokoroana.

⁶ Ma tea midiri maga seara kakada eu dasake tokora wanogoe, po midoakiusiusi nap̃op̃oda,

⁷ Ekasana naatam̃oli waia e pasa dapalana? E pasa sa ki: sei e mari atae midoakikorokoro namarinaleosaana maga ma tea sikai maau,

⁸ Sup̃e? Go m̃araverave Yesu, ragi waina e atae pae naatana naga eu midoakiusiusi nap̃alauda dapala nogoe, e noa ki da, e naga, Ekasana ku midoakiusiusi tea maga wanogoe nap̃op̃omu?

⁹ Seve tea e manainai p̃ia, A pe noa ki tea sarumate, Namarinaleosaana anigo maga eu pei tea midoakikorokoroana; kite a pe noa, P̃a tuleana, po dape dakati nawewele anigo, po surata?

¹⁰ Ma naga kuga atae naga naatam̃oli Natuna e peani naveinawotaana maramana naga ega midoakikorokoro namarinaleosaana maga (e noa ki tea sarumate),

¹¹ e naga, A noa ki‐go, P̃a tuleana, p̃a tape dakati nawewele anigo, po paki nasum̃a anigo pano.

¹² Go e duleana, po m̃araverave dape dakati nawewele, po paki katama narae ni tea maga mamau puti; dapala eu mamau puti saram̃akoto, po samasamani Sup̃e, po naga, Au da punusi tea tapalana sala vea mau.

¹³ Go e moro dave pano po pae elau; go taua mamau ni naatam̃oli maga eu rumai punusi a, go e pasapisei ki da.

¹⁴ Go ragi waina e do liu pano, e punusi Levi natu ni Alefaio e do dasake tokora ni nasautoga, go e noa ki nia, e naga, P̃a rausi au. Go e duleana po dausi a.

¹⁵ Go e pakilina, naga e kere one ganikani ekopu ni nasum̃a aneana, go tea tape nasautoga laapa go tea mari naleo sa laapa eu mamau kere one sikoti Yesu go tea vasapiseikiana aneana maga: nalakena tea laapa eu doko, go eu dausi a.

¹⁶ Go tea midiri maga ni Farisi maga, ragi waina eu punusi naga e ganikani sikoti tea mari naleo sa maga go tea tape nasautoga maga, eu noa ki tea vasapiseikiana aneana maga, eu naga, E ganikani po munu sikoti tea tape nasautoga maga go tea mari naleo sa maga.

¹⁷ Go ragi waina Yesu e dogo e, e noa ki da, e naga, Tea maga waina eu kasua eu da dapala waina e p̃ia naga euga masau naatam̃oli sikai ni medisine mau, ma tea waina eu sasana eu dapala nogoe: a da umai naga aga soso tea leana maga mau, ma a umai naga aga soso tea marinaleosa maga.

¹⁸ Go tea vasapiseikiana maga ki Yoane go Farisi maga eu pali doko: go eu rumai po noa ki nia, eu naga, Ekasana tea vasapiseikiana maga ki Yoane go ki Farisi maga eu pali, ma tea vasapiseikiana anigo maga eu da pali mau?

¹⁹ Go Yesu e noa ki da, e naga, Tea vitawiri tana ri maga eu mari atae susue, ragi waina tea vitawiri e sikoti ra doko kite? Ragi waina eu peani tea vitawiri e sikoti ra doko, eu mari sa pali.

²⁰ Ma naaleatia maga euga wo umai, waina tea vitawiri ega wo pei tea tapeluaana kiada, go ragi wanogoe euga wo pali naaleatia wanogoe.

²¹ Te naata sikai e da duri matele sikai ni nakulukulu waina e ko da pei tea marim̃atakiana sugoro tuai mau: eu pe turi a asa nausuvakiana e pe m̃elu dua ki nia, tea vau e pe m̃elu dua ki tea tuai, go namaworaana e pe warua.

²² Go te naata sikai e da daki waine vau paki noai ni nawili tuai maga mau: eu pe taki nia paki ara waine e pe mari nawili maga eu pe masai, go waine e pe vuoli, go nawili maga: ma eu daki waine vau paki nawili vau maga.

²³ Go e pakilina, naga e surata duaduru vanua maga ni korn naaleatia ni sabbath; go tea vasapiseikiana aneana maga eu pae asa surata po lei m̃okai maga ni korn.

²⁴ Go Farisi maga eu noa ki nia, eu naga, P̃a leo, ekasana eu mari naaleatia ni sabbath tea waina e da pae nawotaeana mau?

²⁵ Go e noa ki da, e naga, Ku ko da peve tea waina David e mari a, ragi waina e dika, po pitolo, nara ma tea maga waina eu sikoti a doko kite?

²⁶ Dapala waina e paki roara ni nasum̃a ki Sup̃e ragi waina Abiathar e pei tea viri warua liu, po gani bred tokorae maga, waina e da pae nawotaeana mau naga tea laapa euga kani a, ma e pei tea waina tea viri maga euga sikida gani a, po dua tea maga waina eu sikoti a doko?

²⁷ Go e noa ki da, e naga, sabbath e magi naatam̃oli pei tea mariana, go naatam̃oli e da magi sabbath pei tea mariana mau:

²⁸ nalakena tea wanogoe naatam̃oli Natuna e pei nawota ni sabbath.