MARKO 16 - Ngunese Bible

¹ Go ragi waina sabbath e nopu, Maria ni Macdala, go Maria Yakobo p̃ilana, go Salome, eu pakotovi tea ni nap̃o wia maga, naga euga umai po puvurai ki nia.

² Go malip̃ogi sa ni naaleatia vea ni wiik, eu rumai paki matigo ragi waina elo e sake sua.

³ Go eu do dum̃ada noa ki da, Sei ega wo manigida malulua ki vatu m̃elu dua ki namata ni matigo?

⁴ Go eu sike namatada, po punusi naga vatu e pei tea maluluakiana liliu: nalakena e p̃arua sa.

⁵ Go eu paki ekopu ni matigo, po punusi natureai sikai e do natano taleva ni matua, e pei tea sugoroana ki sugoro tare sikai; go eu maga p̃arua.

⁶ Go e noa ki da, e naga, Kuga ta maga p̃arua mau: ku laaga Yesu ni Nasareth, waina e pei tea turiana nakau valadagoto: e po duleana; e da doko nea mau: kuga leo, tokora waina eu doropusi a e one asa!

⁷ Ma kuga vano, kuga noa ki tea vasapiseikiana aneana maga go Petero, naga E pea ki mu paki Calilea pano: tokora wanogoe kuga wo punusi a asa, dakiusi waina e noa ki mu asa.

⁸ Go eu dave pano, po sava m̃elu dua ki matigo pano; nalakena narururuana go nasaram̃akotoana ero puati ra: go eu da noa ki te naata te navatuna mau; nalakena eu mataku.

⁹ Go ragi waina e duleana malip̃ogi sa ni naaleatia vea ni wiik, e pea pakilina ki Maria ni Macdala, waina e mari dimon larua eu dave m̃elu dua ki nia pano sala vea.

¹⁰ Nae e pano po dogorogo ki nia paki tea maga waina eu sikoti a doko sala vea, eu do susue po do dagi.

¹¹ Go nara, ragi waina eu dogo naga e mauri, go naga nae e punusi sua e, eu da saralomau mau.

¹² Go edaku ki tea maga wanogoe e panop̃ota pakilina ki tea rua kakada, ragi waina ero surata paki navanua pano.

¹³ Go nara ero pano po dogorogo ki nia paki tea p̃ota maga: go eu da saralomau navasaana adeada mau.

¹⁴ Go e edaku pakilina ki tea rualima sikai tamate sikai ragi waina eu kere one ganikani; go e pasa kasua ki da nasarateap̃aloana adeada go nakasuaana ni nap̃op̃oda, nalakena eu da saralomau navasaana ki tea maga waina eu punusi a edaku ki e duleana mau.

¹⁵ Go e noa ki da, e naga, Kuga vaki maramana mamau, po dogorogo ki narogorogoana wai paki natawonakiana mamau.

¹⁶ Tea waina e saralomau po pei tea bapetisoana ega wo pei tea mautipauriana; ma tea waina e da saralomau mau ega wo pei tea tip̃akotoviana.

¹⁷ Go navaivaiana maga waia euga wo dausi sikoti tea maga waina eu saralomau: pae nagisagu euga wo mari dimon maga euga tave m̃elu pano; euga wo pasa ki namena vau maga;

¹⁸ euga wo pua dakati m̃aata maga, go eu pe munu te navatuna ni namateana, ega wo da mari sa ki da mau; euga wo pusake nam̃elearuda maga tea sasana maga, go euga wo moro p̃ia.

¹⁹ Go Nawota Yesu, edaku ki e pasa ki sua ra, e pei tea tapeana sake paki nakoroatelagi pano, po dasake pisari nam̃elearu ni matua ni Sup̃e.

²⁰ Go nara eu dave pano po dogorogo sara tokora, Nawota e do p̃osiwosi sikoti ra, po do lawosoki navasaana pae navaivaiana maga waina eu dausi a. Amen.