MARKO 13 - Ngunese Bible

¹ Go ragi waina e dave m̃elu dua ki nasum̃a tapu, tea vasapiseikiana aneana maga sikai kakada e noa ki nia, e naga, Tea Vasapiseiki, p̃a leo, vatu maga waia eu dapale sava go natavagiana maga waia eu dapale sava!

² Go Yesu e noa ki nia, e naga, Ku punusi natavagiana warua maga waia? Vatu sikai ega wo da pei tea toropusiana doko elagi ni vatu sikai nea mau, waina ega wo da pei tea rakaiana mau.

³ Go ragi waina e do natano tava ni Oliva kivea ki nasum̃a tapu, Petero go Yakobo go Yoane go Anderea eu pusuusu paki nia eu pei nara mau, eu naga,

⁴ P̃a noa ki gami, tea maga wanogoe euga wo pakilina seve ragi? Go nasava ega wo pei navaivaiana ragi waina tea maga wanogoe euga wo pei m̃aladigi naga euga vei tea marisuaana puti?

⁵ Go Yesu e atulake noa ki da, e naga, Kuga vunusi naga te naata ega ta piragi sasap̃o ki mu mau.

⁶ Tea laapa euga wo umai pae nagisagu, po naga, Kinau a pei nae; go euga wo piragi sasap̃o ki tea laapa.

⁷ Go ragi waina kuga wo dogo navakalo maga go narogorogoana maga ni navakalo, kuga ta mataku mau: tea maga wanogoe e one ara one naga euga vakilina; ma namatap̃agona edaku e ko puoli.

⁸ Nalakena nalauna ega wo duleana dip̃a nalauna, go namarakiana ega wo duleana dip̃a namarakiana: naruru maga euga wo pakilina tokora sikasikai; navitoloana warua maga euga wo pakilina: tea maga wanogoe eu pei naatulakeana ni narogokitesaana maga.

⁹ Ma nimu kuga tum̃amu leo paratiki mu: nalakena euga wo pitua ki mu paki nasaisaiana ni navasap̃otaeana maga; go kuga wo pei tea varatiana nasum̃a ni nasaisaiana maga; go kuga wo lawodu narae ni tea maramara maga go nawota maga nalakena kinau, naga kuga vei nanoasokisokiana sikai paki da.

¹⁰ Go e one narogorogoana wia one naga ega vei tea rogorogokiana paki nalauna maga mamau puti ega vea.

¹¹ Go ragi waina euga wo piragi lua mu, po pitua ki mu, kuga ta pea midoaki paratiki tea waina kuga wo noa e mau: ma tea waina ega wo pei tea vituakiana paki mu aura wanogoe, kuga noa tea wanogoe: nalakena e da pei nimu mau waina ku pasa, ma e pei Naatana Tapu.

¹² Go taina ega wo pitua ki taina paki namateana, go tamana ega wo pitua ki natuna; go natuda euga wo duleana dip̃a tamada go p̃ilada po mari ra eroga wo pei tea maripunueana.

¹³ Go kuga wo pei tea vilosiana pae naatam̃oli maga mamau puti nalakena nagisagu: ma tea waina e soki du pa pa paki namatap̃agona edaku, nae ega wo pei tea mautipauriana.

¹⁴ Ma ragi waina kuga wo punusi tea mamaragokiana waina e mari e pei masomaladi e lawodu tokora waina e da p̃ia naga ega lawodu asa mau (tea waina e peve ega midoaki atae), ragi wanogoe tea maga waina eu doko Yudea euga sava paki tava maga pano:

¹⁵ go tea waina e doko nap̃au ni nasum̃a ega ta siwo mau, go ega ta paki ekopu mau, naga ega tape lua te navatuna waina e doko ekopu ni nasum̃a aneana:

¹⁶ go tea waina e doko vanua ega ta liliu mau naga ega tape sugoro kovagoro aneana.

¹⁷ Ma ai ki tea maga waina eu diena go ki tea maga waina eu pitua ki susu naaleatia maga wanogoe!

¹⁸ Go kuga tapasavasa naga ega ta pei ragi ni namaladiana mau.

¹⁹ Nalakena naaleatia maga wanogoe euga wo pei nariesokiana, dapala waina tea takiusi a e ko da pakilina mau pae naatulakeana ni natawonakiana waina Sup̃e e dawona ki nia pa pa paki ragi waia, go waina ega wo da moro pakilina mau.

²⁰ Go Yehovah e pe ta sula kotovi naaleatia maga wanogoe mau, te nap̃okasi sikai e pe ta pei tea mautipauriana mau: ma nalakena tea matadoaana maga, waina e matadoa ra, e sula kotovi naaleatia maga.

²¹ Go ragi wanogoe te naata e pe noa ki mu, Kuga leo, Kristo e doko nea; kite, Kuga leo, e doko wanana; kuga ta saralomau asa mau:

²² nalakena Kristo sorosoro maga go profeta sorosoro maga euga wo pakilina, po pitua ki navaivaiana maga go tea ni namagaana maga, naga, e pe vei tea mariataeana, euga viragi sasap̃o ki tea matadoaana maga.

²³ Ma nimu kuga to punusi: kuga leo, a po pea noa ki mu naleo maga mamau puti.

²⁴ Ma naaleatia maga wanogoe, edaku ki nariesokiana wanogoe, elo ega wo maligo, go atelagi ega wo da pitua ki namarama kakana mau,

²⁵ go m̃asoe maga euga wo do pevera pae nakoroatelagi umai, go tea kasua maga waina eu doko nakoroatelagi maga euga wo pei tea parivariakiana.

²⁶ Go ragi wanogoe euga wo punusi naatam̃oli Natuna ega wo doko napopouru maga umai pilake nakasuaana warua go nasamasamaana.

²⁷ Go ragi wanogoe ega wo dip̃aki lua agelo maga, po piragi saisai ki tea matadoaana aneana maga m̃elu dua ki nalagi pati, pae tokora ni uvea mau ni maramana pa pa paki tokora ni uvea mau ni nakoroatelagi.

²⁸ Ma kuga atae pae napuliva naluluakia kakana: ragi waina arana e po melumelu, go nauluna maga eu pakilina, ku atae naga ragi ni sui e pei m̃aladigi;

²⁹ dapala nogoe nimu ma, ragi waina kuga wo punusi tea maga wanogoe eu do pakilina, kuga atae naga e pei m̃aladigi, naga e doko pisari namata ni nasum̃a maga.

³⁰ Lomau a noa ki mu, naga Tagona waia euga wo da pano puoli mau pa pa tea maga mamau puti wanogoe euga wo pakilina.

³¹ Nakoroatelagi go maramana eroga wo pano puoli: ma navasaana aginau maga euga wo da pano puoli mau.

³² Ma nalo ni naaleatia wanogoe go aura wanogoe te naata e da atae a mau, go agelo maga waina eu doko nakoroatelagi, go Natuna, ma Tamagu e sikina atae a.

³³ Kuga to punusi, kuga to leleogoro po do dapasavasa: nalakena ku da atae ragi kakana mau.

³⁴ E dapala naatam̃oli sikai waina e pei nam̃enaki atatoko, waina e doropusi nasum̃a aneana e doko, po dua tea suasua aneana maga naveinawotaana, e dua ra nawosiana adeada e sarasara puti ra, po dip̃a ki tea leo parati ki namata naga ega leleogoro.

³⁵ Nalakena tea wanogoe kuga to leleogoro: nalakena ku da atae ragi waina nawota ni nasum̃a ega wo umai asa mau, mase ragi melu mau, kite p̃ogi matua, kite ragi ni toa e dare, kite malip̃ogi;

³⁶ naga e pe umai m̃araverave ega ta pap̃ai mu ku do maturu.

³⁷ Go tea waina a noa ki mu asa a noa ki tea maga mamau puti asa, a naga, Kuga to leleogoro.