MARKO 12 - Ngunese Bible

¹ Go e atulake pasa ki da pae naluluakia maga. Naatam̃oli sikai e lawo roara ni vaine sikai, po marigoro e ki nakau ulua, po kili m̃oru ni nasua ni nawa ni vaine asa, po davagi nasum̃a varau pakilagi, po suasua ki nia paki tea wosiwosi natano maga, po paki navanua p̃ota sikai pano.

² Go ragi ni p̃aunarago e dip̃aki lua tea suasua sikai e pa punusi tea wosiwosi natano maga, naga euga tua e ega tape nawa ni nakau ni roara ni vaine seara kakada.

³ Go eu puati a, po parati a, po dip̃aki luae e p̃alo pano.

⁴ Go e moro dip̃aki lua tea suasua p̃ota sikai e pa punusi ra; go nae eu mari a e pei wotu nap̃auna, po mari dao asa.

⁵ Go e dip̃aki lua tea p̃ota sikai; go nae eu mari punue a: go tea p̃ota laapa; eu parati seara, po mari punue seara.

⁶ E ko peani tea sikai, natuna dodomiana sikedau: e dip̃aki lua e edaku pa punusi ra, e naga, Euga wo dodomadagani natugu.

⁷ Ma tea wosiwosi natano maga wanogoe eu dum̃ada noa ki da, eu naga, Tea waia e pei talakea ni p̃aumaso ki tamana; kuga umai, tuga mari punue a, go p̃aumaso ega wo pei tea anigida.

⁸ Go eu puati a, po mari punue a, po nadi ki nia paki etaku ni roara ni vaine.

⁹ Nalakena tea wanogoe talakea ni roara ni vaine ega wo mari nasava? Ega wo umai po mari punue tea wosiwosi natano maga wanogoe, po pitua ki roara ni vaine paki tea p̃ota maga.

¹⁰ Ku ko da peve navasaana midiriana waia kite? Vatu waina tea tavagi maga eu leodoa e, Nae e pei tea mariana e pei nap̃au ni naweluki:

¹¹ Tea wanogoe e m̃elu Yehovah pakilina, Go e pei tea ni namagaana namatagida.

¹² Go eu laaga naga euga vua soki a; go eu matau ki taua ni naatam̃oli maga; nalakena eu atae naga e noa naluluakia wanogoe dip̃a ra: go eu doropusi a e doko, po pano.

¹³ Go eu dip̃aki lua Farisi seara go naatam̃oli seara ki Herod pano punusi a, naga euga soli a ki navasaana.

¹⁴ Go ragi waina eu rumai, eu noa ki nia, eu naga, Tea Vasapiseiki, au atae naga ku pei lomau, po da midoaki paratiki te naata sikai mau: nalakena ku da leo paki narae ni naatam̃oli maga mau, ma ku pasa pisei ki lomau ki napua ki Sup̃e: E pae nawotaeana naga tuga tua Kaisar nasautoga, kite ega tika?

¹⁵ Tuga vitua, kite tuga ta pitua mau? Ma e atae nakalep̃oana adeada, po noa ki da, e naga, Ekasana ku mari dogo au? Kuga maginau dape denario sikai umai, naga aga vunusi a.

¹⁶ Go eu dape a umai. Go e noa ki da, e naga, Nunu ni sei go namidiriana ki sei waia? Go eu noa ki nia, eu naga, Agi Kaisar.

¹⁷ Go Yesu e noa ki da, e naga, Kuga tua Kaisar naleo maga ki Kaisar, go kuga tua Sup̃e naleo maga ki Sup̃e. Go eu maga p̃arua asa.

¹⁸ Go Sadduki seara eu rumai punusi a, waina eu noa naga namoroduleanaana e dika;

¹⁹ go eu pusuusu paki nia, eu naga, Tea Vasapiseiki, Moses e midiri paki gami, naga Te naata taina e pe mate, po doropusi nagoroi aneana e doko, go e pe tika natuna, taina ega viragi nagoroi aneana, po magi taina mari naworana euga vakilina.

²⁰ Tamataida larua eu doko: go tea vea e piragi nagoroi sikai, go e mate po da doropusi te naworana mau;

²¹ go kerua e piragi a, po mate, e da doropusi te naworana eu doko mau; go ketolu e dapala nogoe:

²² go tea larua eu da doropusi te naworada mau. Edaku mau nagoroi wanogoe ma e mate.

²³ Ragi ni namoroduleanaana ega wo pei nagoroi ki sei kakada? Nalakena eu larua peani a e pei nagoroi adeada.

²⁴ Yesu e noa ki da, e naga, Ku da midoaki pele nalakena tea waia kite? Ku da atae navasaana midiriana maga mau, go nakasuana ki Sup̃e.

²⁵ Nalakena ragi waina euga wo duleana m̃elu dua ki tea mate, euga wo da pitawiri mau, go euga wo da pei tea vituakiana euga laki mau; ma euga wo dapala agelo maga waina eu doko nakoroatelagi.

²⁶ Ma nalo ni tea mate maga naga euga wo pei tea sikeana duleana; ku ko da peve tusi ki Moses, tokora ni nakau makalikali, dapala waina Sup̃e e pasa ki nia, po naga, Kinau a pei Sup̃e ki Abraham, go Sup̃e ki Isaak, go Sup̃e ki Yakob?

²⁷ E da pei Sup̃e ki tea mate maga mau, ma e pei Sup̃e ki tea mauri maga; ku midoaki pele p̃arua.

²⁸ Go tea sikai ni tea midiri maga e umai, po dogo ra eu dum̃ada pululu ki da, po atae naga e pasa dara p̃ia paki da, e pusuusu paki nia, e naga, Seve natip̃akiana e pei tea vea mau?

²⁹ Yesu e pasa dara, e naga, Tea vea e pei, P̃a rogo, Israel; Yehovah Sup̃e anigida, Yehovah e pei tea sikai maau:

³⁰ go p̃a dodomi Yehovah Sup̃e anigo ki nap̃op̃om̃a mamau, go ki naatam̃a mamau, go ki namidodoana anigo mamau, go ki nakasuaana anigo mamau.

³¹ Kerua e pei tea waia, P̃a dodomi tea ni m̃aladigi ki‐go ega tapala waina ku dum̃am̃a dodomi ko. Te natip̃akiana p̃ota sikai waina e p̃arua liu tea maga wanogoe e da doko mau.

³² Go tea midiri wanogoe e noa ki nia, e naga, Lomau, Tea Vasapiseiki, ku po noa p̃ia ku noa naga e pei tea sikai maau; go tea p̃ota sikai e da doko mau:

³³ go naga naatam̃oli ega dodomi a ki nap̃op̃ona mamau, go ki namidoakiataeana aneana mamau, go ki nakasuaana aneana mamau, go naga ega dodomi tea ni m̃aladigi ki nia ega tapala waina e dum̃ana dodomi a, e p̃arua liu naviriana tap̃arakiana maga mamau puti go naviriana p̃ota maga mamau puti.

³⁴ Go ragi waina Yesu e punusi naga e pasa dara ki namidoakiataeana, e noa ki nia, e naga, Ku da doko uvea ki namarakiana ki Sup̃e mau. Go te naata sikai e da moro piviari pusuusu paki nia ki te navatuna mau.

³⁵ Go Yesu e pasa dara, ragi waina e do pasa piseiki roara ni nasum̃a tapu, e naga, Ekasana tea midiri maga eu noa naga Kristo e pei David Natuna?

³⁶ David e dum̃ana noa pae Naatana Tapu, e naga, Yehovah e noa ki Nawota aginau, P̃a toko pisari nam̃elearugu ni matua, Pa pa aga mari tea kokona ki‐go maga euga vei malo vasiana ni nam̃elem̃a maga.

³⁷ David e soso e ki Nawota aneana; go e pei natuna dapale sava? Go taua warua ni naatam̃oli maga eu laelaea dogo e.

³⁸ Go e pasa pisei ki da, po naga, Kuga leo pa dua ki tea midiri maga, waina eu masauna naga euga suni sugoro varau maga surata, go waina eu masau navasadodomiana maga malo ni navakokotoana maga,

³⁹ go malo tasake vea maga ni nasum̃a ni nasaisaiana maga, go malo kere one vea maga ni nakaniana maga:

⁴⁰ waina eu gani dinomi nasum̃a ki nagoroi malepu maga, po dapasavasa parau sorosoro; nara euga wo dape natip̃akotoviana warua liu.

⁴¹ Go e dasake pisari nalia ni m̃ane, po punusi dapala waina taua ni naatam̃oli maga eu nadi ki m̃ane paki nalia ni m̃ane: go tea laapa waina eu pei sogolapa eu nadi ki tea warua paki asa.

⁴² Go nagoroi malepu sikai waina e pei tea tika e umai, po nadi ki maite dua paki asa, waina e pei farthig sikai.

⁴³ Go e soso tea vasapiseikiana aneana maga umai punusi a, po noa ki da, e naga, Lomau a noa ki mu, naga Nagoroi malepu waia, waina e pei tea tika, e nadi ki tea waina e p̃arua liu agi tea maga mamau puti waina eu do nadi paki nalia ni m̃ane:

⁴⁴ nalakena nara maga tea adeada e p̃arua, go eu nadi ki tea waina e du pele seara kakana; ma nae tea aneana e kiki, go e nadi ki puti tea waina e peani a, tea mamau waina e mauri asa.