MARKO 11 - Ngunese Bible

¹ Go ragi waina eu rumai paki maladigi ki Yerusalem, paki Bethface go Bethania, paki tava ni Oliva, e dip̃aki lua tea vasapiseikiana aneana edua kakada, po noa ki da, e naga,

² Koroga vaki natokoana kiki waina e doko kivea ki mu: go ragi waina koroga wo sili asa, koroga wo m̃araverave pap̃ai ass tureai sikai, waina e pei tea likotiana, waina te naata e ko da sakesaake asa mau; koroga veresi a, po piragi a umai.

³ Go te naata e pe noa ki mu, e pe naga, Ekasana koro mari tea waia? Koroga naga, Nawota e masauna; go ega wo dip̃aki lua e umai m̃araverave.

⁴ Go ero pano, po pap̃ai ass tureai sikai, waina e pei tea likotiana pisari namata katama napua lina; go ero peresi a.

⁵ Go te seara ni tea maga waina eu lawodu tokora wanogoe eu noa ki da, eu naga, Koro mari nasava koro peresi ass tureai?

⁶ Go ero noa ki da dapala waina Yesu e noa e: go eu suasua ki da asa.

⁷ Go ero piragi ass tureai wanogoe umai punusi Yesu, po sawa ki sugoro adeada maga asa; go e sakesaake asa.

⁸ Go tea laapa eu p̃elesa ki sugoro adeada maga napua; go tea p̃ota seara ara ni nakau maga, waina eu dae lua ra m̃elu vanua maga.

⁹ Go tea maga waina eu pea, go tea maga waina eu dausi, eu pioso, Hosanna; Tea waina e umai pae nagisa ni Yehovah e pei tea vasap̃iakiana:

¹⁰ Namarakiana waina e umai e pei tea vasap̃iakiana, namarakiana ki tamagida David: Hosanna tokora maga ni elagi mau.

¹¹ Go e sili Yerusalem, po paki roara ni nasum̃a tapu; go ragi waina e leo pilialia sua punusi naleo maga mamau puti, go e po pei ragi melu p̃arua, e dave paki Bethania pano nara ma tea rualima sikai tamate dua eu mamau.

¹² Go matamai ki nia, ragi waina eu pae Bethania umai, e pitolo.

¹³ Go ragi waina e punusi napuliva sikai uvea waina e pilake nauluna maga, e umai, mase e pe vap̃ai te navatuna asa: go ragi waina e umai paki asa, e da pap̃ai te navatuna mau ma nauluna mau; nalakena e da pei ragi ni nawa ni napuliva mau.

¹⁴ Go e pasa dara po noa ki nia, e naga, Te naata ega ta moro gani te nawa m̃elu ako mau pa pa ega tu mau du. Go tea vasapiseikiana aneana maga eu dogo e.

¹⁵ Go eu rumai paki Yerusalem: go e paki nasum̃a tapu, po pae asa kopasi paki etaku tea maga waina eu sorisori po pakokoto nasum̃a tapu, po dap̃olo siwo ki wede maga ki tea maga waina eu surupioli ki m̃ane, go malo tasake maga ki tea maga waina eu sori tokopea maga;

¹⁶ go e da suasua mau naga te naata ega tape te lasa duaduru nasum̃a tapu.

¹⁷ Go e pasa piseiki, po noa ki da, e naga, E da pei tea midiriana, naga Nasum̃a aginau ega wo pei tea sosoana ki nasum̃a ni natapasavasaana agi nalauna maga mamau puti kite? Ma nimu ku po mari a e pei valea ki tea tape pavakoto maga.

¹⁸ Go tea viri warua maga go tea midiri maga eu dogo e, po laaga dapala waina euga mari punue a asa: nalakena eu matau ki nia, nalakena taua mamau ni naatamoli maga eu saram̃akoto navasapiseikiana aneana.

¹⁹ Go ragi waina e pei ragi melu mau e paki etaku ni natokoana pano.

²⁰ Go ragi waina eu do liu pano malip̃ogi, eu punusi napuliva wanogoe e kokolo pae nakoana.

²¹ Go Petero e midoaki lua po noa ki nia, e naga, Rabbi, p̃a leo, napuliva waina ku pasa sa ki nia te kokolo.

²² Go Yesu e pasa dara po noa ki da, e naga, Kuga veani nasaralomauana paki Sup̃e.

²³ Lomau a noa ki mu, naga Naata waina e pe noa ki tava waia, P̃a vei tea tape dakatiana po pei tea nadikiana paki natasi; go e pe ta midoaki sara nap̃op̃ona mau, ma e pe saralomau naga tea waina e noa e ega wo pakilina; e pe wo peani a.

²⁴ Nalakena tea wanogoe a noa ki mu, naga Naleo maga mamau puti waina ku dapasavasa po datago ara, kuga saralomau naga ku dape ra, go kuga wo peani ra.

²⁵ Go ragi waina ku lawo du dapasavasa, ku pe veani te navatuna dip̃a te naata, kuga midoakikorokoro e; naga Tamamu waina e doko nakoroatelagi ega manimu midoakikorokoro natapiriana animu maga.

²⁶ Ma nimu ku pe ta midoakikorokoro mau, Tamamu waina e doko nakoroatelagi ega wo da midoakikorokoro natapiriana animu maga mau.

²⁷ Go eu rumai paki Yerusalem: go ragi waina e do surata nasum̃a tapu, tea viri warua maga, go tea midiri maga, go tea matua maga eu rumai punusi a;

²⁸ go eu noa ki nia, eu naga, Ku mari tea maga waia pae seve naveinawotaana? Kite sei e dua ko naveinawotaana wanogoe naga p̃a mari tea maga waia asa?

²⁹ Go Yesu e noa ki da, e naga, Aga vusuusu paki mu ki navasaana sikai, go kuga vasadara au, go aga wo noa ki mu naveinawotaana waina a mari tea maga waia asa.

³⁰ Nabapetisoana ki Yoane, e pei tea ni nakoroatelagi? Kite tea ni naatam̃oli maga? Kuga vasa dara au.

³¹ Go eu dum̃ada pusum̃aki paki da, po naga, Tu pe noa, E pei tea ni nakoroatelagi; ega wo naga, Go ekasana ku da saralomau navasaana aneana mau?

³² Ma tu pe noa, E pei tea ni naatam̃oli maga eu matau ki narei: nalakena e pei lomau naga eu mamau puti midoa ki nia naga, Yoane e pei profeta sikai.

³³ Go eu pasa dara Yesu, po naga, Au da atae a mau. Go Yesu e noa ki da, e naga, Go kinau aga ta noa ki mu mau naveinawotaana waina a do mari tea maga waia asa.