LEVITIKO 2 - Ngunese Bible

¹ Go ragi waina te naata sikai e pe vitua ki naviriana ni navinaga sikai, ni navituaana ni flaur, paki Yehovah, naviriana ni navinaga aneana ega vei tea ni flaur wia; go ega taki naroro paki asa, po doropusi libano asa:

² Go ega viragi a umai punusi Aaron natuna maga, tea viri maga: go ega tape lua kiana, nam̃elearuna ega vura ki flaur wia kakana, go ki naroro kakana, pilake libano kakana mamau puti; go tea viri ega tap̃ara ki nia wede ni naviriana, ega vei namidoaki‐paratikiana kakana, naviriana tap̃arakiana pae nakapu, tea ni nap̃o lolo paki Yehovah:

³ Go namagovai waina e doko ni navituaana ni flaur ega vei agi Aaron ma natuna maga: e pei tea tapu warua liu ni naviriana maga pae nakapu paki Yehovah.

⁴ Go ragi waina ku pe vitua ki naviriana ni navinaga sikai ni navituaana ni flaur waina e pei tea taoniana upu, ega vei keke maga waina leven e dika ara, ni flaur wia waina e pei tea mari‐sarisari‐kiana pilake naroro, kite keke manivenive maga waina leven e dika ara, waina eu pei tea vuvuraikiana ki naroro.

⁵ Go waina naviriana ni navinaga anigo e pe vei navituaana ni flaur waina eu daoni a ki vatu, ega vei tea ni flaur wia waina leven e dika asa, waina e pei tea mari‐sarisari‐kiana pilake naroro.

⁶ P̃a tap̃oraworae a, po daki naroro paki asa: e pei naviriana ni navinaga sikai.

⁷ Go waina naviriana ni navinaga anigo e pe vei navituaana ni flaur waina eu peni a ki lasa sikai, ega vei tea mariana ki flaur wia pilake naroro.

⁸ Go p̃a tape navituaana ni flaur waina e pei tea mariana ki naleo maga wanogoe umai paki Yehovah: go ega vei tea vituakiana paki tea viri, go nae ega tape a umai paki wede ni naviriana.

⁹ Go tea viri ega tape lua tea ni namidoaki‐parati‐kiana kakana m̃elu dua ki navituaana ni flaur, go ega tap̃ara ki nia wede ni naviriana: e pei naviriana pae nakapu, tea ni nap̃o lolo paki Yehovah.

¹⁰ Go namagovai waina e doko ni navituaana ni flaur, ega vei agi Aaron ma natuna maga: e pei tea tapu warua liu ni naviriana maga pae nakapu paki Yehovah.

¹¹ Te naviriana ni navinaga sikai waina kuga vitua ki nia paki Yehovah, ega ta pei tea mariana pilake leven mau: nalakena kuga ta dap̃ara ki te leven mau, kite te honi, ega vei naviriana tap̃arakiana pae nakapu paki Yehovah.

¹² Dapala naviriana ni navinaga ni nawa vea mau, kuga vitua ki da paki Yehovah: ma euga ta pei tea vituakiana doko wede ni naviriana mau, raki tea ni nap̃o lolo.

¹³ Go sara naviriana ni navinaga ni navituaana ni flaur anigo, p̃a tasimena ki da; go natasimena ni navasasokiana ki Sup̃e anigo ega ta dika ki navituaana ni flaur anigo mau: sara naviriana ni navinaga anigo maga euga vilake natasimena.

¹⁴ Go waina ku pe vitua ki navituaana ni flaur ni nawa vea maga paki Yehovah, p̃a vitua ki navituaana ni flaur ni nawa vea maga ni m̃okai ni korn waina e pei tea veniana ki nakapu, korn worosiana, tea ni m̃okai vau.

¹⁵ Go p̃a taki naroro asa, po doropusi libano asa: e pei navituaana ni flaur.

¹⁶ Go tea viri ega tap̃ara ki tea ni namidoaki‐paratikiana kakana, namagovai ni korn worosiana kakana, go namagovai ni naroro kakana, pilake libano mamau puti kakana: e pei naviriana tap̃arakiana pae nakapu paki Yehovah.