HAKAI 1 - Ngunese Bible

¹ Doko natau kerua ki nawota Darius, atelagi kelatesa kakana, nakup̃a vea ni atelagi, navasaana ki Yehovah e pae nawoka ni profeta Hakai umai paki Serubabel natu ni Shealtiel, tea maramara ni Yudah, go paki Yoshua natu ni Yehosadak, tea viri warua liu,

² po naga, Yehovah ki taua maga e noa dapala nea, e naga, Narei waia eu naga, E ko da pei ragi kakana naga nasum̃a ki Yehovah ega vei tea tavagiana.

³ Go navasaana ki Yehovah e pae nawoka ni profeta Hakai umai, po naga,

⁴ Nimu O, e pei ragi wia sikai naga kuga tum̃amu doko nasum̃a ni napapa animu maga, ragi waina nasum̃a waia e sapuraki one, kite?

⁵ Nalakena tea wanogoe Yehovah ki taua maga e noa dapala nea, e naga, Kuga midoakiusiusi napua animu maga.

⁶ Nimu ku sapura ki p̃arua, po dagaukotovi tea kiki: ku ganikani, ma ku da puka mau; ku munu, ma ku da puka asa mau; ku dum̃amu sugoro mu, ma te naata e da pivitinu mau; go tea waina e p̃osiwosi raki namoriana, e dape namoriana naga ega vai a nala masai sikai.

⁷ Yehovah ki taua maga e noa dapala nea, e naga, Kuga midoakiusiusi napua animu maga.

⁸ Kuga sake pano paki tava, po dape nakau umai, po davagi nasum̃a; naga aga maro asa, go naga aga vei tea samasamaniana, Yehovah e noa e.

⁹ Ku laaga tea warua, go kuga leo, e po pei tea kiki; go ragi waina ku dape a umai paki esum̃a, kinau a sui a. Ekasana? Yehovah ki taua maga e noa e. Nalakena nasum̃a aginau waina e sapuraki one, ragi waina nimu ku mari gonakona nasum̃a animu maga.

¹⁰ Nalakena tea wanogoe nakoroatelagi waina e doko elagi ki mu e mauti usa kakana, go natano e mauti navinagana.

¹¹ Go kinau a soso nagaragaraana sikai e umai paki navanua, go paki tava maga, go paki korn, go paki waine, go paki naroro, go paki tea waina natano e pitua ki nia, go paki naatam̃oli, go paki katel, go paki nawosiana mamau puti ni nam̃elearu maga.

¹² Ragi wanogoe Serubabel natu ni Shealtiel, go Yoshua natu ni Yehosadak, tea viri warua liu, nara ma tea ni tea viragi‐lua‐pavakotoana maga waina eu pei tea viragi‐liliuakiana, eu dogo parati ki nadaleo ni Yehovah Sup̃e adeada, go navasaana maga ki profeta Hakai, waina Yehovah Sup̃e adeada e dip̃aki nia asa; go narei eu mataku narae ni Yehovah.

¹³ Go Hakai tea tautauana ki Yehovah, e pasa paki narei ki navitaua ki Yehovah, po naga, Kinau a sikoti mu doko, Yehovah e noa e.

¹⁴ Go Yehovah e surupugoni nap̃op̃o ni Serubabel, natu ni Shealtiel, tea maramara ni Yudah, go nap̃op̃o ni Yoshua, natu ni Yehosadak, tea viri warua liu, go nap̃op̃o ni tea ni tea viragi‐luapavakotoana maga waina eu pei tea viragi‐liliua‐kiana; go eu rumai po p̃osiwosi nasum̃a ki Sup̃e adeada, Yehovah ki taua maga.

¹⁵ E pei nakup̃a kerualima dua tamate pati ni atelagi kelatesa, natau kerua ki nawota Darius.