EKSODAS 9 - Ngunese Bible

¹ Go Yehovah e noa ki Moses, e naga, P̃a vaki ekopu punusi Faraoh, po noa ki nia, p̃a naga, Yehovah Sup̃e ki naworawora ni Heberu e noa dapala waia, e naga, P̃a suasua ki narei aginau naga euga vano, naga euga maginau suasua.

² Nalakena ku pe ta suasua ki da mau naga euga vano, go ku pe moro mauti ra doko,

³ P̃a leo, nam̃elearu ni Yehovah e pe toko katel anigo waina eu doko namalasi doko, horse maga, go ass maga, go kamel maga, go navata ni kau maga, go navata ni shiip go ni naninani maga: e pe vei nasasanaana ni namateana warua sa.

⁴ Go Yehovah ega wo dap̃otae namawota ni katel ki Israel go ni katel ni Ityipt: go te navatuna sikai ni tea maga waina Israel natuna maga eu peani ra ega wo da mate mau.

⁵ Go Yehovah e datuta ragi sikai, e naga, Matamai Yehovah ega wo mari naleo wanogoe navanua.

⁶ Go Yehovah e mari naleo wanogoe matamai ki nia, go katel mamau puti ni Ityipt eu mate: ma tea sikai maau ni katel ki Israel natuna maga e da mate mau.

⁷ Go Faraoh e dip̃aki lua, go p̃a leo, katel ki naworawora ni Israel tea sikai maau sa kakada e da mate mau. Ma nap̃op̃o ni Faraoh e madaga, go e da suasua ki narei naga euga vano mau.

⁸ Go Yehovah e noa ki Moses go ki Aaron, e naga, Koroga tape natano‐apu ni upu ni nakapu, nam̃elearumu dua eroga vura ki nia, go Moses ega sapusapura ki nia paki nakoroatelagi namata ni Faraoh.

⁹ Go ega wo pei nam̃otam̃ota kirikiri usuraki navanua mamau ni Ityipt, go ega wo pei dopu waina ega wo masai ki namatana laapa doko naatam̃oli go nalo tuavati maga, usuraki navanua mamau ni Ityipt.

¹⁰ Go ero dape natano‐apu ni upu ni nakapu, po lawodu narae ni Faraoh; go Moses e sapusapura ki nia sake paki nakoroatelagi; go e pei dopu waina e masai ki namatana laapa e doko naatam̃oli go nalo tuavati maga.

¹¹ Go tea midiri tapu maga eu mari sa lawodu narae ni Moses nalakena dopu maga wanogoe; nalakena dopu maga wanogoe eu doko tea midiri tapu maga, go naka ni Ityipt mamau puti.

¹² Go Yehovah e mari nap̃op̃o ni Faraoh e kasua, go e da dogo parati ki da mau; dakiusi waina Yehovah e noa ki Moses asa.

¹³ Go Yehovah e noa ki Moses, e naga, P̃a tuleana malip̃ogi loaloa, po lawodu narae ni Faraoh, po noa ki nia, p̃a naga, Yehovah Sup̃e ki naworawora ni Heberu e noa dapala waia, e naga, P̃a suasua ki narei aginau naga euga vano, naga euga maginau suasua.

¹⁴ Nalakena sala waia kinau aga wo dip̃aki lua naatugiana aginau mamau puti paki nap̃op̃om̃a, go paki tea suasua anigo maga, go paki narei anigo; naga p̃a atae naga tea takiusi au e da doko maramana mamau mau.

¹⁵ Nalakena a pe sai ki sua nam̃elearugu, po atugi ko go narei anigo ki nasasanaana ni namateana, ku pe vei tea taelua‐sua‐ana m̃elu dua ki maramana:

¹⁶ Ma a po mari ko ku du nalakena tea waia lomau, naga aga visei ki‐go nakasuaana aginau, go naga nagisagu ega vei tea rogorogokiana usuraki maramana mamau.

¹⁷ Ku ko dugoro narei aginau, dapala ku ko da suasua ki da mau naga euga vano, kite?

¹⁸ P̃a leo, matamai ragi waia kakana aga wo mari usa ni vatu madaga sa ega wo p̃owo, dapala waina e ko da pakilina Ityipt mau pae naaleatia waina e pei tea tawonakiana asa pa pa paki ragi waia.

¹⁹ Go ragi waia p̃a tip̃aki lua, p̃a suatoro ki katel anigo go ki tea mamau puti waina ku peani ra namalasi euga vaki ekopu m̃araverave; nalakena sara naatam̃oli go sara nalo tuavati waina euga wo pei tea vap̃aiana namalasi, go waina euga wo da pei tea saisaikiana paki nasum̃a mau, usa ni vatu ega wo p̃owo ara, go euga wo mate.

²⁰ Naata waina e matau ki navasaana ki Yehovah ni tea suasua maga ki Faraoh, e mari tea suasua aneana maga go katel aneana maga eu sava paki ekopu ni nasum̃a maga:

²¹ Go naata waina e sara‐teap̃alo navasaana ki Yehovah, e doropusi tea suasua aneana maga go katel aneana eu doko namalasi doko.

²² Go Yehovah e noa ki Moses, e naga, P̃a sai ki nam̃elearum̃a paki nakoroatelagi, naga usa ni vatu ega p̃owo navanua mamau ni Ityipt, ega p̃owo naatam̃oli, go nalo tuavati maga, go nataputea visarasara, usuraki navanua ni Ityipt.

²³ Go Moses e sai ki tiko aneana paki nakoroatelagi: go Yehovah e pitua ki tovae go usa ni vatu, go nakapu e sava siwo paki natano; go Yehovah e mari usa ni vatu e p̃owo navanua ni Ityipt.

²⁴ Go usa ni vatu e p̃owo, go nakapu waina e dum̃ana puati a m̃aleoputo ni usa ni vatu, e madaga sa, dapala waina e da pakilina navanua mamau ni Ityipt sala vea mau pae ragi waina e pei nalauna.

²⁵ Go usa ni vatu wanogoe e atugi tea mamau puti waina eu doko namalasi usuraki navanua mamau ni Ityipt, naatam̃oli go nalo tuavati maga; go usa ni vatu wanogoe e atugi sara nataputea ni namalasi, po atup̃ori sara nakau ni namalasi.

²⁶ Navanua ni Coshen sikai maau, waina naworawora ni Israel eu doko asa, usa ni vatu e dika asa.

²⁷ Go Faraoh e dip̃aki lua, po pioso raki Moses go Aaron, po noa ki da, e naga, A po mari naleo sa sala waia: Yehovah e leana, go kinau go narei aginau au sigisigileo.

²⁸ Koroga vavara ni Yehovah, naga nadaleo maga ni Sup̃e, go ni usa ni vatu, ega vei te lapa; go aga wo suasua ki mu naga kuga vano, go kuga wo da moro doko mau.

²⁹ Go Moses e noa ki nia, e naga, Ragi waina aga wo paki etaku ni natokoana, aga wo darasike nam̃elearugu dua paki Yehovah; tovae maga euga wo makoto, go usa ni vatu ega wo moro dika; naga p̃a atae naga maramana e pei tea ki Yehovah.

³⁰ Ma nigo go tea suasua anigo maga, a atae naga kuga wo ko da matau ki Yehovah Sup̃e mau.

³¹ Go flaks go barle ero pei tea atugiana: nalakena barle e p̃otu ki m̃okai, go flaks e pum̃a.

³² Ma whiit go spelt ero da pei tea atugiana mau: nalakena ero ko da ulua sake mau.

³³ Go Moses e dave m̃elu dua ki Faraoh paki etaku ni natokoana, po darasike nam̃elearuna dua paki Yehovah: go tovae maga go usa ni vatu ero makoto, go usa e da pei tea takiana paki maramana mau.

³⁴ Go ragi waina Faraoh e punusi naga usa go usa ni vatu go tovae maga eu makoto, e moro sokari namarinaleosaana, po mari nap̃op̃ona e madaga, nara ma tea suasua aneana maga eu mamau.

³⁵ Go nap̃op̃o ni Faraoh e kasua, go e da suasua ki Israel natuna maga naga euga vano mau; dakiusi waina Yehovah e pasa sua asa pae Moses.