EKSODAS 8 - Ngunese Bible

¹ Go Yehovah e noa ki Moses, e naga, P̃a vaki ekopu punusi Faraoh, po noa ki nia, p̃a naga, Yehovah e noa dapala waia, e naga, P̃a suasua ki narei aginau naga euga vano, naga euga maginau suasua.

² Go nigo ku pe karai suasua ki da naga euga vano, p̃a leo, kinau a pe wo atugi navanua mamau anigo ki frok maga:

³ Go noaisara ega wo pura ki frok maga, waina euga wo sake pano po umai paki ekopu ni nasum̃a anigo, go em̃ago ni nawewele anigo, go elagi ni nawewele anigo, go paki ekopu ni nasum̃a ki tea suasua anigo maga, po pagi narei anigo, po paki upu anigo maga, go siloa anigo maga:

⁴ Go frok maga euga wo sake umai pagi ako, go narei anigo, go tea suasua anigo mamau puti.

⁵ Go Yehovah e noa ki Moses, e naga, P̃a noa ki Aaron, p̃a naga, P̃a sai ki nam̃elearum̃a go tiko anigo elagi ni noaisara maga, elagi ni nasalenoai maga, go elagi ni namarourou maga, po mari frok maga euga sake umai paki navanua ni Ityipt.

⁶ Go Aaron e sai ki nam̃elearuna elagi ni noai maga ni Ityipt; go frok maga eu sake umai, po pakanoe navanua ni Ityipt.

⁷ Go tea midiri tapu maga eu mari dapala nogoe ki nakikita adeada maga, po piragi frok maga eu sake umai paki navanua ni Ityipt.

⁸ Go Faraoh e pioso raki Moses go Aaron, po naga, Koroga vavara ni Yehovah, naga ega tape lua frok maga euga m̃elu dua ki nau go ki narei aginau pano; go aga wo suasua ki narei naga euga vano, naga euga mari naviriana paki Yehovah.

⁹ Go Moses e noa ki Faraoh, e naga, P̃a veani nasamasamaana waia dap̃au au: aga manimu, ma tea suasua anigo maga, go narei anigo, pavara ni naga frok maga euga vei tea taeluaana m̃elu dua ki‐go go ki nasum̃a anigo maga pano, po doko noaisara sikai mau seve ragi?

¹⁰ Go e naga, Matamai. Go e naga, Ega tapala navasaana anigo: naga p̃a atae naga tea takiusi Yehovah Sup̃e aginami e da doko mau.

¹¹ Go frok maga euga wo m̃elu dua ki‐go, go ki nasum̃a anigo maga, go ki tea suasua anigo maga, go ki narei anigo pano; euga wo doko noaisara sikai mau.

¹² Go Moses go Aaron ero dave m̃elu dua ki Faraoh pano: go Moses e pioso paki Yehovah nalo ni frok maga waina e piragi ra umai paki Faraoh.

¹³ Go Yehovah e mari dapala navasaana ki Moses; go frok maga eu mate m̃elu dua ki nasum̃a maga, go ki roara maga, go ki vanua maga pano.

¹⁴ Go eu daua ki da eu pei tauataua maga: go navanua e p̃oa.

¹⁵ Ma ragi waina Faraoh e punusi naga ragi namaromaroana e doko, e dum̃ana mari nap̃op̃ona e madaga, po da dogo parati ki da mau; dakiusi waina Yehovah e noa e.

¹⁶ Go Yehovah e noa ki Moses, e naga, P̃a noa ki Aaron, p̃a naga, P̃a sai ki tiko anigo, po p̃okati nam̃otam̃ota ni natano, go ega wo pei kutu maga usuraki navanua mamau ni Ityipt.

¹⁷ Go ero mari dapala nogoe; go Aaron e sai ki nam̃elearuna go tiko aneana, po p̃okati nam̃otam̃ota ni natano, go kutu maga eu doko naatam̃oli, go nalo tuavati maga; nam̃otam̃ota mamau puti ni natano e po pei kutu usuraki navanua mamau ni Ityipt.

¹⁸ Go tea midiri tapu maga eu mari dapala nogoe ki nakikita adeada maga naga euga mari kutu maga euga vakilina, ma eu mari sap̃ona: go kutu maga eu doko naatam̃oli, go nalo tuavati maga.

¹⁹ Go tea midiri tapu maga eu noa ki Faraoh, eu naga, Tea waia e pei nakini ni Sup̃e: go nap̃op̃o ni Faraoh e kasua, go e da dogo parati ki da mau; dakiusi waina Yehovah e noa e.

²⁰ Go Yehovah e noa ki Moses, e naga, P̃a tuleana malip̃ogi loaloa, po lawodu narae ni Faraoh; p̃a leo, e dave umai paki noai; go p̃a noa ki nia, p̃a naga, Yehovah e noa dapala waia, e naga, P̃a suasua ki narei aginau naga euga vano, naga euga maginau suasua.

²¹ Nalakena, ku pe ta suasua ki narei aginau mau naga euga vano, p̃a leo, a pe wo dip̃aki lua lago e pe wo umai paki mu, ma tea suasua anigo maga, go narei anigo, go paki ekopu ni nasum̃a anigo maga: go nasum̃a ki naka ni Ityipt maga euga wo pura ki lago, go natano maga waina nara eu doko asa.

²² Go naaleatia wanogoe aga wo p̃otae lua navanua ni Coshen, waina narei aginau eu doko asa, dapala lago seara euga wo da doko asa mau; naga p̃a atae naga kinau a pei Yehovah m̃aleoputo ni maramana.

²³ Go aga wo mari namawota sikai ega wo doko namawota ni narei aginau go ni narei anigo: navaivaiana wanogoe ega wo pakilina matamai.

²⁴ Go Yehovah e mari dapala nogoe; go lago laapa sa eu rumai paki ekopu ni nasum̃a ki Faraoh, go ni nasum̃a ki tea suasua aneana maga: go navanua e pei tea marisakiana usuraki navanua mamau ni Ityipt nalakena lago maga.

²⁵ Go Faraoh e pioso raki Moses go Aaron, po naga, Kuga vano, kuga mari naviriana paki Sup̃e animu navanua.

²⁶ Go Moses e naga, E da p̃ia mau naga auga mari dapala nogoe; nalakena auga wo mari tea mamaragokiana ki naka ni Ityipt ega vei naviriana paki Yehovah Sup̃e aginami: p̃a leo, auga wo mari tea mamaragokiana ki naka ni Ityipt ega vei naviriana narae ni namatada, go euga wo nadi gami ki vatu, kite?

²⁷ Auga wo pano nasurataana ni naaleatia dolu paki masop̃alo, po mari naviriana paki Yehovah Sup̃e aginami, ega takiusi waina ega wo noa ki gami asa.

²⁸ Go Faraoh e naga, Kinau aga wo suasua ki mu naga kuga vano, naga kuga mari naviriana paki Yehovah Sup̃e animu masop̃alo; ma kuga ta paki uvea sa mau: koroga maginau pavara ni.

²⁹ Go Moses e naga, P̃a leo, kinau aga tave m̃elu dua ki‐go pano, go aga wo pavara ni Yehovah naga lago maga euga m̃elu dua ki Faraoh, ki tea suasua aneana maga, go ki narei aneana pano, matamai: ma Faraoh ega ta moro mari a ega vei nasorosoroana mau dapala ega ta suasua ki narei mau naga euga vano naga euga mari naviriana paki Yehovah.

³⁰ Go Moses e dave m̃elu dua ki Faraoh, po pavara ni Yehovah.

³¹ Go Yehovah e mari dapala navasaana ki Moses; go e mari lago maga eu m̃elu dua ki Faraoh, go ki tea suasua aneana maga, go ki narei aneana pano; tea sikai maau e da doko mau.

³² Go Faraoh e dum̃ana mari nap̃op̃ona e moro madaga sala wanogoe, go e da suasua ki narei naga euga vano mau.