EKSODAS 35 - Ngunese Bible

¹ Go Moses e soso saisai ki navata mamau ni Israel natuna maga, po noa ki da, e naga, Tea maga waia eu pei navasaana maga waina Yehovah e po pitip̃aki asa naga kuga mari a.

² Naaleatia latesa nawosiana ega vei tea mariana asa, ma naaleatia kelarua ega manimu pei tea tapu, sabbath ni namaromaroana warua ki Yehovah: tea maga waina eu mari nawosiana asa euga vei tea maripunueana.

³ Kuga ta sui nakapu natokoana animu maga naaleatia ni sabbath mau.

⁴ Go Moses e noa ki navata mamau ni Israel natuna maga,

⁵ e naga, Tea waia e pei naleo waina Yehovah e pitip̃aki asa, e naga, Kuga tum̃amu dape kiamu navituaana sikai agi Yehovah: tea maga waina nap̃op̃oda e suasua, euga tape a umai, navituaana ki Yehovah; kold go silver, go brass:

⁶ Go tea kesakesa, go tea miala‐kesakesa, go tea miala‐kalakala, go linen wia, go nam̃au ni naninani maga;

⁷ Go nawili maga ni shiip anoai maga tea pupugiana miala, go nawili maga ni siil maga, go nakau akasia;

⁸ Go tea ni nap̃o wia maga agi naroro ni navuvuraiana, go agi natap̃arakiana ni nasei lolo maga;

⁹ Go vatu maga ni natap̃alakisi, go vatu maga ni navakavuroana, agi efod, go agi tea taurum̃a.

¹⁰ Go tea vei p̃op̃o manumatua mamau puti m̃aleoputo kakamu euga umai, po mari tea mamau puti waina Yehovah e po pitip̃aki asa;

¹¹ Nasum̃atokoana, tap̃aup̃au kakana, go tea tap̃au‐kovagoro kakana, tagau matap̃ago‐rua kakana maga, go napapa kakana maga; tea walagoto kakana maga, tea lawodu kakana maga, go laketano kakana maga;

¹² Areka, go tea vavau kakana maga, tea tap̃augoro, go tea taugorop̃otae ni tea tausiliki;

¹³ Wede, go tea vavau kakana maga, go naloriki kakana mamau puti, go bred tokorae;

¹⁴ Go nakau ni nasulu agi namarama, go naloriki kakana maga, go nasulu kakana maga, go naroro agi namarama;

¹⁵ Go wede ni natap̃arakiana ni tea ni nap̃o wia, go tea vavau kakana maga, go naroro ni navuvuraiana, go tea ni nap̃o wia ni nasei lolo maga, go tea tausiliki agi namata, waina e dau namata ni nasum̃atokoana;

¹⁶ Wede ni naviriana tap̃arakiana, go koro ni brass kakana, tea vavau kakana maga, go naloriki kakana mamau puti, tea vavano go laketano kakana;

¹⁷ Tea taugoro maga ni roara, tea lawodu kakana maga, go laketano kakada maga, go tea tausiliki agi namata‐pua ni roara;

¹⁸ Pin maga ni nasum̃atokoana, go pin maga ni roara, go namea kakada maga;

¹⁹ Sugoro vausi‐m̃atakiana maga agi nasuasuaana ekopu ni tokora tapu, sugoro tapu maga agi Aaron tea viri, go sugoro maga ki natuna maga, naga euga suasua nawosiana ki tea viri.

²⁰ Go navata mamau ni Israel natuna maga eu m̃elu dua ki narae ni Moses pano.

²¹ Go eu rumai, sara naatam̃oli waina nap̃op̃oda e sike ra asa, go sara naatam̃oli waina naatada e sai ki da asa, eu dape navituaana ki Yehovah umai, agi nawosiana ni tap̃aup̃au ni nasaisaiana, go agi sara nasuasuaana kakana, go agi sugoro tapu maga.

²² Go eu rumai, naanoai maga go nagoroi maga, tea maga waina nap̃op̃oda e suasua asa, eu dape umai pin taku‐welea maga, go vakadaliga maga, go rig‐vulusoki maga, go lela maga, eu mamau puti pei naleo maga ni kold; sara naatam̃oli waina eu pitua ki navituaana ni kold sikai paki Yehovah.

²³ Go sara naatam̃oli, waina tea kesakesa, go tea miala‐kesakesa, go tea miala‐kalakala, go linen wia, go nam̃au ni naninani maga, go nawili maga ni shiip anoai maga tea pupugiana miala, go nawili maga ni siil maga, eu pei tea vap̃aiana sikoti ra, eu dape a umai.

²⁴ Tea maga waina eu pitua ki navituaana sikai ni silver go ni brass eu dape navituaana ki Yehovah umai; go sara naatam̃oli, waina nakau akasia e pei tea vap̃aiana sikoti ra agi te nawosiana seara ni nasuasuaana, eu dape a umai.

²⁵ Go nagoroi mamau puti waina eu pei tea vei p̃op̃o manumatua eu loasi ki nam̃elearuda, po dape tea waina eu loasi a umai, tea kesakesa, go tea miala‐kesakesa, tea miala‐kalakala, go linen wia.

²⁶ Go nagoroi mamau puti waina nap̃op̃oda e sike ra namanumatuaana, eu loasi nam̃au ni naninani maga.

²⁷ Go tea maraki maga eu dape umai vatu maga ni natap̃alakisi, go vatu maga ni navakavuroana, agi efod, go agi tea taurum̃a;

²⁸ Go tea ni nap̃o wia, go naroro; agi namarama, go agi naroro ni navuvuraiana, go agi natap̃arakiana ni nasei lolo maga.

²⁹ Sara naanoai go sara nagoroi, waina nap̃op̃oda e sai ki da naga euga tape umai agi nawosiana mamau, waina Yehovah e pitip̃aki asa naga ega vei tea mariana pae nam̃elearu ni Moses, Israel natuna maga eu dape umai navituaana suasuakiana sikai agi Yehovah.

³⁰ Go Moses e noa ki Israel natuna maga, e naga, Kuga vunusi, Yehovah e soso pae nagisana Besalel natu ni Uri, natu ni Hur, ni naworawora ni Yudah;

³¹ Go e pakavuro e ki Naata ni Sup̃e doko namanumatuaana, doko namidoakiataeana, go doko naataeana, go doko sara nawosiana visarasara maga;

³² Go naga ega midoa ki nawosiana maga ni navei‐mataisau‐ana, naga ega wosiwosi kold,

³³ go silver, go brass, Go natae‐midiri‐vatu‐ana agi navakavuroana, go natae‐midiri‐nakau‐ana, naga ega wosiwosi sara nawosiana visarasara ni navei‐mataisau‐ana.

³⁴ Go e doropusi doko nap̃op̃ona naga ega vasapiseiki, nae, go Oholiab natu ni Ahisamak, ni naworawora ni Dan.

³⁵ E pakavuro ra ki p̃op̃o‐manumatua, naga eroga wosiwosi sara nawosiana visarasara maga, ki tea tae‐midiria, go ki tea vau‐midiria mataisau, go ki tea turi‐midiria, tea kesakesa, go tea miala‐kesakesa, tea miala‐kalakala, go linen wia, go ki tea vausi, ki tea maga waina eu mari te nawosiana seara, go ki tea maga waina eu midoa ki nawosiana ni navei‐mataisau‐ana maga.