EKSODAS 31 - Ngunese Bible

¹ Go Yehovah e pasa paki Moses, po naga,

² P̃a vunusi, a soso pae nagisana Besalel natu ni Uri, natu ni Hur, ni naworawora ni Yudah.

³ Go a pakavuro e ki Naata ni Sup̃e, doko namanumatuaana, go doko namidoakiataeana, go doko naataeana, go doko sara nawosiana visarasara maga,

⁴ Naga ega midoaki nawosiana maga ni naveimataisauana, naga ega wosiwosi kold, go silver, go brass,

⁵ Go natae‐midiri‐vatu‐ana agi navakavuroana, go natae‐midirinakau‐ana naga ega wosiwosi sara nawosiana visarasara maga.

⁶ Go kinau, p̃a leo, a pitua ki sikoti a Oholiab, natu ni Ahisamah, ni naworawora ni Dan; go a doropusi namanumatuaana doko nap̃op̃o ni tea maga waina eu pei tea vei p̃op̃o manumatua, naga euga mari tea mamau puti waina a dip̃aki‐go asa:

⁷ Tap̃aup̃au ni nasaisaiana, go areka ni nanoasokisokiana, go tea tap̃augoro waina e doko elagi asa, go naleo mamau puti ni Tap̃aup̃au;

⁸ Go wede ni naloriki kakana maga, go nakau ni nasulu tautau go naloriki kakana mamau puti, go wede ni natap̃arakiana ni tea ni nap̃o wia;

⁹ Go wede ni naviriana tap̃arakiana go naloriki kakana mamau puti, go tea vavano go laketano kakana;

¹⁰ Go sugoro vausim̃atakiana maga, go sugoro tapu maga agi Aaron tea viri, go sugoro maga ki natuna maga, naga euga suasua nawosiana ki tea viri;

¹¹ Go naroro ni navuvuraiana, go tea ni nap̃o wia ni nasei lolo maga agi tokora tapu: euga mari ega tapala tea mamau puti waina a dip̃aki‐go asa.

¹² Go Yehovah e pasa paki Moses, po naga,

¹³ Go nigo p̃a vasa paki Israel natuna maga, po naga, Lomau kuga vavaigoro sabbath aginau maga: nalakena nae e pei navaivaiana sikai namawota kakagu go kakamu usuraki tagona animu maga; naga kuga atae naga kinau a pei Yehovah waina a do dapugoro mu.

¹⁴ Go kuga vavaigoro sabbath; nalakena nae e pei tea tapu animu: naata waina e mari a e pei tea m̃oli ega vei tea maripunueana lomau: nalakena tea maga waina eu mari nawosiana asa, naata maga wanogoe euga vei tea taeluaana m̃elu dua ki m̃aleoputo ni narei adeada.

¹⁵ Naaleatia latesa nawosiana ega vei tea mariana asa; ma naaleatia kelarua e pei sabbath ni namaromaroana warua, tea tapu ki Yehovah: tea maga waina eu mari nawosiana naaleatia ni sabbath, euga vei tea maripunueana lomau.

¹⁶ Go Israel natuna maga euga vavaigoro sabbath, naga euga mari sabbath usuraki tagona adeada maga, ega vei navasasokiana waina ega tu du po du mau du.

¹⁷ Nae e pei navaivaiana sikai namawota kakagu go ni Israel natuna maga pa pa ega tu du po du mau du: nalakena naaleatia latesa Yehovah e mari nakoroatelagi go maramana, go naaleatia kelarua e doko dorogo asa po maromaro.

¹⁸ Go e dua Moses, ragi waina e pasa pusum̃aki sua paki nia tava Sinai, tea welewelea dua wanogoe ni nanoasokisokiana, tea welewelea dua ni vatu, tea midiriana ki nakini ni Sup̃e.