EKSODAS 27 - Ngunese Bible

¹ Go p̃a mari wede ni naviriana ni nakau akasia, kubit ega lima navarauana, go kubit ega lima naweleweleana; wede ni naviriana ega vei p̃alavati: go navakilagiana kakana ega vei kubit dolu.

² Go p̃a mari napati kakana maga euga toko naweluki kakana pati: napati kakana maga euga vei tea sikai maau ma nae: go p̃a kalutigoro e ki brass.

³ Go p̃a mari pot kakana maga waina euga tape natano‐apu kakana, go savel kakana maga, go besin kakana maga, go tagau ni nap̃okasi kakana maga, go pan ni nakapu vavaga kakana maga: p̃a mari naloriki kakana mamau puti euga vei tea ni brass.

⁴ Go p̃a maneana mari koro sikai nawosiana ni kup̃ena ni brass; go p̃a mari rig pati ni brass euga toko kup̃ena euga toko naweluki pati kakana.

⁵ Go p̃a toropusi a etano ni malo matemate dalivirigoro wede ni naviriana etano, go kup̃ena ega vakilagi liliu namalo ni wede ni naviriana.

⁶ Go p̃a magi wede ni naviriana mari tea vavau dua, tea vavau dua ni nakau akasia, go p̃a kalutigoro ra ki brass.

⁷ Go tea vavau kakana dua eroga vei tea saikiana paki rig maga, go tea vavau dua eroga toko navidi dua ni wede ni naviriana ragi waina euga to pausi a.

⁸ P̃a mari a ega p̃aga ki napapa maga: dapala waina e pei tea viseikiana paki‐go tava, euga mari a ega tapala nogoe.

⁹ Go p̃a mari roara ni nasum̃atokoana: agi taleva ni sauth paki sauth tea taugoro maga agi roara ni linen vilokiana wia kubit p̃onotia sikai ni navarauana agi taleva sikai:

¹⁰ Go tea lawodu kakana maga euga vei rualima dua, go laketano kakada maga euga vei rualima dua, euga vei tea ni brass; tagau maga ni tea lawodu maga go tea tasokataki kakada maga euga vei tea ni silver.

¹¹ Go dapala nogoe agi taleva ni north doko navarauana tea taugoro maga euga vei kubit p̃onotia sikai ni navarauana, go tea lawodu kakana maga euga vei rualima dua, go laketano kakada maga euga vei rualima dua, euga vei tea ni brass; tagau maga ni tea lawodu maga go tea tasokataki kakada maga euga vei tea ni silver.

¹² Go agi naweleweleana ni roara ni taleva ni west tea taugoro maga euga vei kubit rualima lima: tea lawodu kakada maga euga vei rualima sikai, go laketano kakada maga euga vei rualima sikai.

¹³ Go naweleweleana ni roara ni taleva ni ist paki ist ega vei kubit rualima lima.

¹⁴ Tea taugoro maga agi taleva sikai ni namata‐pua euga vei kubit rualima sikai tamate lima: tea lawodu kakada maga euga tolu, go laketano kakada maga euga tolu.

¹⁵ Go agi taleva kerua tea taugoro maga euga vei kubit rualima sikai tamate lima: tea lawodu kakada maga euga tolu, go laketano kakada maga euga tolu.

¹⁶ Go agi namata‐pua ni roara tea tausiliki sikai ni kubit rualima dua, ni tea kesakesa, go tea miala‐kesakesa, go tea miala‐kalakala, go linen vilokiana wia, nawosiana ki tea turi midiria: tea lawodu kakada maga euga vati, go laketano kakada maga euga vati.

¹⁷ Tea lawodu mamau puti ni roara daliviri euga vei tea tasokatakiana ki silver; tagau kakada maga euga vei tea ni silver, go laketano kakada maga euga vei tea ni brass.

¹⁸ Navarauana ni roara ega vei kubit p̃onotia sikai, go naweleweleana ega vei rualima lima sara tokora, go navakilagiana ega vei kubit lima, ni linen vilokiana wia, go laketano kakada maga euga vei tea ni brass.

¹⁹ Naloriki mamau puti ni nasum̃atokoana doko sara nasuasuaana kakana, go pin kakana mamau puti, go pin mamau puti ni roara euga vei tea ni brass.

²⁰ Go nigo p̃a tip̃aki Israel natuna maga naga euga tape umai paki‐go naroro tautau ni oliva tukiana, agi namarama, naga ega mari nasulu sikai ega soro sara ragi.

²¹ Ekopu ni tap̃aup̃au ni nasaisaiana, etaku ni tea taugorop̃otae waina e dau narae ni nanoasokisokiana, Aaron go natuna maga euga mari m̃ata ki nia pae ragi melu pa pa paki malip̃ogi narae ni Yehovah: ega vei natawonakiana sikai waina ega tu du po du mau du usuraki tagona adeada maga waina Israel natuna maga euga to mari a.