EKSODAS 17 - Ngunese Bible

¹ Go navata mamau ni Israel natuna maga eu surata m̃elu dua ki masop̃alo ni Sin pano, pae nasurataana adeada maga, dakiusi waina Yehovah e dip̃aki da asa, po m̃enaki Refidim: go noai waina narei euga munugi a e dika.

² Go narei eu pululu ki Moses, po naga, Kuga tua gami noai naga auga munu. Go Moses e noa ki da, e naga, Ekasana ku pululu ki nau? Ekasana ku maridogo Yehovah?

³ Go narei eu madou ki noai tokora wanogoe; go narei eu daururu dip̃a Moses, po naga, Ekasana ku po piragi lua gami m̃elu dua ki Ityipt sake umai, naga p̃a mari punue gami ma natugami maga go katel aginami maga ki namadouana?

⁴ Go Moses e pioso paki Yehovah, po naga, Aga mari nasava paki narei waia? Eu m̃aladigi naga euga nadi au ki vatu.

⁵ Go Yehovah e noa ki Moses, e naga, P̃a valoti pea ki narei pano, go p̃a vila lua seara ni tea matua maga ni Israel euga sikoti ko pano; go tiko anigo, waina ku p̃okati noaisara asa, p̃a vuati a ega toko nam̃elearum̃a, go p̃a vano.

⁶ P̃a leo, aga wo lawodu naraem̃a tokora wanana vatu laketoko waina e doko Horeb; go p̃a wokati vatu laketoko wanogoe, go noai ega wo dave m̃elu dua ki nia umai, naga narei euga munu. Go Moses e mari dapala nogoe namata ni tea matua maga ni Israel.

⁷ Go e soso nagisa ni tokora wanogoe ki Massah, go ki Meribah, nalakena navululuana ki Israel natuna maga, go nalakena eu maridogo Yehovah, doko do naga, Yehovah e doko m̃aleoputo kakagida, kite e dika?

⁸ Go Amalek e umai, po mari navakalo paki Israel Refidim.

⁹ Go Moses e noa ki Yoshua, e naga, P̃a manigida matadoa naatam̃oli maga, go p̃a vano, p̃a mari navakalo paki Amalek: matamai kinau aga wo lawodu nap̃au ni tava go tiko ki Sup̃e ega wo doko nam̃elearugu.

¹⁰ Go Yoshua e mari dapala waina Moses e noa ki nia asa, po mari navakalo paki Amalek: go Moses, Aaron, go Hur eu sake paki nap̃au ni tava.

¹¹ Go e pakilina, ragi waina Moses e sike nam̃elearuna, naga Israel e marimatua: go ragi waina e doro nam̃elearuna pakitano, Amalek e marimatua.

¹² Ma nam̃elearu ni Moses ero madaga; go ero dape vatu sikai, po doropusi a etano ni nam̃agona, go e dasake asa; go Aaron go Hur ero silae nam̃elearuna dua, sikai e du taleva sikai, go kerua e du taleva kerua; go nam̃elearuna ero lelete pa pa elo e musu.

¹³ Go Yoshua e dap̃olosiwo ki Amalek go narei aneana ki nawoka ni lova.

¹⁴ Go Yehovah e noa ki Moses, e naga, P̃a midiri tea waia tusi sikai ega vei namidoakilagatiana sikai, go p̃a noa e nadaliga ni Yoshua: naga aga wo kasi lua namidoaki‐Amalekana m̃elu dua ki etano ni nakoroatelagi.

¹⁵ Go Moses e davagi wede ni naviriana sikai, po soso nagisana ki Yehovah‐nissi:

¹⁶ Go e naga, Nalakena nam̃elearuna sikai e doko malo tasake ki Yah, Yehovah ega wo peani navakalo paki Amalek pae tagona paki tagona.