EKSODAS 15 - Ngunese Bible

¹ Ragi wanogoe Moses go Israel natuna maga eu lega ki Yehovah nalegaana waia, po pasa, eu naga, Aga wo lega ki Yehovah, nalakena e pakilagi p̃arua liu: Horse go naatam̃oli kakana e po nadi ki da paki natasi.

² Yah e pei nakasuaana go nalegaana aginau, Go e po maginau pei namautiana: Nae e pei Sup̃e aginau, go aga wo samasama ni a; Sup̃e ki tamagu, go aga wo pasa pakilagi ki nia.

³ Yehovah e pei naatam̃oli sikai ni navakalo: Nagisana e pei Yehovah.

⁴ Kariot maga ki Faraoh go taua ni naatam̃oli navakalo aneana maga e po nadi ki da paki natasi: Go m̃aau matadoaana aneana maga eu po diro Natasi ni Nam̃om̃o.

⁵ Epua maga eu dap̃augoro ra: Eu siwo paki epua maga dakiusi vatu.

⁶ Nam̃elearum̃a ni matua, Yehovah O, e pei tea rogoana ki nakasuaana, Nam̃elearum̃a ni matua, Yehovah O, e duki p̃oraworae tea kokona maga.

⁷ Go ki nawaruaana ni navakilagiana anigo ku mari matua ki tea maga waina eu duleana dip̃a ko: Ku dip̃aki lua namaetoana anigo, e gani ra dakiusi stro.

⁸ Go noai maga eu pei tea tauakiana ki namero ni nagisum̃a, Noaisara maga eu lawodu dakiusi taua; Epua maga eu gagataki nap̃alau ni natasi.

⁹ Tea kokona e naga, Aga wo sava dausi, aga wo pa parati ki, aga wo dap̃otae tea tape‐pavakotoana: Naatagu ega wo puka ara; Aga wo sai ki lova aginau, nam̃elearugu ega wo mari sa ki da.

¹⁰ Ku sui ki nalagi anigo, natasi e dap̃augoro ra: Eu pei tea maluluakiana siwo dakiusi led noai kasua maga.

¹¹ Sei e dakiusi ko, Yehovah O, m̃aleoputo ni sup̃e maga? Sei e dakiusi ko, tea rogoana ki natapuana, Tea mataukiana ki nasamasamaniana, tea mari tea ni namagaana maga?

¹² Ku sai ki nam̃elearum̃a ni matua, Maramana e dinomi ra.

¹³ Narei waina ku po daulua ra ku po maraki ra ki nadodomiana anigo: Ku po pitana ki da ki nakasuaana anigo paki natokoana tapu anigo.

¹⁴ Nalauna maga eu po dogo, eu duruuru: Navitinuana e po puati tea maga waina eu doko Filistia.

¹⁵ Ragi wanogoe tea maraki maga ni Edom eu saram̃akoto; Tea marimatua maga ni Moab, naruruuruana e do puati ra: Tea mamau puti waina eu doko Kanaan eu po sara.

¹⁶ Namatakuana go nam̃anaunauana ero do dowo ara; Eu matadorogo doko dakiusi vatu ki nawaruaana ni narum̃a; Pa pa narei anigo euga wo surata duaduru, Yehovah O. Pa pa narei waina ku pakotovi ra euga wo surata duaduru.

¹⁷ P̃a wo piragi ra umai, po lawo ki da tava ni naveaniana anigo, Tokora waina ku po manigo mari a naga p̃a toko asa doko, Yehovah O, Nasum̃a tapu, Nawota O, waina nam̃elearum̃a ero po lawo‐kilaketoko asa.

¹⁸ Yehovah ega wo maramara pa pa ega wo du du po du mau du.

¹⁹ Nalakena horse maga ki Faraoh go kariot aneana maga go naatam̃oli ni horse aneana maga eu siwo paki natasi, go Yehovah e piragi noai maga ni natasi eu moro liliu paki da; ma Israel natuna maga eu surata natano garagara m̃aleoputo ni natasi.

²⁰ Go Miriam profeta nagoroi, Aaron gorena, e dape timbrel sikai e doko nam̃elearuna; go nagoroi mamau puti eu dausi a pano eu puati timbrel maga po sale ki nasaleana maga.

²¹ Go Miriam e pasadara ra, e naga, Kuga lega ki Yehovah, nalakena e pakilagi p̃arua liu; Horse go naatam̃oli kakana e po nadi ki da paki natasi.

²² Go Moses e piragi lua Israel m̃elu dua ki Natasi ni Nam̃om̃o pano, go eu paki masop̃alo ni Shur pano; go eu surata masop̃alo naaleatia dolu, go eu da pap̃ai te noai mau.

²³ Go eu rumai paki Marah, go eu mari sa munu noai ni Marah, nalakena nara eu kokona: nalakena tea wanogoe nagisana e pei tea sosoana ki Marah.

²⁴ Go narei eu daururu dip̃a Moses, po naga, Tuga wo munu nasava?

²⁵ Go e pioso paki Yehovah; go Yehovah e pisei ki nia nakau sikai, go e nadi ki nia paki noai maga, go noai maga eu po mami. Tokora wanogoe e madeada mari natawonakiana sikai go navasap̃otaeana sikai asa, go tokora wanogoe e maridogo ra asa;

²⁶ Go e naga, Ku pe wo dogo parati ki nadaleo ni Yehovah Sup̃e anigo, po mari tea waina e leana namatana, po dakidorogo natip̃akiana aneana maga, po pavaigoro natawonakiana mamau puti aneana, nasasanaana maga waina a doropusi ra naka ni Ityipt, a pe wo da doropusi ra ako mau: nalakena kinau a pei Yehovah waina a maripauri ko.

²⁷ Go eu rumai paki Elim, waina namata noai rualima sikai tamate dua, go paama rualima larua eu doko asa: go eu m̃enaki tokora wanogoe doko pisari noai maga.