DANIEL 3 - Ngunese Bible

¹ Nebukadnessar nawota e mari nasup̃e sikai ni kold, navakilagiana kakana e pei kubit rualima latesa, naweleweleana kakana e pei kubit latesa: e sike lawo ki nia malo matemate ni Dura, navanua ni Babelon.

² Go Nebukadnessar nawota e dip̃aki lua naga euga viragi saisai ki satrap maga, tea maramara oli maga, go tea maraki namagovai maga, tea vasap̃otae warua maga, tea leoparati ki naleo wia tauakiana maga, tea vusum̃aki maga, tea ni nawotaeana maga, go tea maramara mamau puti ni navanua maga, naga euga umai paki naveakotokotomauana ni nasup̃e waina Nebukadnessar nawota e sike lawo ki nia.

³ Ragi wanogoe satrap maga, tea maramara oli maga, go tea maraki namagovai maga, tea vasap̃otae warua maga, tea leoparati ki naleo wia tauakiana maga, tea vusum̃aki maga, tea ni nawotaeana maga, go tea maramara mamau puti ni navanua maga, eu pei tea viragisaisaikiana paki naveakotokotomauana ni nasup̃e waina Nebukadnessar nawota e sike lawo ki nia; go eu lawodu narae ni nasup̃e waina Nebukadnessar e sike lawo ki nia.

⁴ Go tea rogorogo sikai e pioso kasua, Eu dip̃aki mu, narei maga, nalauna maga, namena maga,

⁵ naga ragi waina kuga wo dogo nadaleo ni paiga, lokore, harp, sabeka, salteri, sumfonia, go sara naleo visarasara ni nalegaana, kuga rowo pakitano po lotu ki nasup̃e ni kold waina Nebukadnessar nawota e po sike lawo ki nia:

⁶ go naata waina ega wo da dowo pakitano po lotu mau, ega wo pei tea nadikiana ragi sa m̃oli wanogoe paki m̃aleoputo ni upu sikai ni nakapu vavaga.

⁷ Nalakena tea wanogoe ragi wanogoe ragi waina narei mamau puti eu dogo nadaleo ni paiga, lokore, harp, sabeka, salteri, go sara naleo visarasara ni nalegaana, narei maga, nalauna maga, go namena maga, eu mamau puti dowo pakitano po lotu ki nasup̃e ni kold waina Nebukadnessar nawota e sike lawo ki nia.

⁸ Nalakena tea wanogoe ragi wanogoe naatam̃oli seara ni Kaldea eu rumai paki m̃aladigi po dapusukao ki naworawora ni Yudah.

⁹ Eu pasadara po noa ki Nebukadnessar nawota, Nawota O, p̃a mauri doko mau doko.

¹⁰ Nigo, nawota O, ku po pitua ki navasakisogiana sikai, naga sara naatam̃oli waina euga wo dogo nadaleo ni paiga, lokore, harp, sabeka, salteri, go sumfonia, go sara naleo visarasara ni nalegaana, euga rowo pakitano po lotu ki nasup̃e ni kold:

¹¹ go naata waina ega wo da dowo pakitano po lotu mau, ega wo pei tea nadikiana paki m̃aleoputo ni upu sikai ni nakapu vavaga.

¹² Naatam̃oli seara eu doko naworawora ni Yudah waina ku dawona ki da eu dap̃au nawosiana maga ni navanua ni Babelon, Shadrak, Meshak, go Abed‐neco: naatam̃oli maga wanogoe, nawota O, eu da dodo parati ki‐go mau: eu da magi sup̃e anigo maga suasua mau, go nasup̃e ni kold waina ku sike lawo ki nia eu da lotu ki nia mau.

¹³ Ragi wanogoe Nebukadnessar e maeto po maritausu, go e pitip̃aki naga euga viragi Shadrak, Meshak, go Abed‐neco umai. Ragi wanogoe naatam̃oli maga wanogoe eu pei tea viragiana umai paki narae ni nawota.

¹⁴ Nebukadnessar e pasadara po noa ki da, E pei namidodoana animu Shadrak, Meshak, go Abed‐neco O, naga ku da magi sup̃e aginau suasua mau, go naga ku da lotu ki nasup̃e ni kold waina a po sike lawo ki nia mau kite?

¹⁵ Ragi waia ku pe mari m̃ata sua naga ragi waina kuga wo dogo nadaleo ni paiga, lokore, harp, sabeka, salteri, go sumfonia, go sara naleo visarasara ni nalegaana, kuga wo dowo pakitano po lotu ki nasup̃e waina a po mari a, e pe wia: ma ku pe ta lotu mau ku pe wo pei tea nadikiana ragi sa m̃oli wanogoe paki m̃aleoputo ni upu sikai ni nakapu vavaga; go seve sup̃e e doko waina ega wo pualua mu m̃elu dua ki nam̃elearugu maga?

¹⁶ Shadrak, Meshak, go Abed‐neco, eu pasadara po noa ki nawota, Nebukadnessar O, e da one gami one naga auga vasadara ko nalo ni naleo waia mau.

¹⁷ E pe vei namasauana aneana Sup̃e aginami waina au maneana suasua e pe mariatae pualua gami m̃elu dua ki upu ni nakapu vavaga; go ega wo pualua gami m̃elu dua ki nam̃elearum̃a nawota O.

¹⁸ Ma e pe ta pualua gami mau, ega vei tea ataeana paki‐go, nawota O, naga auga wo da magi sup̃e anigo maga suasua mau, go naga auga wo da lotu ki nasup̃e ni kold waina ku po sike lawo ki nia mau.

¹⁹ Ragi wanogoe Nebukadnessar e pura ki namaritausuana, go navunusiana ni naraena e panop̃ota paki Shadrak, Meshak, go Abed‐neco: e pasa, po pitip̃aki naga euga tokoni p̃arua ki upu ega vaka larua liu tea waina e pei tea vunusiana sala vea.

²⁰ Go e dip̃aki naatam̃oli seara, naatam̃oli marimatua ni nakasuaana, waina eu doko taua ni naatam̃oli navakalo aneana maga, naga euga soli Shadrak, Meshak, go Abed‐neco, po nadi ki da paki upu ni nakapu vavaga.

²¹ Ragi wanogoe eu soli naatam̃oli maga wanogoe doko trausers adeada maga, sugoro adeada maga, go sugoro kovagoro adeada maga, go sugoro p̃ota adeada maga, go eu nadi ki da paki m̃aleoputo ni upu ni nakapu vavaga.

²² Nalakena tea wanogoe nalakena natip̃akiana ki nawota e makali, go upu e pei tea tokoniana warua liu naatam̃oli maga wanogoe waina eu dape Shadrak, Meshak, go Abed‐neco sake, mena ni nakapu e maripunue ra.

²³ Go naatam̃oli dolu wanogoe, Shadrak, Meshak, go Abed‐neco, eu dowo paki m̃aleoputo ni upu ni nakapu vavaga eu pei tea soliana.

²⁴ Ragi wanogoe Nebukadnessar nawota e saram̃akoto, po duleana m̃araverave: e pasa po noa ki tea vusum̃aki aneana maga, Tu da nadi ki naatam̃oli dolu waina eu pei tea soliana paki m̃aleoputo ni nakapu kite? Eu pasadara po noa ki nawota, Lomau, nawota O.

²⁵ E pasadara po noa, Kuga leo, kinau a punusi naatam̃oli pati, tea veresiana, eu surata m̃aleoputo ni nakapu, go te navatuna kakada e da pei tea marisakiana mau; go navunusiana ni kevati e dakiusi sup̃e maga natuda sikai.

²⁶ Ragi wanogoe Nebukadnessar e umai paki m̃aladigi ki namata ni upu ni nakapu vavaga: e pasa po noa, Shadrak, Meshak, go Abed‐neco, tea suasua maga ki Sup̃e Vakilagi Mau, kuga tave, go kuga umai. Ragi wanogoe Shadrak, Meshak, go Abed‐neco eu dave m̃elu dua ki m̃aleoputo ni nakapu.

²⁷ Go satrap maga, tea maramara oli maga, tea maraki namagovai maga, go tea vusum̃aki maga ki nawota, waina eu pei tea viragisaisaikiana, eu punusi naatam̃oli maga wanogoe, naga nakapu e da peani nakasuaana dap̃au nap̃atokoda mau, go nalolu ni nap̃auda e da aso mau, go trausers adeada maga eu da panop̃ota mau, go nap̃o ni nakapu e da pano doko ara mau.

²⁸ Nebukadnessar e pasa po noa, Sup̃e ki Shadrak, Meshak, go Abed‐neco, ega vei tea vasam̃atakiana, waina e po dip̃aki lua agelo aneana umai, po pualua tea suasua aneana maga waina eu pavatu asa, po mari navasaana ki nawota e panop̃ota, po pitua ki nap̃atokoda naga euga ta magi te sup̃e suasua mau, go naga euga ta lotu ki te sup̃e mau, ma naga euga magi Sup̃e adeada sikina suasua po lotu ki nia.

²⁹ Go kinau a pitua navasakisogiana sikai, naga sara narei, sara nalauna, go sara namena, waina euga wo noa te navatuna sa dip̃a Sup̃e ki Shadrak, Meshak, go Abed‐neco, euga wo pei tea marikotokotoviana, go nasum̃a adeada maga euga vei tea mariana euga vei tap̃ata sikai: nalakena sup̃e p̃ota sikai e da doko waina e mariatae pualua dapala waia mau.

³⁰ Ragi wanogoe nawota e mari Shadrak, Meshak, go Abed‐neco eu disu p̃ia navanua ni Babelon.