DANIEL 2 - Ngunese Bible

¹ Go natau kerua ni namaramaraana ki Nebukadnessar, Nebukadnessar e p̃erea ki nap̃erea maga; go naatana e pari, go namaturuana aneana e puoli ki nia.

² Go nawota e pitip̃aki naga euga soso tea midiri tapu maga, go tea kikita maga, go tea wosidoa maga, tea ni Kaldea maga, naga euga noakisai nawota nap̃erea aneana maga. Go eu rumai paki ekopu po lawodu narae ni nawota.

³ Go nawota e noa ki da, A po p̃erea ki nap̃erea sikai, go naatagu e pari naga aga atae nap̃erea wanogoe.

⁴ Go tea ni Kaldea maga eu pasa ki nawota pae Arami, Nawota O, p̃a mauri doko mau doko: p̃a noa nap̃erea anigo paki tea suasua anigo maga, go auga wo noasai nanoap̃otaeana.

⁵ Nawota e pasadara po noa ki tea ni Kaldea maga, Navasaana e po m̃elu au pano: ku pe ta mari au aga atae nap̃erea go nanoap̃otaeana kakana mau, ku pe wo pei tea marikotokotoviana, go nasum̃a animu maga euga wo pei tea mariana euga vei tap̃ata sikai.

⁶ Ma ku pe noasai nap̃erea go nanoap̃otaeana kakana, ku pe wo dape kiagu navituaana maga go namoriana go nadodomadaganiana warua: nalakena tea wanogoe kuga noakisai au nap̃erea go nanoap̃otaeana kakana.

⁷ Eu pasadara sala kerua po noa, Nawota ega noa ki tea suasua aneana maga nap̃erea, go auga wo noasai nanoap̃otaeana.

⁸ Nawota e pasadara po noa, Kinau a atae lomau ki nia naga nimu ku naga kuga talua ragi, nalakena ku punusi naga navasaana e po m̃elu au pano:

⁹ naga ku pe ta mari au aga atae nap̃erea mau, navasakisogiana sikai maau e pe manimu doko: nalakena ku po dum̃amu manimu midoa ki navasaana sorosoro go madada waina kuga noa e naraegu pa pa ragi ega vanop̃ota: nalakena tea wanogoe kuga noa ki nau nap̃erea, go aga wo atae naga kuga wo noakisai au nanoap̃otaeana kakana.

¹⁰ Tea ni Kaldea maga eu pasadara narae ni nawota, po noa, Naatam̃oli sikai e da doko navanua mau waina e mariatae noasai naleo ki nawota: nalakena te nawota warua go kasua sikai e da pusuusu ki naleo dapala nogoe paki tea midiri tapu sikai, kite paki tea kikita sikai, kite paki tea ni Kaldea sikai mau.

¹¹ Go naleo waina nawota e pusuusu ki nia e madaga, go tea p̃ota sikai e da doko mau waina ega wo noasai a narae ni nawota, ma sup̃e maga eu sikida, waina natokoana adeada e da sikoti nap̃okasi mau.

¹² Nalakena tea wanogoe nawota e maeto po maritausu p̃arua, go e pitip̃aki naga euga mari puoli ki tea manumatua mamau puti ni Babelon.

¹³ Go navasakisogiana e pano, go tea manumatua maga eu do pei tea maripunueana; go eu laaga Daniel go tana ri maga naga euga vei tea maripunueana.

¹⁴ Ragi wanogoe Daniel e pasadara liliu ki navusum̃akiana go ki namidoakip̃otaeana paki Ariok, nap̃au ni tea viviatu maga ki nawota, waina e pano naga ega maripunue tea manumatua maga ni Babelon: e pasadara po noa ki Ariok, tea maraki ki nawota,

¹⁵ Ekasana navasakisogiana e kasua m̃araverave m̃elu narae ni nawota? Ragi wanogoe Ariok e mari naleo wanogoe e pei tea ataeana paki Daniel.

¹⁶ Go Daniel e paki ekopu po pavara ni nawota naga ega tua e ragi go naga ega noakisai nawota navasap̃otaeana.

¹⁷ Ragi wanogoe Daniel e paki nasuma aneana, po mari naleo wanogoe e pei tea ataeana paki Hananiah, Mishael, go Asariah, tana ri maga:

¹⁸ naga euga tatago namaritadodomiana maga euga m̃elu narae ni Sup̃e ni nakoroatelagi nalo ni p̃aia wanogoe; naga Daniel go tana ri maga euga ta pei tea maripuolikiana sikoti tea manumatua p̃ota maga ni Babelon mau.

¹⁹ Ragi wanogoe p̃aia wanogoe e pei tea maripakasakiana paki Daniel pae navunusiana sikai ni p̃ogi. Ragi wanogoe Daniel e pasa m̃ata ki Sup̃e ni nakoroatelagi.

²⁰ Daniel e pasadara po noa, Nagisa ni Sup̃e ega vei tea vasam̃atakiana pa pa ega tu du po du mau du: nalakena namanumatuaana go namarimatuaana ero pei aneana:

²¹ go nae e do doa ragi maga go sala maga eu panop̃ota; e do dape lua nawota maga po do pusake nawota maga, e do pitua ki namanumatuaana paki tea manumatua maga, go ki naataeana paki tea maga waina eu atae namidoakiataeana:

²² nae e do maripakasa ki tea vakipua maga go ki tea tasurukiana maga: e atae tea waina e doko namaligo, go namarama e doko sikoti a doko.

²³ Kinau a pasadodom̃ata ki‐go, po samasamani ko, Sup̃e ki tamagu maga O, waina ku dua au namanumatuaana go namarimatuaana, go ragi waia ku po mari au a atae tea waina au datagovi ko asa: nalakena ku po mari gami au atae naleo ki nawota.

²⁴ Nalakena tea wanogoe Daniel e paki ekopu punusi Ariok, waina nawota e dawona ki nia naga ega mari puoli ki tea manumatua maga ni Babelon: e pano po noa dapala waia paki nia, Tea manumatua maga ni Babelon, p̃a ta mari puoli ki da mau: p̃a viragi au paki ekopu punusi nawota, go aga wo noakisai nawota nanoap̃otaeana.

²⁵ Ragi wanogoe Ariok e piragi Daniel paki ekopu punusi nawota m̃araverave, po noa dapala waia, A po pap̃ai naatam̃oli sikai ni tea viragiluapavakotoana maga ni Yudah, waina ega wo mari nanoap̃otaeana ega vei tea ataeana paki nawota.

²⁶ Nawota e pasadara po noa ki Daniel, waina nagisana e pei Belteshassar, Nigo ku mariatae mari au aga atae nap̃erea waina a punusi a, go nanoap̃otaeana kakana kite?

²⁷ Daniel e pasadara narae ni nawota, po noa, P̃aia waina nawota e datago asa tea manumatua maga, tea kikita maga, tea midiri tapu maga, tea vasapua maga, eu da mariatae noakisai nawota asa mau;

²⁸ ma Sup̃e sikai e doko nakoroatelagi waina e do maripakasa ki p̃aia maga, go e po mari a e pei tea ataeana paki nawota Nebukadnessar tea waina ega wo doko naaleatia edaku maga. Nap̃erea anigo, go navunusiana maga ni nap̃aum̃a, ragi waina ku one nawewele anigo, eu pei tea maga waia:

²⁹ nigo, nawota O, namidodoana anigo maga eu sake ragi waina ku one nawewele anigo, tea waina ega wo pakilina edaku ki ragi waia: go nae waina e do maripakasa ki p̃aia maga e po mari ko ku atae tea waina ega wo pakilina.

³⁰ Ma kinau, p̃aia waia e da pei tea maripakasakiana paki nau nalakena namanumatuaana waina e doko au p̃arua liu te naata mauri mau, ma nalakena tea waia, naga euga mari nanoap̃otaeana ega vei tea ataeana paki nawota, go naga p̃a atae namidodoana maga ni nap̃op̃om̃a.

³¹ Nigo, nawota O, ku do punusi, go p̃a leo, nasup̃e warua sikai. Nasup̃e wanogoe, waina e p̃arua, go waina nalagaana kakana e datap̃au, e lawodu naraem̃a; go navunusiana kakana e pei tea mataukiana.

³² Nasup̃e wanogoe, nap̃auna e pei tea ni kold wia, narum̃ana go naruna maga eu pei tea ni silver, nap̃elena go namaona maga eu pei tea ni brass,

³³ natuana maga ero pei tea ni airon, nam̃elena maga ero pei namagovai ni airon, go namagovai ni naruku.

³⁴ Ku do punusi pa pa naga vatu sikai e pei tea taeluaana, e da pei tea taeluaana ki nam̃elearu maga mau, go e atugi nasup̃e wanogoe paki nam̃elena maga waina ero pei tea ni airon go naruku, go e marip̃oroworosi a.

³⁵ Ragi wanogoe airon, naruku, brass, silver, go kold, eu pei taua marip̃oroworosiana, po pei tea tapala nam̃otam̃ota ni malo wokalesue maga ragi ni navivitinuana; go nalagi e dape lua ra, go tokora sikai e da madeada pei tea vap̃aiana mau: go vatu waina e atugi nasup̃e e po pei tava warua sikai, po pakavuro maramana mamau.

³⁶ Tea wanogoe e pei nap̃erea anigo, go auga wo noa nanoap̃otaeana kakana narae ni nawota.

³⁷ Nigo, nawota O, ku pei nawota ki nawota maga, waina Sup̃e ni nakoroatelagi e dua ko namarakiana, nakasuaana, go namarimatuaana, go nasamasamaana;

³⁸ go sara tokora waina naatam̃oli natuna maga eu doko ara, e pitua ki nalo mila ni namalasi go manu ni namalopa paki nam̃elearum̃a, po mari ko ku maramara dap̃au puti ra: nigo ku pei nap̃au ni kold wanogoe.

³⁹ Go edaku ki‐go namarakiana p̃ota sikai ega wo duleana tea sa liu ko; go namarakiana p̃ota sikai ketolu ni brass, waina ega wo maramara dap̃au maramana mamau.

⁴⁰ Go namarakiana kevati ega wo kasua dapala airon: nalakena dapala waina airon e do marip̃oraworae po p̃okap̃oroworosi sara naleo: go dapala airon waina e marip̃oroworae tea mamau puti wanogoe, ega wo marip̃oroworosi go ega wo marip̃oraworae.

⁴¹ Go waina ku punusi nam̃elena maga go nakini maga ni nam̃elena, eu pei namagovai ni naruku ki tea mari lasa ni naruku, go namagovai ni airon, ega wo pei namarakiana taekotoviana sikai; ma nakasuaana ni airon seara kakana ega wo doko asa, nalakena ku punusi airon e pei tea marisarisariana ki naruku suidaragiana.

⁴² Go dapala waina nakini maga ni nam̃elena eu pei namagovai ni airon, go namagovai ni naruku suidaragiana, namagovai ni namarakiana ega wo kasua, go namagovai kakana ega wo manainai.

⁴³ Go waina ku punusi airon e pei tea marisarisariana ki naruku suidaragiana, euga wo dum̃ada mari ra euga vei tea marisarisariana ki naworawora ni naatam̃oli maga; ma euga wo da dum̃ada puluti ra mau, dakiusi waina airon go naruku ero da pei tea marisarisariana mau.

⁴⁴ Go naaleatia maga ki nawota maga wanogoe Sup̃e ni nakoroatelagi ega wo sike lawo ki namarakiana sikai, waina ega wo da pei tea maripuoli‐kiana mau pa pa ega tu du po du mau du, go namaramaraana kakana ega wo da magi narei p̃ota sikai pei tea toropusiana mau; ma ega wo marip̃oraworae namarakiana mamau puti wanogoe po mari ra euga nopu, go nae ega wo lawodu pa pa ega tu du po du mau du.

⁴⁵ Nalakena ku punusi naga vatu sikai e pei tea taeluaana m̃elu dua ki tava, e da pei tea taeluaana ki nam̃elearu maga mau, go naga e marip̃oraworae airon, brass, naruku, silver, go kold wanogoe; Sup̃e warua e po mari a e pei tea ataeana paki nawota tea waina ega wo pakilina edaku ki ragi waia: go nap̃erea wanogoe ega wo lolomana, go nanoap̃otaeana kakana e pei lomau.

⁴⁶ Ragi wanogoe nawota Nebukadnessar e dowo dap̃olosiwo po lotu ki Daniel, po pitip̃aki naga euga mari naviriana sikai ni navinaga go tea ni nap̃o wia maga paki nia.

⁴⁷ Nawota e pasadara Daniel, po noa, Lomau Sup̃e animu nae e pei Sup̃e ki sup̃e maga, go Nawota ki nawota maga, go tea maripakasa ki p̃aia maga, nalakena ku mariatae noa pakasa ki p̃aia waia.

⁴⁸ Ragi wanogoe nawota e mari Daniel e pei tea warua, po dua e navituaana warua laapa, po mari a e maramara dap̃au navanua mamau ni Babelon, go naga ega vei nap̃au ni tea maramara maga dap̃au tea manumatua maga ni Babelon.

⁴⁹ Go Daniel e pavara ni nawota, go e dawona ki Shadrak, Meshak, go Abed‐neco eu dap̃au nawosiana maga ni navanua ni Babelon: ma Daniel e doko namatapua ki nawota.