DANIEL 12 - Ngunese Bible

¹ Go ragi wanogoe Mikael ega wo duleana, tea maraki warua waina e magi narei anigo natuda maga lawodu: go ragi ni nariesokiana sikai ega wo doko, dapala waina e da doko mau pae ragi waina nalauna sikai e doko pa pa paki ragi wanogoe; go ragi wanogoe narei anigo euga wo pei tea vualuaana, sara naatam̃oli waina euga wo pei tea vap̃aiana pei tea midiriana tusi.

² Go tea laapa ni tea maga waina eu maturu one natano veravera euga wo leleo, te seara paki namauriana waina ega wo du du po du mau du, go te seara paki nadododaoana go namamaragokiana waina ega wo du du po du mau du.

³ Go tea manumatua maga euga wo maramalaga dapala nalagaana ni nakoroatelagi; go tea maga waina eu do mari tea laapa eu leana euga wo maramalaga dapala m̃asoe maga pa pa ega tu du po du mau du.

⁴ Ma nigo, Daniel O, p̃a kokoro navasaana maga wanogoe, go p̃a vulusoki tusi kakada, pa pa paki ragi ni namatap̃agona edaku: tea laapa euga wo sava pasara, go naataeana ega wo p̃arua.

⁵ Go kinau Daniel a leo punusi, go kuga leo, tea rua p̃ota ero lawodu, sikai e lawodu nadigi waia ni noaisara, go sikai e lawodu nadigi kerua ni noaisara.

⁶ Go sikai e noa ki naatam̃oli waina e pei tea sugoroana ki sugoro maga ni linen, waina e lawodu elagi ki noai maga ni noaisara, Namatap̃agona edaku ni tea ni namagaana maga wanogoe ega wo doko pa pa paki seve ragi?

⁷ Go a dogo naatam̃oli waina e pei tea sugoroana ki sugoro maga ni linen, waina e lawodu elagi ki noai maga ni noaisara, go e sike nam̃elearuna ni matua go nam̃elearuna ni mawiri paki nakoroatelagi, po pivisa pae tea waina e mauri pa pa ega tu du po du mau du, naga ega wo pei agi ragi sikai, ragi dua, go namagovai; go ragi waina euga wo marip̃oraworae sua nakasuaana ni narei tapu, naleo mamau puti wanogoe euga wo pei tea marisuaana.

⁸ Go kinau a dogo, ma a da midoakiatae mau: go a noa, Nawota aginau O, nasava ega wo pei tea edaku ni tea maga wanogoe?

⁹ Go e noa, P̃a ko pano, Daniel: nalakena navasaana maga wanogoe eu pei tea kokoroana go tea vulusokigoroana pa pa paki ragi ni namatap̃agona edaku.

¹⁰ Tea laapa euga wo dum̃ada mari ra euga wo dautau, po dum̃ada mari ra euga wo dare, po pei tea mariana euga wo sara; ma tea sigisigileo maga euga wo mari nasigisigileoana; go tea sigisigileo maga sikai kakada ega wo da midoakiatae mau: ma tea manumatua maga euga wo midoakiatae.

¹¹ Go pae ragi waina naviriana tap̃arakiana ni sara naaleatia ega wo pei tea tapeluaana asa, go tea mamaragokiana waina e do mari a e pei maso maladi ega wo pei tea sikelawokiana, naaleatia manu sikai p̃onotia dua go rualima takuna loveti euga wo doko.

¹² Ae namaropaana ki tea waina e do leogoro, po pa parati ki naaleatia manu sikai p̃onotia dolu go rualima takuna dolu tamate lima.

¹³ Ma nigo p̃a ko pano pa pa paki namatap̃agona edaku: go p̃a wo maromaro, go p̃a wo lawodu gole ni tea veanip̃otaeana anigo, namatap̃agona edaku ni naaleatia maga.