མངོན་པ། 15 - New Tibetan Bible བོད་འགྱུར་གསར་མ།

ལེའུ་བཅོ་ལྔ་པ། ཆག་སྒོ་བདུན་ལ་དབང་བསྒྱུར་བའི་ཕོ་ཉ་བདུན་གྱི་སྐོར།

¹ ཡང་བདག་གིས་ནམ་མཁའ་ནས་ལྟས་ངོ་མཚར་ཅན་གཞན་ཞིག་ཡོད་པ་མཐོང་བ་དང་། དེ་ནི་ཆེ་ཞིང་ཆེ་ལ་ཤིན་ཏུ་ངོ་མཚར་རོ།། ཕོ་ཉ་བདུན་པོས་མཐའ་མའི་ཆག་སྒོ་བདུན་ལ་དབང་བསྒྱུར་ཏོ།། ཅིའི་ཕྱིར་ཞེ་ན། དཀོན་མཆོག་གི་ཐུགས་ཁྲོ་ནི་ཆག་སྒོ་བདུན་ལས་རྫོགས་པར་འགྱུར་བའི་ཕྱིར་རོ།།

² བདག་གིས་ཤེལ་གྱི་རྒྱ་མཚོ་མེ་དང་འདྲེས་མ་ལྟ་བུ་ཞིག་མཐོང་ཞིང་། ཡང་གཅན་གཟན་དང་གཅན་གཟན་གྱི་གཟུགས་བརྙན། དེའི་མིང་གི་གྲངས་ཀ་བཅས་ལས་རྣམ་པར་རྒྱལ་བའི་མི་ཐམས་ཅད་ཤེལ་གྱི་རྒྱ་མཚོའི་སྟེང་དུ་འགྲེང་ཞིང་། ལག་ཏུ་དཀོན་མཆོག་གི་རྒྱུད་མངས་ཐོགས་པ་དང་།

³ དཀོན་མཆོག་གི་ཞབས་ཕྱི་པ་མོ་ཤེའི་མགུར་དང་ལུ་གུའི་མགུར་འདི་ལྟར་བླངས་པ། ཀྱེ་ཀྱེ་གཙོ་བོ་ཀུན་དབང་དཀོན་མཆོག་ལགས།། ཁྱེད་ཀྱི་འཕྲིན་ལས་ཆེ་ཞིང་ངོ་མཚར་ལྡན།། རྒྱལ་ཁབ་ཀུན་གྱི་རྒྱལ་པོ་ཆེན་པོ་ལགས།། ཁྱེད་ཀྱི་ལམ་ནི་དྲང་ཞིང་བདེན་པ་ཡིན།།

⁴ གཙོ་བོ་ཁྱེད་རང་གཅིག་པུ་དམ་པ་ལགས།། ཁྱེད་ལ་གུས་ཞུམ་མི་བྱེད་ཁྱེད་མཚན་ལ།། བསྟོད་བསྔགས་མི་འབུལ་བ་ནི་སུ་ཞིག་ཡོད།། ཁྱེད་ཀྱི་དྲང་བདེན་མཛད་འཕྲིན་མངོན་གྱུར་པས།། མི་རིགས་ཐམས་ཅད་ཁྱེད་ཀྱི་སྤྱན་དྲུང་དུ།། ཡོང་ནས་ཁྱེད་ལ་བསྟོད་བསྔགས་བརྗོད་པར་འགྱུར།། ཞེས་པའོ།།

⁵ དོན་དེ་དག་གི་རྗེས་སུ། བདག་གིས་ཕར་བལྟས་པ་ན། ནམ་མཁའི་ཞིང་ཁམས་སུ་ཡོད་པའི་དཔང་པོའི་གུར་མཆོག་གི་མཆོད་ཁང་གི་སྒོ་ཕྱེས་པ་མཐོང་ངོ་།།

⁶ ཆག་སྒོ་བདུན་ལ་དབང་བསྒྱུར་བའི་ཕོ་ཉ་བདུན་པོ་མཆོད་ཁང་ནས་ཐོན་ཅིང་། ལུས་ལ་དྭངས་ཤིང་གཙང་ལ་འོད་སྣང་འཕྲོ་བའི་སོ་རས་གྱོན་པ་དང་། བྲང་ཁར་གསེར་གྱི་སྐ་རགས་བཅིངས་ཡོད་དོ།།

⁷ དེ་ནས་སེམས་ཅན་བཞི་པོ་དེ་ལས་གཅིག་གིས། ཇི་སྲིད་བར་དུ་གསོན་པོར་བཞུགས་པའི་དཀོན་མཆོག་གི་ཐུགས་ཁྲོས་གང་བའི་གསེར་གྱི་ཕོར་བ་བདུན་པོ་དེ་ཕོ་ཉ་བདུན་ལ་གནང་ཞིང་།

⁸ མཆོད་ཁང་ནང་དུ་དཀོན་མཆོག་གི་གཟི་བརྗིད་དང་ནུས་མཐུའི་དབང་གིས་བྱུང་བའི་དུ་བས་ཁེངས་ཏེ། ཕོ་ཉ་བདུན་པོས་ཆག་སྒོ་བདུན་བཏང་ཚར་བའི་བར་དུ་གནས་དམ་མཆོག་ཏུ་འགྲོ་ཐུབ་མཁན་གཅིག་ཀྱང་མེད་དོ།།