གསུང་མགུར 24 - New Tibetan Bible བོད་འགྱུར་གསར་མ།གསུང་མགུར་ཉེར་བཞི༌པ། རྒྱལ་པོ་རླབས་བོ་ཆེ། 1 ༼དཱ་བིད་ཀྱི་མགུར༌མ།༽ ས་གཞི་དང་ནི་སྣོད་བཅུད་མ་ལུས༌པ། །འཇིག་རྟེན་དང་ནི་དེར་གནས་ཡ་ཝཱེའི༌ཡིན།། 2 ས་ཡི་རྨང་གཞི་རྒྱ་མཚོའི་སྟེང་དུ༌བཏིངས། །ཆུ་ཆེན་སྟེང་དུ་བརྟན་པོར་མཛད་པས༌སོ།། 3 སུ་ཞིག་ཡ་ཝཱེའི་རི་བོར་འཛེག་ནུས༌སམ། །སུ་ཞིག་ཁོང་གི་དམ་པའི་གནས་སུ༌ཚུགས།། 4 ལག་པ་གཙང་ཞིང་བསམ་པ་རྣམ་དག༌ཅན། །སྙིང་པོ་མེད་པའི་ཕྱོགས་སུ་མི་འཁོར༌བ། །གཡོ་སྒྱུའི་མནའ་ཡང་མི་བསྐྱལ་བ་རྣམས༌སོ།། 5 དེ་ཡིས་ཡ་ཝཱེ་ཁོང་ནས་བྱིན་རླབས༌དང༌། །སྐྱབས་མཛད་དཀོན་མཆོག་ཉིད་ནས་དྲང་བདེན༌རྙེད།། 6 འདི་ནི་ཡ་ཝཱེ་འཚོལ་བའི་རིགས་རྒྱུད༌དང༌། །ཁྱེད་ཀྱི་ཞལ་ངོ་འཚོལ་མཁན་ཡ་ཀོབ༌ཡིན།།༼ སེ༌ལཱ། ༽ 7 མཁར་སྒོ་དག་གིས་སྒོ་མོ་ཡར་ཕྱེ་དང་། །གནའ་བོའི་སྒོ་རྣམས་ཡར་ལ་འདེགས་པར༌གྱིས། །དེ་ནས་དཔལ་ལྡན་རྒྱལ་པོ་འབྱོན་པར༌འགྱུར།། 8 དཔལ་ལྡན་རྒྱལ་པོ་དེ་ཉིད་སུ་ལགས༌སམ། །སྟོབས་དང་ནུས་མཐུ་ལྡན་པའི་ཡ་ཝཱེ༌ཡིན། །གཡུལ་སར་མཐུ་སྟོབས་མངའ་བའི་ཡ་ཝཱེ༌ཡིན།། 9 མཁར་སྒོ་དག་གིས་སྒོ་མོ་ཡར་ཕྱེ་དང་། །གནའ་བོའི་སྒོ་རྣམས་ཡར་ལ་འདེགས་པར༌གྱིས། །དེ་ནས་དཔལ་ལྡན་རྒྱལ་པོ་འབྱོན་པར༌འགྱུར།། 10 དཔལ་ལྡན་རྒྱལ་པོ་དེ་ཉིད་སུ་ལགས༌སམ། །དཔུང་ཚོགས་ཡ་ཝཱེ་དཔལ་ལྡན་རྒྱལ་པོ༌ལགས།། |
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.