གསུང་མགུར 148 - New Tibetan Bible བོད་འགྱུར་གསར་མ།གསུང་མགུར་བརྒྱ་དང་ཞེ་བརྒྱད༌པ། དཀོན་མཆོག་ཡ་ཝཱེར་བསྟོད་པ་འབུལ་ཕྱིར་བཀོད་པ་ཀུན་ལ་འབོད་སྐུལ་གཏོང་བ། 1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ནམ་མཁའི་ཀློང་ནས་ཁོང་ལ་བསྟོད་པར༌གྱིས། །བླ་ན་མཐོ་བའི་གནས་སུ་ཁོང་ལ༌བསྟོད།། 2 ཁོང་གི་ཕོ་ཉ་ཀུན་གྱིས་ཁོང་ལ༌བསྟོད། །ཁོང་གི་དཔུང་ཚོགས་རྣམས་ཀྱིས་ཁོང་ལ༌བསྟོད།། 3 ཀྱེ་ཀྱེ་ཉི་ཟླ་གཉིས་པོས་ཁོང་ལ༌བསྟོད། །འོད་ཅན་སྐར་མ་རྣམས་ཀྱིས་ཁོང་ལ༌བསྟོད།། 4 ཀྱེ་ཀྱེ་ནམ་མཁའི་རྩེ་མོ་ཁོང་ལ༌བསྟོད། །ནམ་མཁའི་སྟེང་གི་ཆུ་རྣམས་ཁོང་ལ༌བསྟོད།། 5 ཁོང་གི་བཀའ་ལས་དེ་དག་བྱུང་བས༌ན། །ཀུན་གྱིས་ཡ་ཝཱེའི་མཚན་ལ་བསྟོད་པར༌གྱིས།། 6 ཁོང་གིས་དེ་རྣམས་རྒྱུན་ནས་རྒྱུན་དུ༌བཙུགས། །འགྱུར་བ་མེད་པའི་ཆོས་ཉིད་གཏན་ལ༌ཕབ།། 7 ཁྱོད་ཚོས་ས་གཞིའི་སྟེང་ནས་ཡ་ཝཱེར༌བསྟོད། །རྒྱ་མཚོའི་ཆུ་སྲིན་རྣམས་དང་གཏིང་ཟབ༌མཚོ།། 8 མེ་དང་སེར་བ་ཁ་བ་སྤྲིན་པ༌དང༌། །ཁོང་གི་བཀའ་ལྟར་སྒྲུབ་པའི་རླུང་ཆེན༌དང༌།། 9 རི་རབ་རྣམས་དང་རི་ཕྲན་མཐའ་དག༌དང༌། །སིལ་སྡོང་དང་ནི་ཐང་ཤིང་ཐམས་ཅད༌དང༌།། 10 རི་དྭགས་གཅན་གཟན་དང་ནི་ཕྱུགས་ཟོག༌ཀུན། །ལྟོ་འགྲོ་སྲོག་ཆགས་དང་ནི་འདབ་ཆགས༌དང༌།། 11 ས་གཞིའི་རྒྱལ་པོ་དང་ནི་མི་རིགས༌ཀུན། །མི་ཆེན་རྣམས་དང་ས་སྟེང་ཁྲིམས་དཔོན༌ཀུན།། 12 སྟག་ཤར་མོ་གསར་རྒན་རབས་བྱིས་པ༌བཅས།། 13 ཀུན་གྱིས་ཡ་ཝཱེའི་མཚན་ལ་བསྟོད་པར༌ཤོག །རྒྱུ་མཚན་ཁོང་མཚན་འབའ་ཞིག་གོང་དུ༌བཀུར། །ཁོང་གི་གཟི་བྱིན་གནམ་ས་གཉིས་ལས༌བརྒལ།། 14 ཁོང་གིས་ཉིད་ཀྱི་འབངས་ཕྱིར་རྒྱལ་པོ༌བསྐོས། །ཁོང་གི་དད་གུས་ལྡན་པ་ཐམས་ཅད༌དེ། །ཁོང་དང་ཉེ་བའི་ཡེས་ར་ཨེལ་པ༌རྣམས། །ཀུན་གྱིས་ཁོང་ལ་བསྟོད་པ་འབུལ་བར༌གྱིས། །ཁྱོད་ཚོས་ཡ་ཝཱེར་བསྟོད་པ་འབུལ་བར༌གྱིས།། |
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.